ព្រះសីហនុ ៖ មន្ត្រីប៉ូលិសសេដ្ឋកិច្ច ខេត្តព្រះសីហនុម្នាក់ ដែលមិនមានសែស្រឡាយ បានលួចខ្សឹបប្រាប់ កាសែតនគរសន្តិភាពឲ្យដឹងថា មានឈ្មួញបីនាក់ កំពុងនាំម៉ូតូម៉ាកស្កូបពី សេរីឆ្នាំ ២០១២ និង២០១៣ សម្រុកចូលមកតាមច្រក ទំនប់រលក ក្រុងព្រះសីហនុ នៅចុងឆ្នាំ២០១៤នេះ តែម៉ូតូទាំងនោះ ភាគច្រើន ពុំមានបង់ពន្ធជូនរដ្ឋ គ្រប់ចំនួននោះទេ។ ប្រការនេះដោយសារតែ មានការឃុបឃិតគ្នា យ៉ាងចាស់ដៃ ជាមួយមន្ត្រីជំនាញ ដែលមានតួនាទី នៅកំពង់ផែទំនប់រលក។
មន្ត្រីប៉ូលិសរូបនោះ បាននិយាយថា ម៉ូតូម៉ាកស្កូបពី និងម៉ាកផ្សេងៗ ដែលកំពុងពេញនិយម របស់យុវវ័យត្រូវបាននាំចូលមក ក្នុងមួយខែៗ រាប់ពាន់គ្រឿង ហើយដឹកតាមរថយន្តកុងតឺន័រ ទៅទីក្រុងភ្នំពេញ និងលក់នៅតាម បណ្តាខេត្តមួយចំនួន ជាពិសេសខេត្តព្រះសីហនុ តែម្តង។
មន្ត្រីប៉ូលិសដដែល បាននិយាយបន្តថា ចំពោះគយដែល ឈរជើងនៅទីនោះ គេធ្វើមិនដឹងមិនឮទេ ដោយគេគ្រាន់តែ ប្រាប់មេឈ្មួញទាំងនោះថា ត្រូវស្មោះត្រង់ មានទំនិញប៉ុន្មាន ត្រូវតែប្រាប់គ្រប់ចំនួន រីឯបាតុភាពអ្វីៗ ត្រូវចេះគិតគូរដោយខ្លួនឯង ប្រសិនបើបាតុភាពនោះ ផ្ទុះឡើង ទំនិញទាំងអស់ ត្រូវតែប្រកាសបង់ពន្ធ គ្រប់ចំនួន មិនអាចលាក់លៀម ដូចមុនបានទៀតទេ នេះជាក្បាច់គុណពិសេសរបស់លោកគយប្រចាំការនៅទីនោះ ដើម្បីរួចខ្លួនទាំងអស់គ្នា ប៉ុន្តែអ្វីដែលគួរឲ្យកត់សម្គាល់ និងសោកស្តាយបំផុតនោះ គឺថវិកាជាតិ រាប់សិបលានរៀល ដែលគួរតែបានមក ពីការបង់ពន្ធនៃ ការនាំចូលម៉ូតូទាំងនោះ បែរជាត្រូវបាត់បង់ ដោយការឃុបឃិតគ្នា ប្រព្រឹត្តអំពើពុករលួយទៅវិញ។ អង្គភាពប្រឆាំងអំពើពុករលួយ គប្បីពិនិត្យមើលផង ។
ទាក់ទិនជុំវិញបញ្ហាខាងលើនេះ លោក ឡឹង សុភាព មេគយស្នាក់ការប្រចាំទំនប់រលកក្រុងព្រះសីហនុ កាសែតនគរសន្តិភាពមិនអាចធ្វើការទំនាក់ទំនងរងការបំភ្លឺជុំវិញបញ្ហាម៉ូតូបង់ពន្ធខ្លះនិងអត់បង់ពន្ធខ្លះដែលឡើងតាមច្រកគ្រប់គ្រងរបស់គាត់នោះបានឡើយព្រោះទូរស័ព្ទរបស់លោកបិទការហៅចូល ៕
ដោយ ភ្នំព្រឹក
