បើតាមប្រភពពីមន្រ្តីអង្គភាពសាខាពន្ធដារខេត្តពោធិ៍សាត់ បានឲ្យដឹងថា កន្លងមកបើទោះបីរឿងអាស្រូវពុករលួយរបស់លោក ម៉ា សំអាត ប្រធានសាខាពន្ធដារខេត្តពោធិ៍សាត់ ត្រូវបានលាតត្រដាងជាបន្តបន្ទាប់យ៉ាងណាក៏ដោយក៏ថ្នាក់ដឹកនាំអគ្គនាយកដ្ឋានពន្ធដារ ធ្វើមិនដឹងមិនឮអ្វីទាំងអស់។
ជាងនេះទៅទៀតលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ មិនទាន់បើកការស៊ើបអង្កេតណាមួយជុំវិញរឿងអាស្រូវពុករលួយរបស់លោក ម៉ា សំអាត និងមន្រ្តីជំនិតៗនៅឡើយទេ។ ហេតុនេះហើយទើបលោក ម៉ា សំអាត ប្រធានសាខាពន្ធដារខេត្តពោធិ៍សាត់ ពង្រឹងបណ្ដាញពុករលួយកាន់តែរឹងមាំ ហើយបន្តប្រព្រឹត្តអំពើពុករលួយដោយគ្មានញញើតអ្វីទាំងអស់។
ប្រភពពីមន្រ្តីសាខាពន្ធដារខេត្តពោធិ៍សាត់ បានឲ្យដឹងទៀតថា បើនិយាយអំពីកម្រិតនៃអំពើពុករលួយរបស់លោក ម៉ា សំអាត ប្រធានសាខាពន្ធដារខេត្តពោធិ៍សាត់ គឺមិនចាញ់លោក នុត វុត្ថា អតីតប្រធានសាខាពន្ធដារខេត្តកណ្ដាល ដែលត្រូវបានផ្លាស់ប្ដូរតំណែងនោះទេ។ ប៉ុន្តែរហូតមកដល់ពេលនេះលោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ មិនទាន់ចាត់វិធានការណាមួយលើលោក ម៉ា សំអាត នៅឡើយទេ។ រីឯលោក គង់ វិបុល អគ្គនាយកនៃអគ្គនាយកដ្ឋានពន្ធដារ រក្សាភាពស្ងៀមស្ងាត់ បើទោះបីកន្លងមករឿងអាស្រូវពុករលួយរបស់លោក ម៉ា សំអាត ជាប់ពាក់ព័ន្ធជាមួយលោក លៀម ប៊ុនរឿន អតីតប្រធានមន្ទីររៀបចំដែនដីខេត្តពោធិ៍សាត់ ត្រូវបានបើកកកាយយ៉ាងណាក៏ដោយ។
ប្រភពស្និទ្ធនឹងលោក ម៉ា សំអាត បានឲ្យដឹងថា ចាប់តាំងពីលោក ម៉ា សំអាត ទទួលបានតំណែងជាប្រធានសាខាពន្ធដារខេត្តពោធិ៍សាត់ នៅថ្ងៃទី25 ខែធ្នូ ឆ្នាំ2017 រហូតមកដល់ពេលនេះគឺលោក ម៉ា សំអាត ប្រើតួនាទី និងអំណាចប្រមូលលុយតាមរបៀបពុករលួយយ៉ាងរលូន។ ការដែលលោក ម៉ា សំអាត ហ៊ានធ្វើអ្វីៗតាមអំពើចិត្តគឺដោយសារអាងមានខ្នងបង្អែកក្រាស់នៅក្នុងអគ្គនាយកដ្ឋានពន្ធដារ ហើយលោក គង់ វិបុល អគ្គនាយកនៃអគ្គនាយកដ្ឋានពន្ធដារសម្ងំស្ងាត់ឈឹង។ ដូច្នេះលោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ មិនគួរមើលរំលងតទៅទៀតទេ ព្រោះរឿងអាស្រូវនៃអំពើពុរលួយច្រើនបែបច្រើនយ៉ាងរបស់លោក ម៉ា សំអាត គឺជារឿងមិនអាចបិទបាំងបានឡើយ៕
