ខេត្តតាកែវ ៖ មានឈ្មួញធំៗចំនួន ៣ នាក់ដែលជាអ្នកនាំចូលទំនិញគេចពន្ធ សុទ្ធសាធតាមច្រករបៀងចំនួន ២ កន្លែងក្បែរច្រកអន្ដរជាតិភ្នំដិន គឺចែហោស្រី, ឈ្មោះចាន់ថានិងចែពៅដែលមេឈ្មួញទាំង៣នាក់នេះរស់នៅឃុំទន្លាប់ប៉ុន្ដែបានរកស៊ីនាំទំនិញគេចពន្ធចូលតាមច្រករបៀងខាងលើនេះយកមកស្ដុកទុកនៅចំណុចច្បារអំពៅខណ្ឌ មានជ័យដើម្បីបន្ដចែកចាយឲ្យម៉ូយនិងអ្នកបោះដុំនៅរាជធានីភ្នំពេញ។ឈ្មួញតូចតាចបានបញ្ជាក់ថាជាទូទៅទំនិញគេចពន្ធមានដូចជាទំនិញចាប់ហួយគ្រឿង អេឡិចត្រូនិកក្នុងនោះមានគ្រឿងអេឡិចត្រូនិករបស់ក្រុមហ៊ុន Open Net ផងដែរត្រូវបានគេដឹកតាមរថយន្ដពីក្រុងព្រៃនគរប្រទេសវៀតណាមមកដល់ព្រំដែនលើកដាក់ ទូកធំៗដឹកឆ្លងកាត់មកច្រករបៀងខាងលើទើបឈ្មួញហោស្រីចាន់ថានិងចែពៅបន្ដដឹកតាមរថយន្តទួរីសក្នុង១យប់មានយ៉ាងតិចពី១០ទៅ១២រថយន្ដក្នុងនោះ១រថយន្ដ ទួរីសផ្ទុកទំនិញស្មើនឹងចំណុះ៣តោន ។
ជាទូទៅទំនិញគេចពន្ធជាច្រើនប្រភេទត្រូវបានឆ្លងកាត់ច្រករបៀងចាប់ពីម៉ោង៨និង៣០នាទីទៅម៉ោង៩យប់ហើយបន្តធ្វើដំណើរឆ្លងកាត់លើកំណាត់ផ្លូវជាតិលេខ២ឆ្ពោះ មកច្បារអំពៅយ៉ាងយូរត្រឹមម៉ោង១២ទៅម៉ោង១រំលងអធ្រាត្រទើបក្រុមឈ្មួញទាំង៣រូបនេះបានប្រើរូបភាពលើកទំនិញដាក់តាមរ៉ឺម៉កកង់៣ឬរថយន្ដតូចៗឱ្យម៉ូយរបស់ខ្លួន នៅរាជធានីភ្នំពេញ ។
ក្រុមឈ្មួញបានបញ្ជាក់ថាប្រធានស្នាក់ការគយនិងរដ្ឋាករច្រកអន្ដរជាតិភ្នំដិនដែលទើបទៅកាន់តំណែងថ្មីទទួលបានប្រភពសេដ្ឋកិច្ចយ៉ាងខ្លាំងពីច្រករបៀងទាំង ២ ដែល ឱ្យអនុប្រធាន១រូបឈ្មោះបូជាអ្នកទទួលខុសត្រូវប្រមូលប្រយោជន៍នៅទីនោះ ប៉ុន្ដែអំពើពុករលួយលក្ខណៈទ្រង់ទ្រាយធំនេះកំពុងតែធ្វើឱ្យរដ្ឋបាត់បង់ចំណូលពន្ធនាំចូល យ៉ាងធ្ងន់ធ្ងរពិសេសមេគយច្រកអន្ដរជាតិភ្នំដិនកំពុងតែបង្កើតឱ្យមានភាពធូររលុងទំនិញគេចពន្ធ ។
ពាក់ព័ន្ធនឹងទំនិញគេចពន្ធឆ្លងកាត់ច្រករបៀងទាំងនេះមិនដឹងថា លោក គុណ ញឹម អគ្គនាយក នៃអគ្គនាយកដ្ឋានគយនិងរដ្ឋាករកម្ពុជាជ្រាប ឬយ៉ាងណាទេ ប៉ុន្ដែគេ ទទួលស្គាល់ថា មេឈ្មួញទាំង ៣ ដែលរកស៊ីល្មើសច្បាប់មានទំនាក់ទំនងល្អណាស់ ជាមួយជំនាញគយនៅទីនោះ ហើយក្រុមគយចល័តលើកំណាត់ផ្លូវជាតិលេខ ២ ខេត្ដ តាកែវ ខេត្ដកណ្ដាល និងសមត្ថកិច្ច ពាក់ព័ន្ធជាច្រើនទៀតសុទ្ធតែរួមមតិគ្នាហែកយកប្រយោជន៍ចែកគ្នាយកទៅធ្វើមានធ្វើបានផ្ទាល់ខ្លួន ៕
