ខេត្តសៀមរាប ៖ សេចក្តីរាយការណ៏មួយបានឲ្យដឹងថា ក្នុងរយៈពេលប៉ុន្មានឆ្នាំកន្លងទៅនេះក្រុមហ៊ុនសុខសំណាងដែលទទួលបានសិទ្ធិរកស៊ីកែច្នៃនិងដឹកជញ្ជូនឈើទ្រង់ទ្រាយធំបន្តពីក្រុមហ៊ុនដាតារ៉ាប់ប៊ើនិងក្រុមហ៊ុនទំរីងរ៉ាប់ប៊ើរួមទាំងក្រុមហ៊ុនវៀតណាមនៅតំបន់ព្រៃឡង់បាននិងកំពុងតែសម្រុកកាប់បំផ្លាញព្រៃឈើស្ទើររលាយ សាបសូន្យក្នុងបរិវេណក្រុមហ៊ុននិងក្រៅក្រុមហ៊ុនហើយពួកគេតែងតែប្រើប្រាស់រថយន្តខ្នាតយក្សធំៗដឹកជញ្ជូនឈើរាប់សិបតោនលើសពីច្បាប់កំណត់នាំឲ្យមាន ការបំផ្លិចបំផ្លាញផ្លូវថ្នល់យ៉ាងធ្ងន់ធ្ងរបំផុតហើយទង្វើទាំងអស់នេះត្រូវបានគេរិះគន់ថាក្រុមហ៊ុននេះមានចេតនាផ្គើនទៅនឹងបទបញ្ជាររបស់សម្តេចតេជោយ៉ាងពេញទំហឹង តែម្តង។
ប្រភពដដែលបានរាយការណ៍ថាកន្លងមកក្រុមហ៊ុនសុខសំណាងមិនមានអាជ្ញាប័ណ្ណអ្វីដែលរាជរដ្ឋាភិបាលបានប្រគល់ឲ្យក្នុងការវិនិយោគផ្នែកវិស័យកសិកម្មនិង ឧស្សាហកម្ម ដំណាំកៅស៊ូនោះទេប៉ុន្តែក្រុមហ៊ុននេះបានឃុបឃិតគ្នាជាមួយក្រុមហ៊ុន២ទៀតគឺក្រុមហ៊ុនដាតារ៉ាប់ប៊ើនិងក្រុមហ៊ុនទំរីងរ៉ាប់ប៊ើដែលមានទីតាំងនៅស្រុក អន្លង់វែងនិងស្រុកត្រពាំងប្រាសាទខេត្តឧត្តរមានជ័យរួមទាំងក្រុមហ៊ុនវៀតណាមនៅតំបន់ព្រៃឡង់ដើម្បីចែកលាភសក្ការៈគ្នាកេងចំណេញលើរាជរដ្ឋាភិបាលកម្ពុជាតែម្ដង ។ ក្រោយពីក្រុមហ៊ុនសុខសំណាងបានទទួលសិទ្ធិស្ងាត់ៗពីក្រុមហ៊ុនដាតារ៉ាប់ប៊ើនិងក្រុមហ៊ុនទំរីងរ៉ាប់ប៊ើរួចមកក្រុមហ៊ុនសុខសំណាងក៏បានចាប់ផ្តើមសម្រុកកាប់បំផ្លាញ ព្រៃឈើនិងប្រមូលទិញឈើក្រៅបរិវេណក្រុមហ៊ុនដូចជាឈើលេខ១, ឈើលេខ២រួមទាំងឈើគ្រញូងផងដែរ។
ឈើទាំងឡាយដែលក្រុមហ៊ុននេះកាប់បាននិងប្រមូលទិញបានគេតែងតែដឹកជញ្ជូនចែកចាយលក់នៅតាមបណ្តាខេត្ត-ក្រុងផ្សេងៗដូចជាខេត្តសៀមរាប,បន្ទាយមានជ័យ, បាត់ដំបង, កំពង់ធំ, កំពងចាម, ព្រៃវែង, ស្វាយរៀងនិងខេត្តមួយទៀត។ពាក់ព័ន្ធនឹងបញ្ហានេះមានមជ្ឈដ្ឋានជាច្រើនបាននិយាយថាគេមិនដឹងថាតើមានក្រុមហ៊ុនចំនួនប៉ុន្មានទេដែលរត់ការបានសិទ្ធិវិនិយោគលើដីសម្បទានអភិវឌ្ឈន៍ត្រឹមត្រូវពីរាជរដ្ឋាភិបាលហើយពួកគេបែរជាយកអាជ្ញាប័ណ្ណទៅគួកជេរលក់បន្តទៅឲ្យក្រុមហ៊ុនផ្សេងៗជាភាគីទី២ឬទី៣ទៀតដោយបំពានច្បាប់និងគោលការណីវិនិយោគនិងធ្វើប្រាស់ចាកពីគោលការណ៍របស់រដ្ឋាភិបាល៕
