កំពត ៖ យ៉ាងហោចណាស់អ្នកដំណើរប្រុស-ស្រី ៥ នាក់បានស្លាប់ភ្លាមៗនៅនឹងកន្លែងកើតហេតុ និង៩នាក់ផ្សេងទៀតបានរងរបួសធ្ងន់ ក្នុងហេតុការណ៍គ្រោះថ្នាក់ចរាចរដ៏រន្ធត់មួយ បង្កឡើងដោយរថយន្តនីសាន់បោលបុករថយន្តតួរីស ដឹកអ្នកដំណើរនៅលើកំណាត់ផ្លូវជាតិលេខ៣ (កំពត-ព្រះសីហនុ) ស្ថិតនៅមុខវត្តរលួសឃុំបឹងទូកស្រុកទឹកឈូខេត្តកំពតនាម៉ោង៥ល្ងាចថ្ងៃទី០៥ខែតុលាឆ្នាំ២០១៤នេះ។
មន្ត្រីនគរបាលចរាចរណ៍ជើងគោកបានឲ្យដឹងថា រថយន្តនីសាន់បានធ្វើដំណើរយ៉ាងលឿនក្នុងទិសបញ្ច្រាសគ្នា ជាមួយរថយន្តតួរីស លុះដល់ចំណុចកើតហេតុ គេមិនដឹងថា មានមូលហេតុអ្វីនោះទេ បានជ្រុលទៅបុករថយន្តតួរីសចំពាក់កណ្តាល លាន់ឮដូចរន្ទះបណ្តាលឲ្យអ្នកដំណើរ ៥ នាក់ស្លាប់ ក្នុងនោះមានស្រីម្នាក់ និងចំណែកឯអ្នកដំណើរ ៩ នាក់ផ្សេងទៀតបានរងរបួសធ្ងន់ ។
បើតាមមន្ត្រីនគរបាលក៏បានឲ្យដឹងផងដែរថា ក្រោយពីបុករថយន្តតួរីសហើយរថយន្តមួយគ្រឿងនេះ បានជ្រុលទៅបុករថយន្ត២គ្រឿងផ្សេងទៀត បណ្តាលឲ្យខូចខាតផងដែរ តែមិនបង្កគ្រោះថ្នាក់អាយុជីវិតមនុស្សនៅក្នុងរថយន្តនោះទេ ។ អត្តសញ្ញាណរបស់ជនរងគ្រោះទាំងអស់នៅក្នុងរថយន្តតួរីស សមត្ថកិច្ចមិនទាន់បញ្ជាក់អត្តសញ្ញាណនៅឡើយទេ ។ ក្រោយបង្កហេតុអ្នកបើករថយន្តនីសាន់បានរត់គេចខ្លួនបាត់ ៕
អ៊ួងវឹង
