អត្ថបទ​បកស្រាយ និង​បំភ្លឺ​ជូន​សារព័ត៌មាន និង​សាធារណជន​ជាតិ​

អត្ថបទបកស្រាយ និងបំភ្លឺជូនសារព័ត៌មាន និងសាធារណជនជាតិ

ដោយ នគរសន្តិភាព on 25/09/2014

ខ្ញុំឈ្មោះ ឡោ ធូរ៉ា អនុប្រធាននាយកដ្ឋានសិក្សាទីផ្សារ និងផ្សព្វផ្សាយ ជាប្រធានដឹកនាំក្រុមការងាររៀបចំរាត្រី កម្ពុជា (Cambodia Night)ក្នុងព្រឹត្តិការណ៍ពិព័រណ៍ទេសចរណ៍អន្តរជាតិលើកទី ១០ ITE-HCMC 2014 នៅទីក្រុងហូជីមិញ សាធារណរដ្ឋសង្គមនិយមវៀតណាមឆ្នាំ២០១៤ ។ ខ្ញុំសូមធ្វើការបកស្រាយ និងបំភ្លឺជូនសារព័ត៌មានមួយចំនួន និងសាធារណជនទូទៅអំពើករណីដែលបានចុះផ្សាយចោទប្រកាន់ចំពោះការរៀបចំរបស់ក្រសួងទេសចរណ៍លើការស្នាក់នៅរបស់ក្រុមម៉ូ ដែលមួយក្រុមនោះឱ្យបានជ្រាបថា ៖ដោយទទួលបានការអនុញ្ញាត ជាគោលការណ៍ពីរាជរដ្ឋាភិបាលកម្ពុជា ឆ្នាំនេះ ក៏ដូចជា ឆ្នាំមុនៗដែរ ក្រសួងទេសចរណ៍តែងតែទៅចូលរួមព្រឹត្តិការណ៍ពិព័រណ៍ទេសចរអន្តរជាតិ ITE-HCMC 2014 ដើម្បីជម្រុញ ឃោសនាផ្សព្វផ្សាយការរីកចំរើននៃវិស័យទេសចរណ៍កម្ពុជាដល់ភ្ញៀវអន្តរជាតិមកពីបណ្តាប្រទេសផ្សេងៗលើពិភពលោកចូលរួមក្នុងព្រឹត្តិការណ៍ខាងលើនេះ ដើម្បីធ្វើការទាក់ទាញទេសចរ និងវិនិយោគិនបរទេសកម្ពុជាឱ្យកាន់តែច្រើនថែមទៀត ។

សួមបញ្ជាក់ថា ទេសចរវៀតណាមឋិតក្នុងលំដាប់ទី ១ ហើយមានការចំណាយច្រើនគួរសមក្នុងចំណោមទីផ្សារលំដាប់ កំពូលទាំង ១០ របស់កម្ពុជា ។ ដូច្នេះដើម្បីចាប់យកឱកាសពីព្រឹត្តិការណ៍ដ៏សំខាន់នេះ ក្រសួងបានសហការជាមួយក្រសួងវប្ប ធម៌ និងវិចិត្រសិល្បៈ ស្ថានឯកអគ្គកុងស៊ុលកម្ពុជាប្រចាំទីក្រុងហូជីមិញ និងក្រុមហ៊ុនឯកជននានា បានរៀបចំកម្មវិធីរាត្រី កម្ពុជា (Cambodia Night)ក្នុងគោលបំណងបង្កើនការផ្សព្វផ្សាយ អំពីសក្តានុពលទេសចរណ៍ដ៏ល្អផូរផង់របស់កម្ពុជាដល់ ភ្ញៀវអន្តរជាតិទាំងអស់ដែលអញ្ជើញមកចូលរួមក្នុងព្រឹត្តិការណ៍ទេសចរណ៍ ITE-HCMC 2014 ។ ការរៀបចំ រាត្រីកម្ពុជា នេះ ក្រសួងបានប្រមូលផ្តុំក្រុមសិល្បករ សិល្បការិនីទាំងនៅក្នុងក្របខណ្ឌក្រសួងវប្បធម៌ និងវិចិត្រសិល្បៈ និងក្រុមសិល្បករ សិល្បការិនីពីផ្នែកឯកជនផ្សេងៗក្នុងនេះរួមមាន ក្រុមម៉ូដែល និងតារាចំរៀងល្បីៗនានាដើម្បីផ្តល់ឱកាសដល់ពួកគាត់បានទៅ ចួលរួមសម្តែង និងផ្សព្វផ្សាយពីផលិតផលរបស់គាត់ក្នុងវិស័យសិល្បៈ ជូនដល់ភ្ញៀវទស្សនាតាមរយៈព្រឹត្តិការណ៍អន្តរជាតិនា នានៅក្រៅប្រទេស ។

ជាទូទៅមុននឹងទៅរៀបចំកម្មវិធីរាត្រីកម្ពុជា នៅសាធារណរដ្ឋសង្គមនិយមវៀតណាម ក្រសួងបាន រៀបចំប្រជុំរួម និងធ្វើការជួបជុំគ្នាជាច្រើនលើកក្នុងកម្មវិធីហ្វឹកហាត់សម ដោយបានអញ្ជើញគ្រប់ផ្នែកពាក់ព័ន្ធទាំងអស់មក ពិភាក្សា និងទទួលយកគោលការណ៍កំណត់របស់ក្រសួងក្នុងនោះមានការអញ្ជើញចូលរួមពីសំណាក់ថ្នាក់ដឹកនាំតំណាងរបស់ ក្រសួងវប្បធម៌ និងវិចិត្រសិល្បៈ តំណាងក្រុមម៉ួដែលទាំងបី Cambodia Super Model, SUN Super Model និងKhmer Super Model,តារាចំរៀង និងពិធីករ ពិធីការិនី ដើម្បីស្តាប់ និងអនុវត្តតាមស្មារតីសម្រេចរបស់អង្គប្រជុំ ។ ចំពោះការសម្តែង របស់ក្រុមតារាបង្ហាញម៉ូដទាំងបីក្រុម គឺត្រូវបានបែងចែកជាបីកង់ ៖
   ទី១-បង្ហាញម៉ូដសំលៀកបំពាក់សម័យបុរាណ (ចាប់ពីសម័យអង្គរ ដល់សម័យចតុមុខ)
   ទី២-បង្ហាញម៉ូដសំលៀកបំពាក់ប្រពៃណីខ្មែរកែច្នៃ និងការលើកកម្ពស់ផលិតផលសូត្រខ្មែរ
   ទី៣-បង្ហាញម៉ូដសំលៀកបំពាក់តំបន់ឆ្នេរដោយផ្សារភ្ជាប់ការឃោសនាផ្សព្វផ្សាយ តារារះនាទិសនីរតី និងឃោសនា ផ្សព្វផ្សាយសក្តានុពលភាពតំបន់ឆ្នេរសមុទ្រកម្ពុជា ។
   ចំពោះក្រុមម៉ូដដែលទាំងបីក្រុមខាងលើ អង្គប្រជុំបានកំណត់គោលការណ៍ដូចខាងក្រោម ៖
   ១-សម្រេចយកតារាបង្ហាញម៉ូដពីក្រុមម៉ូដែលនិមួយៗចំនួន ១៤រូប ក្នុងនោះអ្នកសម្តែង ១០រូប និងជំនួយការចំនួន ០៤រូប ចំណែកឯសិល្បករ សិល្បការិនី របស់ក្រសួងវប្បធម៌ និងវិចិត្រសិល្បៈចំនួន ៣៦រូប ក្រសួងជូន ១៨បន្ទប់ ។
   ២-ក្រសួងផ្តល់គោលការណ៍កំណត់ចំពោះការស្នាក់នៅដល់ក្រុមម៉ូដែលនីមួយៗជូនចំនួន ៧បន្ទប់ ដោយបន្ទប់មួយ សំរាកបាន ២នាក់ ប៉ុន្តែបើក្រុមម៉ូដែលណាទៅលើសពីគោលការណ៍កំណត់ ការចំណាយជាបន្ទុកទទួលខុសត្រូវដោយខ្លួនឯង ។
   ៣-ចំពោះក្រុមម៉ូដែលណាដែលទៅលើសចំនួនកំណត់ ឬមានបងប្អូន និងឪពុកម្តាយរួមដំណើរទៅជាមួយក្រសួងជួយ សម្រួលនូវមធ្យោបាយធ្វើដំណើរ ការហូបចុក និងបែបបទចេញ-ចូលជូនដោយឥតគិតថ្លៃ ។
   ៤-ចំពោះការស្នាក់នៅរបស់ប្រតិភូទាំងអស់ ស្ថិតក្រោមការជួយសម្របសម្រួលដោយមន្ទីរទេសចរណ៍វៀតណាម ប្រចាំទីក្រុងហូជីមិញ ។ បញ្ហាដែលកើតឡើង គឺមកពីការមិនគោរពវិន័យខ្វះសីលធម៌ វិជ្ជាជីវៈ របស់បុគ្គល ០១រូប ឬអង្គភាព ម៉ូដែលមួយក្រុមនោះប៉ុណ្នោះដូចជា ៖
   -ពួកគាត់ទៅលើសចំនួនគោលការណ៍កំណត់របស់អង្គប្រជុំ ឬក៏មិនបានយកចិត្តទុកដាក់ចូលប្រជុំ ស្តាប់ការណែនាំ របស់ក្រសួង ។
   -តារាម៉ូដែល ០១រូប ឬ០២រូបនោះ បានខិតខំបំប៉ះបំបោរសិល្បករ សិល្បការិនីដទៃទៀតរៀបចំត្រឡប់ទៅផ្ទះវិញ បោះបង់ចោលការសម្តែង ដោយគាត់ជាអ្នកចេញសោហ៊ុយធ្វើដំណើរទៅភ្នំពេញវិញ តែគ្មានអ្នកណាធ្វើតាម ។
   -គាត់បង្កការអុកឡុក ជេរប្រមាថមន្ត្រីទទួលខុសត្រុវ និងស្ថាប័នសាធារណៈ ប្រើប្រាស់ពាក្យអសុរស ដែលមានភស្តុ តាង និងសាក្សីជាច្រើនដឹងឮ ។
   -គាត់បង្កំឱ្យក្រសួងចេញចំណោញស្នាក់នៅចំពោះអ្នកដែលលើសគោលការណ៍កំណត់ ។ បន្ទាប់ពីធ្វើការទំនាក់ទំនង ម្ចាស់សណ្ឋាគារ ក្រសួងបានរ៉ាប់រងចេញថវិកាចំពោះចំនួនលើសនោះ ដោយបានដោះស្រាយហើយតែគាត់នៅច្រណែននិន្ទា ឈ្នានីសទៀត រឿងសណ្ឋាគារតូចធំមិនចេះចប់សោះ ។
   -ប្រើពាក្យអសុរសនានាជាច្រើនទៀតមកលើមន្ត្រី និងស្ថាប័នសាធារណៈនៅទីកន្លែងសណ្ឋាគារក្នុងទីក្រុងហូជីមិញ ប្រទេសវៀតណាម ធ្វើឱ្យអាម៉ាស់មុខដល់ជាតិឯង និងបានដោយបង្ហោះតាមព័ត៌មានសង្គម (Facebook)ផងដែរ ។

ចំពោះក្រុមម៉ូដែល ០២ក្រុមផ្សេងទៀត ក្រុមសិល្បករ សិល្បការិនីរបស់ក្រសួងវប្បធម៌ និងវិចិត្រសិល្បៈ និងតារាចំ រៀង ព្រមទាំងពិធីករ ពិធីការិនី ពុំមានបញ្ហាអ្វីឡើយ ចំពោះការស្នាក់នៅដោយពួកគាត់អនុវត្តបានត្រឹមត្រូវតាមគោលការណ៍ កំណត់នៃស្មារតីអង្គប្រជុំរួម ហើយក្រុមម៉ូដែល ០១ក្រុមទៀត ដែលស្នាក់នៅសណ្ឋាគារជាមួយគ្នាក៏គ្មានការតវ៉ា រអ៊ូរទាំ ឡើយ ។ ចំណែកឯម៉ូដែល ១ក្រុមផ្សេងទៀត គាត់បានជួលបន្ទប់ថែម ១ទៀត និងទទួលខុសត្រូវលើការចំណាយដោយផ្ទាល់ ចំពោះការស្នាក់នៅសម្រាប់ក្រុមរបស់គាត់ដែលទៅលើសចំនួន នៃការកំណត់ ។

ចំពោះកម្រិតសណ្ឋាគារស្នាក់នៅរបស់ប្រតិភូគឺមានកម្រិតប្រហាក់ប្រហែលគ្នា ផ្កាយ០២ (ជាផ្ទះល្វែង)ដូចគ្នា គ្រាន់តែស្ថិតនៅទីតាំងខុសគ្នាប៉ុណ្ណោះ ដែលសម្របសម្រួលដោយមន្ទីរទេសចរណ៍ក្រុងហូជីមិញ រៀបចំជូនសំដៅបង្កលក្ខណៈ ងាយស្រួលក្នុងការដឹកជញ្ជូនជិតកន្លែងសម្តែង និងជិតទីផ្សារ ។
   -សណ្ឋាគារខ្លះមានទីតាំងស្ថិតនៅផ្លូវធំ
   -សណ្ឋាគារខ្លះមានទីតាំងស្ថិតនៅខាងក្នុងចូលតាមផ្លូវតូច
   -ខ្លួនខ្ញុំផ្ទាល់ និងក្រុមការងារថ្នាក់ដឹកនាំជារដ្ឋលេខាធិការ អគ្គនាយករង និងប្រធាននាយកដ្ឋាន ព្រមទាំងក្រុមអ្នក ចំអិនម្ហូប ក៏ស្នាក់នៅសណ្ឋាគារផ្ទះល្វែងកម្រិតផ្កាយ ០២ផងដែរ ។

ដូច្នេះការចុះផ្សាយព័ត៌មានលើទំព័រកាសែតនានា និងតាមបណ្តាញព័ត៌មានសង្គម Facebook របស់ក្រុមតារាម៉ូដែល មួយនោះចោទប្រកាន់ និងប្រមាថមកលើក្រសួងទេសចរណ៍ ដែលជាស្ថាប័នរដ្ឋ គឺជាកំហុសខុសឆ្គងយ៉ាងធ្ងន់ធ្ងរ មិនគោរព វិន័យខ្វះសីលធម៌វិជ្ជាជីវៈ ។ ផ្ទុយមកវិញ ក្រសួងទទួលបាននូវការកោតសរសើរ និងការដឹងគុណពីក្រុមសិល្បករ សិល្បការិនី នានា តាមរយៈការផ្ញើជាលិខិត និងបង្ហោះតាម Facebook ចំពោះការរៀបចំយ៉ាងល្អ និងការផ្តល់ឱកាសដល់ពួកគាត់បានទៅ ចូលរួមសម្តែងក្នុងព្រឹត្តិការណ៍អន្តរជាតិសំខាន់ៗបែបនេះលើឆាកអន្តរជាតិហើយពួកគាត់ក៏បានប្តេជ្ញាថា នឹងបន្តកិច្ចសហការល្អ បន្ថែមទៅមុខទៀតជាមួយក្រសួងក្នុងការចូលរួមឃោសនាផ្សព្វផ្សាយវិស័យទេសចរណ៍កម្ពុជាឱ្យកាន់តែទទួលបានជោគជ័យ ធំធេងថ្មីៗថែមទៀតទៅអនាគត ។

សរុបមកការទៅចូលរួមព្រឹត្តិការណ៍ទេសចរអន្តរជាតិនៅឆ្នាំ២០១៤ ឆ្នាំនេះ ក្រសួងទទួលបានការគាំទ្រកាន់តែខ្លាំង ឡើង ដែលធ្វើឱ្យក្រសួងមានលទ្ធភាពប្រមូលផ្តុំ ក្រុមសិល្បករ សិល្បការិនីជិត ២០០នាក់ ហើយបានពង្រីកសកម្មភាពឃោស នា និងផ្សព្វផ្សាយកាន់តែមានទំហំធំជាងឆ្នាំមុន ។ លទ្ធផលជារួម ក្រសួងបានទទួលការចូលរួមកោតសរសើរច្រើនកុះករ ពីសំណាក់ភ្ញៀវអន្តរជាតិនៃបណ្តាប្រទេសនានាលើពិភពលោក និងគណៈកម្មការរៀបចំពិព័រណ៍ ITE-HCMC 2014 ចំពោះ ការសម្តែងសិល្បៈដ៏ល្អអស្ចារ្យក្នុងរាត្រីកម្ពុជា និងការសម្តែងសិល្បៈជូនសាធារណជនវៀតណាម ព្រមទាំងការរៀបចំស្តង់ ពិព័រណ៍កម្ពុជាយ៉ាងល្អ ពោរពេញដោយភាពទាក់ទាញជាច្រើនចំពោះសក្តានុពលទេសចរណ៍នានារបស់កម្ពុជា ។ ជាពិសេស ភ្ញៀវអន្តរជាតិទាំងអស់បាននិយាយថា នឹងមកទស្សនា បណ្តាក់ទុនលើវិស័យទេសចរណ៍កម្ពុជានៅពេលខាងមុខនេះ ហើយ ពួកគាត់បានបញ្ជាញ់ការឆ្លើយតបចូលរួមព្រឹត្តិការណ៍ទេសចរណ៍អន្តរជាតិនៅកម្ពុជា PATA Travel Mart 2014 ដែលកម្ពុជា បានធ្វើជាម្ចាស់ផ្ទះរៀបចំព្រឹត្តិការណ៍នេះចាប់ពីថ្ងៃទី ១៦ ដល់ថ្ងៃទី ២០ ខែកញ្ញា ក្នុងឆ្នាំ២០១៤ នេះ ។

ចុងក្រោយ យោបល់របស់ខ្ញុំចំពោះការចុះផ្សាយព័ត៌មានលើទំព័រកាសែតមួយចំនួន និងផ្សព្វផ្សាយតាមបណ្តាញផ្សាយ ព័ត៌មានសង្គម Facebook របស់តារា១រូប ឬ០២រូបនោះ ដែលចោទប្រកាន់ចំពោះការរៀបចំរបស់ក្រសួង គឺជាទង្វើខ្វះសីល ធម៌ វិជ្ជាជីវៈ ព្រោះមិនគោរពវិន័យគោលការណ៍សម្រេចរបស់អង្គប្រជុំ បើសិនជាពួកគាត់មានសីលធម៌វិជ្ជាជីវៈត្រឹមត្រូវដូច ក្រុមសិល្បករ សិល្បការិនីផ្សេងៗដទៃជាច្រើនទៀត ព្រមទាំងមានមនសិការ តម្កល់ផលប្រយោជន៍ជាតិជាធំ និងមុខមាត់ ស្រុកទេស នោះគាត់ត្រូវមានការយោគយល់រង់ចាំជួបពិភាក្សាដោះស្រាយ កុំប្រកាន់ខ្លួនខ្ពស់ពេកហើយធ្វើការចោទប្រកាន់ មិនសមហេតុផល និងឈានទៅចុះផ្សាយព័ត៌មានធ្វើឱ្យសាធារណជនជាតិយល់ច្រឡំមកលើក្រសួងនោះ ខ្ញុំគិតថា ជាទង្វើខុស ឆ្គងដ៏ធ្ងន់ធ្ងរ ។ កន្លងមកក្រសួងបានរៀបចំចូលរួមព្រឹត្តិការណ៍ធំៗជាច្រើនលើឆាកអន្តរជាតិ ហើយទទួលបានជោគជ័យធំៗ ជាច្រើនពុំដែលមានបញ្ហាអ្វីឡើយ ព្រោះសមាជិក សមាជិការបស់ប្រតិភូយើងទាំងអស់មានការសាមគ្គីគ្នាបានល្អ សណ្តានចិត្ត យោគយល់ អធ្យាស្រ័យគ្នាខ្ពស់ ដើម្បីថែរក្សាមុខមាត់ប្រទេសជាតិ និងតម្កល់ផលប្រយោជន៍ជាតិជាធំ។ ដូច្នេះខ្ញុំគិតថា តារា ០១ ឬ០២រូប ក្នុងក្រុមម៉ូដែល១ក្រុមនោះ ដែលបានចុះផ្សាយចោទប្រកាន់មកលើក្រសួង ត្រូវធ្វើការដកពិសោធន៍ លះបង់ ទង្វើខុសឆ្គង ចេះរៀនសូត្ររស់នៅជាមួយសមូហភាពបង្កើនសណ្តានចិត្តយោគយល់ អធ្យាស្រ័យតំកល់ផលប្រយោជន៍ជាតិជា ធំ និងមុខមាត់មាតុភូមិរបស់ខ្លួន ។ បុគ្គលនោះ ឬអង្គភាពនោះត្រូវទទួលខុសត្រូវលើទង្វើខុសឆ្គងរបស់ខ្លួន ក្នុងការជេរ ប្រមាថស្ថាប័នសាធារណៈរបស់រាជរដ្ឋាភិបាល និងធ្វើការសុំទោសជាសាធារណៈចំពោះកំហុសឆ្គងរបស់ខ្លួន និងអង្គភាពរបស់ ខ្លួនកន្លងមក ។ ខ្ញុំគិតថា ក្នុងករណីចចេសរឹងរូស ក្នុងនាមជាស្ថាប័នសាធារណៈ ពិតជាពុំអាចទទួលនូវការជេរប្រមាថមើល ងាយបានឡើយ ។ លទ្ធភាពនៃការប្រើប្រាស់ផ្លូវច្បាប់ក្នុងនីតិវិធីតុលាការ គឺជាជម្រើសអាទិភាពតែមួយគត់ក្នុងការដាក់បន្ទុក ចំពោះបុគ្គល ឬអង្គភាពដែលជេរប្រមាថស្ថាប័នសាធារណៈ ៕