ព្រះសីហនុ ៖ ប្រហិតត្រីសមុទ្រដែលប្រើសារធាតុគីមី រួមមាន ហ្វកមុល ដែលគេហៅថាបារ៉ត សម្រាប់ដាក់លើសាកសពមិនឲ្យស្អុយរលូយនិងម្សៅ បូ រ៉ាក់ សម្រាប់ដាក់សាច់ត្រីឲ្យស្រស់ស្វិត របស់អ្នកស្រី ជា ផល្លា នៅតំបន់ទំនប់រលក សង្កាត់លេខ១ ក្រុងព្រះសីហនុ មានការរីកដុះដាលសម្បើមដៃណាស់ ទោះបីប្រជាពលរដ្ឋរិះគន់យ៉ាងណាក្តី ក៏ក្រសួងឧស្សាហកម្មនិងសិប្បកម្មធ្វើមិនដឹងមិនឮ ព្រមទាំងមានការគាំទ្រយ៉ាងពេញ ទំហឹងថែមទៀត ។ ប្រការនេះត្រូវបានរាស្ត្រសង្ស័យថា អាចផ្តើមចេញពីអំពើពុករលួយបង់ខែ ឬដាក់ភាគហ៊ុនណាមួយ រវាងថ្នាក់ដឹកនាំក្រសួងថ្មីមួយនេះ និងម្ចាស់សិប្បកម្មកែឆ្នៃប្រហិតត្រីសមុទ្រមួយនេះ ។
ក្រុមគ្រួពេទ្យខ្មែរ ដែលបានដឹងរឿងនេះបានសម្តែងការហួសចិត្ត ចំពោះការគាំទ្ររបស់ក្រសួងឧស្សាហកម្ម និងសិប្បកម្ម ដោយពួកគាត់លើកឡើងថា អ្នកចូលរួមប្រព្រឹត្តគេទទួលបានលាភសក្ការៈ តែផលប៉ះពាល់ដល់សុខភាពប្រជាពលរដ្ឋរាប់លាននាក់នៅក្នុងប្រទេស គឺជារឿងសោទនាតកម្មដ៏ធំមួយទៅអនាគត់។
គ្រូពេទ្យទាំងនោះសូមធ្វើការអំពាវនាវដល់ប្រជាពលរដ្ឋនៅទូទាំងព្រះរាជាណាចក្រកម្ពុជា ថា ប្រសិនបើអាចចៀសវាងមិនប្រើប្រាស់សាច់ប្រហិតរបស់អ្នកស្រី ជា ផល្លា ខាងលើនេះបានគួរតែចៀសវាងទៅ ព្រោះសារធាតុទាំងនេះ វាធ្វើឲ្យប៉ះពាល់ដល់សុខភាពកើតជំងឺមហារីកគ្រប់ប្រភេទ ក្នុងរយះពេលយូរអង្វែង។
លើសពីនេះក្រសួងឧស្សាហកម្មនិងសិប្បកម្មគប្បីមានមនសិការជួយការពារសុខភាពប្រជាពលរដ្ឋផង កុំការពារឈ្មួញប្រព្រឹត្តិអំពើខុសច្បាប់ម្នាក់នេះ ព្រោះតែផលប្រយោជន៍ពេក ៕
