អនុគណៈកម្មការត្រួតពិនិត្យវាសវែង និង វាយតំលៃសម្បទានដីសេដ្ឋកិច្ច ខេត្តព្រះសីហនុ ដឹកនាំដោយឯកឧត្តម ឈិត សុខុន អភិបាលខេត្ត និង ជាប្រធានអនុគណៈកម្មការត្រួតពិនិត្យ វាស់វែង និង វាយតំលៃសម្បទានដីសេដ្ឋកិច្ច ខេត្តព្រះសីហនុ ដោយមានវត្តមានចូលរួមពីតំណាង ស្ថាប័នពាក់ព័ន្ឋ និង អាជ្ញាធរដែនដី ក្រុង ស្រុក ក្នុងខេត្តព្រះសីហនុ កាលពីព្រឹកថ្ងៃទី ៣០ ខែ សីហា ឆ្នាំ ២០១៤ អញ្ជើញចុះពិនិត្យដោយផ្ទាល់ទៅដល់ទីតាំងដីសម្បទានឧទ្យានជាតិ ព្រះសីហនុ រាម ក្រុងស្រុកព្រៃនប់ ដែលរាជរដ្ឋាភិបាល បានវិនិយោគអភិវឌ្ឍន៏ជូនក្រុមហ៊ុនវិនិយោគ ទទួលសិទ្ឋិពីរាជរដ្ឋាភិបាលធ្វើការអភិវឌ្ឍន៏កន្លងមក ។ សកម្មភាពនេះក្រោយពីបានបញ្ចប់កិច្ចប្រជុំការងារ ជាមួយអាជ្ញាធរខេត្ត និង តំណាងក្រុមហ៊ុនវិនិយោគចំនួន ៩ ដើម្បីធ្វើការវាយតំលៃអំពីការអភិវឌ្ឍន៏ របស់ក្រុមហ៊ុននោះរួចមក ហើយជាក់ស្តែងទទួលបានលទ្ឋផលធ្វើការផ្ទៀងផ្ទាត់ ជាមួយនឹងកិច្ចសន្យាទាំងអស់រវាងរាជរដ្ឋាភិបាល និង ក្រុមហ៊ុនអំពីដំណើរការសកម្មភាពអភិវឌ្ឍន៏ថា តើមានដំណើរការទៅមុខ នៅទ្រឹង ឬ ក៏បោះបង់ចោលគំរោង ។
តាមរបាយការណ៏របស់អនុគណៈកម្មការ បានអោយបញ្ជាក់ថា ការចុះពិនិត្យផ្ទៀងផ្ទាត់ ការអនុវត្តគំរោងដល់ទីតាំងដីឧទ្យានជាតិ ព្រះសីហនុ រាម នៅខេត្តព្រះសីហនុ មានក្រុមហ៊ុនវិនិយោគចំនួន ៩ ក្រុមហ៊ុនដែលទទួលសិទ្ឋិពីរាជរដ្ឋាភិបាល គឺបានធ្វើសកម្មភាពចំនួន៣ក្រុមហ៊ុន បានធ្វើសកម្មភាពវិនិយោគពីវិស័យទេសចរណ៏លើផ្ទៃដីទំហំ ៣២៥៦.៥២៧៩ហត បានកសាងផ្លូវកៅស៊ូ និង ក្រាលគ្រួសក្រហម ហើយដាំបង្គោលភ្លើងតាមផ្លូវ គឺក្រុមហ៊ុនហិចៀធូរឺហ្សម ឌីវេឡុបមេន ខមភើឌី ទី២ ក្រុមហ៊ុនអេហ្វើហ្គ្រីន វិនិយោគលើវិស័យទេសចរណ៏ លើផ្ទៃដី ២៣៦១.៩៧៣ហត កំពង់ឈូសឆាយធ្វើផ្លូវទី៣ ក្រុមហ៊ុន ម៉ូហ៊ីបា អ៊ិនធើញ័វវីង ឌីវេឡុបមេន វិនិយោគលើវិស័យទឹកស្អាត លើផ្ទៃដី ៣០០ហត បានធ្វើទំនប់ និង ផ្លូវព័ន្ឋជុំវិញ និង ទ្វារទឹក ។ ហើយចំនួន ៦ក្រុមហ៊ុនទៀតមិនទាន់ដំណើរការអភិវឌ្ឍន៏ទេ ។
ឯកឧត្តម អភិបាលខេត្តព្រះសីហនុ មានប្រសាសន៏ណែនាំអោយក្រុមហ៊ុនទទួលខុសត្រូវយកចិត្តទុកដាក់ជំរុញដំណើរវិនិយោគ សាងសង់អោយបានឆាប់រហ័ស តាមគោលការណ៏កំណត់ហើយ ឯកឧត្តមអភិបាលខេត្ត ក៏បានអញ្ជើញចុះពិនិត្យមើលស្ថានភាព គំរោងអភិវឌ្ឍន៏របស់ក្រុមហ៊ុនដោយផ្ទាល់ផងដែរ ៕
