ជម្លោះដីធ្លី នៅខេត្តកោះកុង ដែលកើតទ្បើង ដោយសារតែក្រុមហ៊ុនរបស់មេឈ្មួញ លី យ៉ុងផាត់ និងក្រុមហ៊ុនចិនដែលប្រើអំណាចរំលោភយកដីធ្លីប្រជាពលរដ្ឋ បានក្លាយទៅជាវិបត្តិ យ៉ាងស្មុគស្មាញនៅក្នុងខេត្តនេះ។ ដោយហេតុថា កន្លងមក លោក ប៊ុន លើត ដែលជាអភិបាលខេត្ត មិនដែលយកចិត្តទុកដាក់ ជួយរកដំណោះស្រាយសមស្រប ជូនដល់ប្រជាពលរដ្ឋរងគ្រោះទេ ហើយតែងតែចេញមុខការពារផលប្រយោជន៍មេឈ្មួញ លី យ៉ុងផាត់ និងក្រុមហ៊ុនចិនដោយគ្មានសេចក្តីអៀនខ្មាស់ទាល់តែសោះ។ ប្រការនេះហើយដែលធ្វើឲ្យប្រជាពលរដ្ឋ ដែលមានជម្លោះដីធ្លីជាមួយមេឈ្មួញ លី យ៉ុងផាត់ និងក្រុមហ៊ុនចិននាំគ្នាទ្បើងតវ៉ាដល់មុខសាលាខេត្តជាបន្តបន្ទាប់។
ទាក់ទងនឹងបញ្ហានេះ កាលពីថ្ងៃទី៣១ ខែសីហា ឆ្នាំ២០១៤ អាជ្ញាធរខេត្តកោះកុង បានចុះទៅជួបប្រជាពលរដ្ឋប្រមាណ៣០០នាក់ ដែលមានជម្លោះដីធ្លី ជាមួយក្រុមហ៊ុនមេឈ្មួញ លី យ៉ុងផាត់ និងក្រុមហ៊ុនចិន ដើម្បីទទួលយកសំណើទាមទាររបស់ពួកគាត់ដាក់ឲ្យក្រសួងពាក់ព័ន្ធជួយ ដោះស្រាយ។ ប្រជាពលរដ្ឋដែលមានជម្លោះដីធ្លី ជាមួយក្រុមហ៊ុនចិននិងមេឈ្មួញ លី យ៉ុងផាត់ មាន៥ឃុំ គឺឃុំព្រែកខ្សាច់ ឃុំភ្ញីមាស ឃុំព្រែកស្មាច់ ឃុំតានូន និងឃុំថ្មស ស្រុកបុទុមសាគរ និងស្រុកគីរីសាគរ ខេត្តកោះកុង។
ប្រជាពលរដ្ឋរងគ្រោះ ដែលជួបជាមួយអភិបាលខេត្តនិងអភិបាលស្រុកទាំងពីរ បានបញ្ជាក់ថា ប្រសិនបើដំណោះស្រាយលើកនេះ នៅតែពុំមានប្រសិទ្ធភាពទៀត ពួកគាត់នឹងទ្បើងទៅតវ៉ាដល់ផ្ទះសម្តេច ហ៊ុន សែន នៅឯរាជធានីភ្នំពេញ តែម្តង។
ប្រជាពលរដ្ឋប្រមាណជិត១១៥០គ្រួសារ កំពុងរងគ្រោះ ដោយសារក្រុមហ៊ុនចិនឈ្មោះ យូញៀនឌីវីទ្បុបមិន និងក្រុមហ៊ុនអេសអ៊ីហ្សិត របស់មេឈ្មួញ លី យ៉ុងផាត់ រំលោភយកដីធ្លីធ្វើឲ្យពួកគាត់រងទុក្ខលំបាកយ៉ាងខ្លាំង។ ប្រជាពលរដ្ឋរងគ្រោះ បាននាំគ្នាតវ៉ាទាមទារឲ្យអាជ្ញាធរខេត្ត និងស្ថាប័នពាក់ព័ន្ធ ជួយរកដំណោះស្រាយជាយូរមកហើយ ប៉ុន្តែមន្ត្រីអាជ្ញាធរខេត្តនិងស្ថាប័នពាក់ព័ន្ធ មិនដែលយកចិត្តទុកដាក់ជួយដោះស្រាយទេ។ ទាល់តែប្រមុខរដ្ឋាភិបាល សម្តេច តេជោ ហ៊ុន សែន ស្រែកព្រមានខ្លាំងៗ កាលពីថ្ងៃទី១៨ ខែសីហា ឆ្នាំ២០១៤ ទើបអភិបាលខេត្តកោះកុង ធ្វើជារមាស់ជើងដើរទៅជួបប្រជាពលរដ្ឋរងគ្រោះជិត៣០០នាក់ ដែលនេះគឺជាល្បិចបិទបាំងភាពអាម៉ាស់របស់ខ្លួនតែប៉ុណ្ណោះ ៕
