លោក ឡាយ ម៉ារីវ៉ូ អគ្គនាយក T.C ថ្មី ទើបតែងតាំងថ្មីត្រូវបានមន្ត្រីនិយោជិតជាច្រើននាក់ ធ្វើការរិះគន់ជា បន្ត បន្ទាប់ ថា តើក្រសួងខ្វះមនុស្សដែលមានសមត្ថភាពដឹកនាំ ឬយ៉ាងណាបានជាលើកបន្តុបលោក ឡាយ ម៉ារីវ៉ូ ឱ្យធ្វើ ជាអគ្គនាយក T.C ជំនួសលោក កឹម វិក្រា ។
ការរិះគន់របស់មន្ត្រីនយោជិតខាងលើនេះ ចង់និយាយថា លោក គឺជាមន្ត្រីដែលពុំធ្លាប់មានបទពិសោធន៍ ផ្នែកទូរ គមនាគមន៍ឡើយ ពោលគឺគាត់គ្រាន់តែធ្លាប់មានប្រវត្តិជាសមាជិកទី ១ នៃបញ្ញត្តិករទូរគមនាគមន៍កម្ពុជា ប៉ុណ្ណោះ អញ្ចឹងហើយបានជាមានការតែងតាំង និងផ្ទេរភារកិច្ចមុខតំណែងអគ្គនាយក T.C ។ កន្លងទៅថ្មីៗនេះ បានធ្វើឱ្យ មន្ត្រីនិយោជិកមួយចំនួននាំគ្នាបើកភ្នែកធំៗ និងហួសចិត្តគ្រប់គ្នា មិននឹកស្មានថា មានរឿងដូច្នេះកើតឡើង នោះទេ ។
គេរង់ចាំមើលថា តើអគ្គនាយក T.C ថ្មី ឡាយ ម៉ារីវ៉ូ និងមានសមត្ថភាពដឹកនាំគ្រាន់បើជាងលោក ឡៅ សារឿន ហើយ និងលោក កឹម វិក្រា ដែលត្រូវបានដកចេញពីតំណែង ឬក៏យ៉ាងណា ?
មានមតិរិះគន់ទៀតថា លោក ឡាយ ម៉ារីវ៉ូ អាចមានសមត្ថភាពបង្កើនបក្ខពួក និងអាចប្រព្រឹត្តអំពើពុក រលួយខ្លាំង ជាងអ្នកកាន់តំណែងពីរនាក់មុនទើបធ្វើឱ្យលោក ប្រាក់ សុខុន មានការពេញចិត្តហើយក៏អាចថា ជាដៃជើងថ្មី របស់ លោករដ្ឋមន្ត្រី ទើបនឹងឡើងថ្មីនេះផងដែរ ។
គួររំលឹកឡើងវិញផងដែរ ពេលកន្លងទៅក្រុមកូដករនិយោជិករាប់រយនាក់ ដែលបំរើការងារនៅទូរគមនា គមន៍ កម្ពុជា បាននាំគ្នាធ្វើកូដកម្មតវ៉ាទាមទារឱ្យដកតំណែងលោក ឡៅ សារឿន និងមនុស្សមួយក្តាប់តូចរបស់គាត់ ដែល បាន រៀបជាប្រព័ន្ធប្រព្រឹត្តអំពើពុករលួយ បង្កើតគណៈកម្មការឱ្យសហការជាមួយក្រុមសវនកម្មឈ្មោះ KPMK ធ្វើ ការកែតម្រូវបញ្ជីសារពើភ័ណ្ឌដើម្បីលុបលាងអំពើពុករលួយរបស់បក្ខពួកខ្លួនជាដើម ។/
