ខេត្តកោះកុង ៖ ប្រធាននគរបាល អន្ដោប្រវេសន៍ ប្រចាំច្រកទ្វារអន្ដរជាតិចាំយាម ខេត្តកោះកុង ដែលទើបឡើង តំណែងថ្មី កំពុងរងនូវការរិះគន់ ពីក្រុមអ្នករកស៊ីដឹកជញ្ជូនទំនិញ និងការកោសរូស ទារលុយ ច្រើនហួសហេតុ ហើយក្នុងនោះលោក កៅ សារ៉ាណា បានយកមន្ត្រីដែលមានជំនាញកាប់ដាវ ឲ្យកាន់ការងារសំខាន់ៗ ដើម្បីប្រមូលសេដ្ឋកិច្ច ពីការហូរចូលទំនិញគេចពន្ធ ទំនិញខុសច្បាប់ និងការយកលុយ ពីអ្នកដំណើរឆ្លងដែន តាមរបៀបពុករលួយ យកទៅចែកគ្នាធ្វើមានធ្វើបាន យ៉ាងសុខស្រួលបំផុត។
អ្នករកស៊ីដឹកទំនិញ បានឲ្យដឹងថា ចាប់តាំងពីលោក កៅ សារ៉ាណា មកកាន់តំណែងជា មេប៉ុស្ដិ៍ច្រកទ្វារអន្ដរជាតិចាំយាម គាត់បានធ្វើការរិតបន្ដឹង ចំពោះការនាំទំនិញ ចេញ-ចូល របស់អាជីវករតូចតាច ក្រោមហេតុផលយកលុយថ្លៃបាយ តែធូររលុងចំពោះទំនិញគេចពន្ធ ដែលឈ្មួញនាំចូល តាមរថយន្ដធំៗ ទាំងថ្ងៃទាំងយប់ ព្រោះតែឈ្មួញធំៗទាំងអស់នោះ បង់លុយក្បាលរថយន្ដ ហើយបង់លុយចាំខែទៀតផង ។
កាលពីជំនាន់មេប៉ុស្ដិ៍មុន ទំនិញផ្លែឈើមួយរទេះ អ្នកនាំចូលត្រូវបង់លុយ ឱ្យជំនាញគយ ឈរមាត់ច្រកទ្វារ ៥ម៉ឺនរៀល កាំកុងត្រូល ១ម៉ឺនរៀល និងនគរបាល អន្ដោប្រវេសន៍ ១ ម៉ឺនរៀលទៀត គឺចប់អាចជញ្ជូនដាក់រថយន្ដ ដឹកចេញបានហើយ។ ប៉ុន្តែនៅពេលនេះ លោក កៅ សារ៉ាណា បានបង្កើតប៉ុស្ដិ៍មួយទៀត នៅចម្ងាយប្រមាណ ៦០០ម៉ែត្រពីច្រកទ្វារ រួចហើយទារលុយ ពីអ្នកដឹកផ្លែឈើមួយរទេះ ៣ម៉ឺនរៀលបន្ថែមទៀត ធ្វើឱ្យបន្ទុកចំណាយ របស់អាជីវករតូចតាច កាន់តែច្រើនឡើងៗ ព្រោះក្នុងមួយរថយន្ដតួរីស គឺអាច ផ្ទុកផ្លែឈើបាន ៣-៤ រទេះ ដូច្នេះគ្រាន់តែនៅមាត់ច្រកទ្វារមួយ ត្រូវបង់លុយអស់ ៩ម៉ឺនរៀលហើយនៅតាមផ្លូវ ត្រូវបង់លុយឱ្យគយ នគរបាលសេដ្ឋកិច្ច មន្ដ្រីអាវុធហត្ថ នគរបាលចរាចរណ៍ឈរជើង នៅតាមផ្លូវជាតិតាមខេត្ដ តាមស្រុកជាហូរហែ ទម្រាំដឹកទៅដល់ភ្នំពេញ ត្រូវចាយលុយមិនក្រោមពី ៤០ម៉ឺនរៀលឡើយ ។
អាជីវករតូចតាច ដែលរកស៊ីដឹកទំនិញ ឆ្លងកាត់ច្រកចាំយាម ពិតជាមានការត្អូញត្អែរ ពីការកោសរូសទារលុយ ដែលចាត់ចែងដោយលោក កៅ សារ៉ាណា ជាពិសេសអ្នកអូសរទេះដឹកផ្លែឈើ ត្រូវបង់លុយមួយរទេះ រហូតដល់ ៤ម៉ឺនរៀល ដោយកូនចៅរបស់ លោក កៅ សារ៉ាណា អះអាងថា យកលុយថ្លៃបាយ ។
គេចេះតែឆ្ងល់ថា ដោយគ្រាន់តែសុំលុយថ្លៃបាយ ហេតុអ្វីបានជាលោក កៅ សារ៉ាណា ចាត់តាំងបង្កើតប៉ុស្តិ៍ យកលុយ ដល់ទៅពីរកន្លែង មួយកន្លែង ១ម៉ឺនរៀល និងមួយកន្លែងទៀត ៣ម៉ឺនរៀល ខណៈដែលខាង កាំកុងត្រូល គេយកតែមួយកន្លែង ១ម៉ឺនរៀល នោះ ។ មានន័យថា លោក កៅ សារ៉ាណា កំពុងចាត់ចែង ឲ្យមានបណ្តាញ ប្រព្រឹត្តអំពើពុករលួយ ដែលថ្នាក់លើគួរពិនិត្យមើល ឡើងវិញផង៕
អ៊ួង វ៉ឹង
