ខេត្តព្រះសីហនុ ៖ សមត្ថកិច្ចកងរាជអាវុធហត្ថ ក្រុងព្រះសីហនុ ដឹកនាំដោយលោកវរៈសេនីយ៏ត្រី ហ៊ត សីហាមេបញ្ជាការមូលដ្ឋានអាវុធហត្ថ ក្រុងព្រះសីហនុ បានចុះបង្ក្រាបអ្នកជួញដូរគ្រឿងញៀនសកម្មម្នាក់ រួមនឹងវត្ថុតាងមួយចំនួន និង គ្រឿងញៀនផងដែរ ។
ករណីបង្ក្រាបនេះនៅចំណុចមុខផ្សារលើ ក្រុងព្រះសីហនុ ស្ថិតនៅក្រុម ៥ ភូមិ ១ សង្កាត់ ២ ក្រុងព្រះសីហនុ នៅវេលាម៉ោង ១១ និង ១០នាទីព្រឹកថ្ងៃទី ១៨ ខែ សីហា ឆ្នាំ ២០១៤ ។
លោកវរៈសេនីយ៏ត្រី ហ៊ត សីហាបានអោយដឹងថា មុនពេលឈានទៅដល់ការឃាត់ខ្លួន បុរសនេះកម្លាំងរបស់លោកបានដាក់កម្លាំងយកការបានល្អិតល្អន់ ដោយមានការចង្អុលបង្ហាញពី ឯកឧត្តមឧត្តមសេនីយ៏ត្រី ហេង ប៊ុនទី មេបញ្ជាការកងរាជអាវុធហត្ថ ខេត្តព្រះសីហនុ ទើបឈានដល់ការចាប់ខ្លួនជនសង្ស័យតែម្តង ហើយកម្លាំងរបស់លោកកំពង់បន្តស្រាវជ្រាវវែកមុខ រកមុខសញ្ញាពាក់ព័ន្ឋដើម្បីចាត់ខ្លួនមកផ្តន្ទាទោសតាមផ្លូវច្បាប់ផងដែរ។
លោកបន្តទៀតថា ជនសង្ស័យមានឈ្មោះ ស៊ី ដារ៉ា ភេទ ប្រុស អាយុ ៣២ឆ្នាំ មុខរបរ រត់ម៉ូតូឌុប ស្នាក់នៅក្រុមទី ០៨ ភូមិ ៣ សង្កាត់ ៣ ក្រុងព្រះសីហនុ ។ ក្នុងប្រតិបត្តិការណ៏នោះ រឹបអូសបានវត្ថុតាង គ្រឿងញៀនម្សៅស មួយកញ្ចប់ ទូរស័ព្ទដៃ ចំនួន២គ្រឿង ម៉ូតូធ្វើសកម្មភាពចែកចាយគ្រឿងញៀន ម៉ាកវេវ ពណ៌ ខ្មៅ ពាក់ស្លាកលេខ ព្រះសីហនុ 1A – 1650 ១គ្រឿងនិង ប្រាក់មួយចំនួនផងដែរ ។
បន្ទាប់ពីការឃាត់ខ្លួនជនសង្ស័យ និង វត្ថុតាងខាងលើរួចហើយ កម្លាំងរបស់លោកបានធ្វើរបាយការបញ្ជូនទៅ ការិយាល័យប្រឆាំងការជួញដូរគ្រឿងញៀន កងរាជអាវុធហត្ថ ខេត្តព្រះសីហនុ ដើម្បីកសាងសំណុំរឿងបញ្ជូនទៅសាលាដំបូង ខេត្តព្រះសីហនុ ចាត់ការតាមផ្លូវច្បាប់ ៕
