កាលពីព្រឹកថ្ងៃទី១៤ ខែសីហា ឆ្នាំ២០១៤ នៅមណ្ឌលបូរីកុមារកំព្រាខេត្តព្រះសីហនុ អង្គការកុមារអាស៊ីអាស្ពេកា ដោយមានការគាំទ្រពីក្រសួងសង្គមកិច្ចអតីតៈយុទ្ធជននិងយុវនិតិសម្បទា បានប្រារព្ធបើកការប្រកួតកីឡាបាល់ទាត់ប្រចាំឆ្នាំ២០១៤ កុមារអាស៊ីលើកទី១០ នៅខេត្តព្រះសីហនុ ។
យោងតាមរបាយការណ៍របស់គណៈកម្មការប្រកួតកីឡាបាល់ទាត់ក្របខ័ណ្ឌអង្គការកុមារអាស៊ីអោយដឹងថាកម្មវិធីនៃការចាប់ផ្តើមពីថ្ងៃទី១៤ ដល់ថ្ងៃទី១៦ ខែសីហា ឆ្នាំ២០១៤មណ្ឌលកុមារដែលបានបញ្ជូនកុមារជាកីឡាករមកចូលរួមការប្រកួតនេះនៅមណ្ឌលកុមារកំព្រាខេត្តព្រះសីហនុចំនួន៩ ខេត្តដោយរយៈពេលនេះចំពេលសាលារបស់កុមារកំពង់ស្ថិតក្នុងពេលវិស្សមកាលធំមណ្ឌលកុមារមកចូលរួមការប្រកួតមានមណ្ឌលជ័យជំនះ មណ្ឌលភ្នំពេញថ្មី មណ្ឌលកុមារកំព្រាខេត្តកំពង់ឆ្នាំង មណ្ឌលកុមារកំព្រាខេត្តពោធិសាត់ មជ្ឈមណ្ឌលកុមារកំព្រាខេត្តមណ្ឌលគិរី មណ្ឌលកុមារកំព្រាខេត្តប៉ៃលិន បូរីកុមារកំព្រាខេត្តព្រះសីហនុ មជ្ឈមណ្ឌលកុមារកំព្រាខេត្តកំពង់ធំ និងមជ្ឈមណ្ឌលកុមារកំព្រាខេត្តព្រៃរែង ។
ក្រុមទាំងនេះចែកចេញជាពីពូល មាន៤ក្រុម ក្រុមនីមួយៗមានកីឡាករចំនួន១០នាក់ដែលមានអាយុពី១៦ឆ្នាំចុះហើយកីឡាករសរុបចំនួន៩០នាក់ ក្របខ័ណ្ឌនៃការប្រកួតក្រុមនីមួយៗត្រូវប្រកួតវិលជុំក្នុងពូលរហូតចប់គ្រប់ក្រុម ក្នុងការប្រកួតមានរយៈពេល២៥នាទី សរុបការប្រកួតទាំងអស់មានរយៈពេល២០ប្រកួត។
លោក សេង សុវណ្ណ ប្រធានមន្ទីរសង្គមកិច្ចអតីតៈ យុទ្ធជននិងយុវនិតិសម្បទាខេត្តព្រះសីហនុ លោកស្រី និម គឹមឡាង អគ្គនាយិកាអង្គការកុមារអាស៊ីអាស្ពេកានិងឯកឧត្តម ហេង សំអាន អភិបាលរងខេត្តព្រះសីហនុដែលបានអញ្ជើញចូលរួមជាអធិបតីក្នុងពិធីនេះមានប្រសាសន៍ផ្តាំផ្ងើរអោយក្មួយៗជាកីឡាករទាំងអស់ធ្វើការប្រកួតក្នុងលក្ខណៈបច្ចេកទេសដោយយោគយល់អនុគ្រោះគ្នាចៀសវាងមានបញ្ហាព្រោះថាក្មួយៗទាំងអស់សុទ្ធតែជាកុមារដែលទទួលបានការឧបត្ថម្ភពីអង្គការកុមារអាស៊ីអាស្ពេកានិងក្រសួងសង្គមកិច្ចដូចគ្នា ឯកឧត្តមអភិបាលរងខេត្តព្រះសីហនុ ហេង សំអាន បានថ្លែងនូវការអប់អសាទចំពោះអង្គការកុមារអាស៊ីអាស្ពេកានិងក្រសួងសង្គមកិច្ចអតីតៈយុទ្ធជននិងយុវនិតិសម្បទាដែលបានរៀបចំការប្រកួតនេះនិងបានជូនពរចំពោះក្មួយជាកីឡាករទាំងអស់អោយទទួលបានជ័យជំនះរៀងៗខ្លួន ៕
