ក្រសួងកិច្ចការនារី សហការជាមួយមន្ទីរកិច្ចការនារី ខេត្តព្រះសីហនុ បានរៀបចំវគ្គបណ្តុះបណ្តាលមួយនៅខេត្តព្រះសីហនុ មានរយៈពេល ៤ ថ្ងៃ កាលពីព្រឹកថ្ងៃទី ១៨ ខែ សីហា ឆ្នាំ ២០១៤ ដើម្បីផ្សព្វផ្សាយច្បាប់ស្តីពីការទប់ស្កាត់អំពើហិង្សាក្នុងគ្រួសារ និង កិច្ចការពារជនរងគ្រោះត្រង់មាត្រា ១០ ចែងថា ក្នុងគោលដៅទប់ស្កាត់អំពើហិង្សា ក្នុងគ្រួសារ និង ការពារជនរងគ្រោះដល់មន្ត្រីក្រសួង កិច្ចការនារីបំរើការងារលើវិស័យ ដែលបញ្ញត្តិដោយច្បាប់នោះ ត្រូវបានទទួលនិតិសម្បទាជាមន្ត្រីនគរបាលយុត្តិធម៌ និង អាចធ្វើជាដើមបណ្តឹងជួសមុខអោយជនរងគ្រោះស្របតាមនីតិវិធីព្រហ្មទ័ណ្ឌ ជាធរមាន ។
វគ្គបណ្តុះបណ្តាលនេះមានប្រតិភូតំណាងមន្ទីរ អ្នកចួលរួមចំនួន ៨ខេត្ត ទទួលការបណ្តុះបណ្តាលនេះ គឺខេត្តព្រះសីហនុ ខេត្តកំពត កែប កោះកុង តាកែវ កំពង់ស្ពឺ កំពង់ឆ្នាំង និង ខេត្តកណ្តាល មានសិក្ខាកាមចំនួន ៤០នាក់ ។
លោកជំទាវ ប្រាក់ ច័ន្ទសុខា អភិបាលរងខេត្តព្រះសីហនុ និង លោកជំទាវ ស៊ីដេហ្វីន រដ្ឋលេខាធិការក្រសួងកិច្ចការនារី ដែលបានអញ្ជើញជាអធិបតីក្នុងពិធីនេះ មានប្រសាសន៏ថា ដើម្បីសំរេចបាននៅក្នុងច្បាប់ស្តីពី ការទប់ស្កាត់អំពើហិង្សាក្នុងគ្រួសារ ក្នុងគោលដៅទប់ស្កាត់ អំពើហិង្សា ក្នុងគ្រួសារ ក្រសួងកិច្ចការនារី ទាមទារអោយមានការប្តេជ្ញាចិត្ត និង ការខិតខំពីគ្រប់ផ្នែកពាក់ព័ន្ឋទាំងអស់ នៅថ្នាក់ជាតិ និង ថ្នាក់ក្រោមជាតិ លោកជំទាវរដ្ឋលេខាធិការក្រសួងកិច្ចការនារី មានប្រសាសន៏បញ្ជាក់ ។
ដោយយោងច្បាប់ និង ប្រកាសរបស់ក្រសួងភ្នាក់ងារនគរបាលយុត្តិធម៌ នៃក្រសួងកិច្ចការនារីត្រូវបានរៀបចំវគ្គបណ្តុះបណ្តាល ស្តីពីការពង្រឹងសមត្ថភាពដើម្បីអោយមន្ត្រីយល់ដឹង និង មានសមត្ថភាពក្នុងការបំពេញមុខងាររបស់ខ្លួន ដើម្បីអោយមន្ត្រីភ្នាក់ងារនគរបាលយុត្តិធម៌ ត្រូវរៀនមុខវិជ្ជាដល់មួយចំនួនដូចជា ក្រមព្រហ្មទណ្ឌ ក្រមនិតិវិធីព្រហ្មទណ្ឌ ច្បាប់ស្តីពី ស្ថានទម្ងន់ទោសនៃបទឧក្រិដ្ឋ ច្បាប់ស្តីពីទប់ស្កាត់អំពើហិង្សា ក្នុងគ្រួសារ ច្បាប់ស្តីពីការបង្ក្រាបអំពើជួញដូរមនុស្ស និង អំពើធ្វើអាជីវកម្មផ្លូវភេទជាដើម ។
នៅក្នុងប្រកាសស្តីពី ភារកិច្ចមន្ត្រីរាជការ នៃក្រសួងកិច្ចការនារី ដែលបានទទួលនីតិសម្បទា ជានគរបាលយុត្តិធម៌ ត្រង់ប្រការ ២ បានចែងពីភារកិច្ចរបស់នគរបាលយុត្តិធម៌ ឬ មុខងារជានគរបាលយុត្តិធម៌ ការពិនិត្យបទល្មើសរួមមាន ធ្វើជាដើមបណ្តឹងជួសមុខ អោយជនរងគ្រោះ ធ្វើរបាយការណ៏នឹងកំណត់ហេតុ ពិនិត្យ និង តាមដានលើវិធានការស្រាវជ្រាវបទល្មើស និង តាមដាននីតិវិធីតុលាការ សាលក្រមនិងការផ្តន្ទាទោស ៕
