សេចក្តីរាយការណ៍មួយបានឱ្យដឹងថា នៅស្រុកកំពង់ត្រាច មានមេឆ្នោតមួយកន្លែងជាប់ និងផ្លូវចូលផ្សារ កំពង់ត្រាច ពីខាងលិចផ្សារមានមេឆ្នោតមួយដ៏ធំដែលគេស្គាល់ថា មេឆ្នោតនោះឈ្មោះ ពូហ៊ ជាមេឆ្នោតដ៏ធំជាងគេ ហើយសមត្ថកិច្ចក៏ពុំហ៊ានបង្ក្រាបដែរ ។
ប្រភពមួយបានឱ្យដឹងមេឆ្នោតនៅស្រុកកំពង់ត្រាចមានច្រើនកន្លែង ហើយមេដែលធំជាងគេនៅផ្សារកំពង់ត្រាច គួរតែថ្នាក់លើចុះមកបង្ក្រាបម្តងហើយ កុំទុកឱ្យមេឆ្នោតទាំងនេះឡើងចាងទៀត ។
ប្រភពបន្តទៀតថា មេឆ្នោតនៅស្រុកកំពង់ត្រាច ត្រូវបង់លុយឱ្យលោកអធិការស្រុកក្នុងមួយខែៗមិនក្រោមពី ១លានេរៀលនោះទេ ក្នុងមេឆ្នោតមួយកន្លែង បើមេឆ្នោតនៅស្រុកកំពង់ត្រាចច្រើនយ៉ាងហ្នឹង ត្រូវលោកអធិការ ប្រមូលលុយក្នុងមួយខែៗបានរាប់ពាន់ដុល្លារ ។
លោក ប៊ុត ទុមនី អធិការស្រុកកំពង់ត្រាច ប្រព្រឹត្តអំពើពុករលួយ និងប្រឆាំងបទបញ្ជារបស់រាជរដ្ឋាភិបាលយ៉ាងខ្លាំង ចំពោះគោលនយោបាយភូមិ-ឃុំមានសុវត្ថិភាពទាំង ៩ចំណុច ដែលរាជរដ្ឋាភិបាលដាក់បញ្ជាឱ្យបង្ក្រាបល្បែងស៊ីសង តែលោកអធិការរូបនេះ បែរជាបើកឱ្យលេងល្បែងយ៉ាងពេញបន្ទុក ។ ហើយសព្វថ្ងៃនេះអធិការខំប្រឹងដុតធូបបួង សួងឱ្យឆាប់ដល់ខែ ដើម្បីប្រមូលលុយពីមេឆ្នោត ។
លោកអធិការបានប្រាប់អ្នកយកព័ត៌មានតាមទូរស័ព្ទថា ល្បែងស៊ីសងនេះ មិនពាក់ព័ន្ធជាមួយខ្ញុំទេ លោករង់ចាំតែ បញ្ជាពីលោកអភិបាលស្រុកដើម្បីចុះបង្ក្រាប ។ លោក អ៊ឹម ស៊ីណាត អភិបាលស្រុក ប្រាប់អ្នកយកព័ត៌មានយើង ពុំចង់ឱ្យមានទេ ល្បែងស៊ីសងវានៅតែលួចលេង ។
គួរបញ្ជាក់ផងដែរ ថា នៅស្រុកកំពង់ត្រាចគេដាក់ឈ្មោះថា ជាស្រុកសម្តេចល្បែងមិនដែលអស់លោកណាបង្ក្រាបម្តង សោះ ឬមួយអស់លោកទាំងនោះបានទទួលលាភសក្ការៈពីល្បែងដែរឬ ? ៕
