ខេត្តរតនគិរី ៖ មានរថយន្តច្នៃចំនួន១គ្រឿងរបស់ឈ្មួញឈើឈ្មោះ ធី នៅស្រុកអូរជុំ តែងតែត្រូវបានគេប្រទះឃើញធ្វើសកម្មភាពដឹកជញ្ជូនឈើប្រណិតចេញពីព្រៃ សហគមន៍ ឃុំកាឡៃទៅលក់បន្តឲ្យឈ្មួញយ៉ាងអនាធិបតេយ្យពុំដែលឃើញមាន ការបង្ក្រាបនិងទប់ស្កាត់ពីសមត្ថកិច្ចជំនាញរដ្ឋបាល ព្រៃឈើនោះទេ ខណៈមានសេក្តីរាយការណ៍ថា មេឈ្មួញឈ្មោះធីបានចំណាយប្រាក់បង់ទៅឲ្យសមត្ថកិច្ចពាក់ព័ន្ធ រួចរាល់ហើយនោះ។
មន្ត្រីសហគមន៍ភូមិកាឡៃបានលើកឡើងថា ខាងពួកលោកតែងតែធ្វើសេចក្តីរាយការណ៍ និងចុះទប់ស្កាត់ជាមួយប្រជាការពារភូមិនាពេលកន្លងមកនោះ តែឈ្មួញឈើឈ្មោះធីហាក់មានឥទ្ធិពលខ្លាំងណាស់ ទោះបីរាល់ពេលបទល្មើសឈើប្រណិតរបស់ឈ្មួញម្នាក់នេះបានធ្វើសកម្មភាព ទាំងកណ្តាលថ្ងៃចែសចេញពីព្រៃសហគមន៍ និងឆ្លងកាត់ព្រៃសហគមន៍ ហើយត្រូវបានពួកគាត់ធ្វើសេចក្តីរាយការណ៍ទៅថ្នាក់លើយ៉ាងណាក្តី ក៏ពុំឃើញអាជ្ញាធរថ្នាកលើនិងមន្ត្រីជំនាញរដ្ឋបាលព្រៃឈើណាម្នាក់ ធ្វើការចុះបង្ក្រាបនោះឡើយ។
មន្ត្រីសហគមន៍ដដែលបានបន្តថា ខណៈការធ្វើជំនួញឈើប្រណិតរបស់ឈ្មួញឈ្មោះធី មិនមានសមត្ថកិច្ចណាម្នាក់ធ្វើការបង្ក្រាប ទន្ទឹមនោះមេឈ្មួញឈ្មោះធីបានក្អើតខ្ទមសំដែងសំដីផ្គេនដល់ ពួកគាត់មន្ត្រីសហគមន៍ថា តើឲ្យសមត្ថកិច្ចណាម្នាក់មកចាប់ជំនួញឈើរបស់ខ្ញុំ ពីព្រោះខ្ញុំបានចំណាយបង់ឲ្យគ្រប់គ្នាអស់ហើយនោះ។
ជាមួយគ្នានេះ មន្ត្រីភូមិ២ ម្នាក់បានប្រាប់ថា មេឈ្មួញឈើឈ្មោះធីនេះគឺបានដាក់ពង្រាយកម្លាំង និងគូកនរបស់គេប្រដាប់ដោយម៉ាស៊ីនរណាយន្ត អារផ្គួលរលំឈើ ស្ថិតក្នុងចំណុចអូរតាង ក្នុងភូមិវ៉ងដែងភូមិកោះពាក្យ រួចហើយដឹកជញ្ជូនដោយគោយន្តកែច្នៃ១គ្រឿងរបស់ពួកគេឆ្លងកាត់ព្រៃ សហគមន៍ ឃុំកាឡៃ ឆ្ពោះបន្តទៅលក់បន្តឲ្យឈ្មួញបន្តទៀតនៅក្នុងស្រុកអូរជុំដែលមាន សមត្ថកិច្ចមួយចំនួនជាខ្នងបង្អែកជាអ្នកជួយសំរួលដល់ការជំនួញឈើ របស់ពួកគេទៀតផង។
ជុំវិញរឿងនេះមេឈ្មួញឈ្មោះធី មានទីលំនៅក្នុងស្រុកអូរជុំ អ្នកយកពត៌មានយើងមិនអាចសុំការបំភ្លឺជុំវិញបញ្ហានេះបានទេ ខណៈទូរស័ព្ទចូលតែពុំមានអ្នកលើកទទួលនោះ។
យ៉ាងណានៅព្រឹក ថ្ងៃទី៣០ ខែកក្កដា ឆ្នាំ២០១៤ នេះលោក គាំ សីហា នាយផ្នែករដ្ឋបាលព្រៃឈើស្រុកអូរជុំ វ៉ើនសៃ និងតាវែង ពុំអាចពន្យល់ជុំវិញពត៌មានខាងលើបានទេ ខណៈលោកបានឆ្លើយថាលោកកំពុងឡើងមករៀននៅភ្នំពេញ បើចង់ដឹងសួរទៅលោកផាន់ ភឺន នាយរងខណ្ឌទៅព្រោះលោកទទួលភារកិច្ចនៅទីនោះ តែលោកផាន់ ភឺន អ្នកយកពត៌មានយើងមិនអាចសុំការបំភ្លឺបានដែរព្រោះគ្មានលេខទូរស័ព្ទ ទំនាក់ទំនង ៕
