កោះកុង ៖ រថយន្តដឺកទំនិញគេចពន្ធមួយគ្រឿងដែលមានទម្ងន់រាប់តោននាំចូលតាមច្រកទ្វារអន្ដរជាតិចាំយាមដោយសារគយប្រចាំការនៅទីនោះបើកដៃឱ្យចូល ប៉ុន្តែត្រូវបានសាខាគយ និងរដ្ឋាករខេត្ដ ធ្វើការស្ទាក់ចាប់ នៅវេលាម៉ោង ១០,២០នាទី យប់ថ្ងៃទី ២៥ ខែកក្កដា ឆ្នាំ ២០១៤ ស្ថិតនៅតាមដងផ្លូវជាតិលេខ៤៨ ក្នុងភូមិ សាស្ដ្រ ភូមិដូង ឃុំតាតៃ ស្រុកកោះកុង ខេត្ដកោះកុង។
រថយន្ដដឹកទំនិញដ៏ធំនេះ ម៉ាក អ៊ីណូ ពាក់ស្លាកលេខ ភ្នំពេញ ៣អា-២០៦៩ ដែលរថយន្ដនេះបានដឹកសំបកកង់ម៉ូតូនិងសម្ភារមួយចំនួនទៀតបម្រុងដឹកឆ្ពោះទៅភ្នំពេញទាំងយប់ត្រូវសាខាគយខេត្ដធ្វើការស្ទាក់ចាប់ទាំងយប់ដើម្បីឆែកឆេរនិងត្រួតពិនិត្យទៅលើមុខទំនិញទាំងនោះ តែការឆែកឆេរនេះ ត្រូវបានធ្វើឡើង នៅវេលាម៉ោង ២,២០នាទី នៅមុខសាខាគយតែម្ដង តែការត្រួតពិនិត្យ លើមុខទំនិញនៅក្នុងរថយន្ដ ហាក់បីដូច ខុសពីប្រក្រតី គឺគ្រាន់តែឱ្យមន្ដ្រីគយ ៣ទៅ៤នាក់ទៅមើលខាងលើ និងបើកជញ្ជាំងរថយន្ដមើលតែប៉ុណ្ណោះ មិនរើមើលឱ្យអស់នោះទេ ត្រង់ចំណុចនេះហើយ ដែលត្រួតពិនិត្យខុសពីភាពប្រក្រតី ហើយមុខទំនិញ នៅក្នុងកេស ពុំបានបើកមើលទេ គឺស្រេចតែម្ចាស់ទំនិញថា ហើយគេឃើញមានមេការម្នាក់ រត់ការខ្វែងដៃខ្វែង ជើង ជាមួយមេគយសាខា ហើយការត្រួតពិនិត្យនេះ ត្រូវបានគ្របទៅវិញ នៅវេលាម៉ោង ៣,៤០នាទី ។
ប្រជាពលរដ្ធមួយចំនួនបាននិយាយថាទំនិញនេះប្រហែលមានខ្សែក្រាសហើយ បានជាលោកគយមិនរើ មើលបើជាអ្នកតូចតាចវិញប្រហែលរើចុះពីរថយន្តទាំងអស់ដើម្បីពិនិត្យមើលមុខទំនិញហើយ។មិនមែនលោកគយនាំគ្នាអង្គុយមើលទេ។ លោក នៅ វុទ្ធី អនុប្រធានសាខាគយ និងរដ្ឋាករ បាននិយាយឱ្យក្រុមអ្នកយកព័តមានថា ទំនិញខាង លើនេះជារបស់ក្រុមហ៊ុន ង៉ែត អ៊ឹម ហើយការត្រួតពិនិត្យនេះ យើងមើលទៅលើភាពជាក់ស្ដែង បើមិនមានការ បង់ពន្ធ គឺត្រូវតែបង់ពន្ធ។
សូមបញ្ជាក់ថា នៅក្នុងខេត្ដកោះកុងទំនិញគេចពន្ធចូលរាល់ថ្ងៃរាល់យប់ហើយម៉ូតូគេចពន្ធក៏ច្រើនណាស់ដែរគឺសឹង៩០ភាគរយហើយសុទ្ធតែម៉ូតូទំនើបៗស៊េរីថ្មីនេះមកពីអស់លោកគយមានការឃុបឃិតគ្នាជាមួយឈ្មួញ ទើបឈ្មួញទាំងនោះនាំចូលបាន។ ហើយគយម្នាក់ណា មិនមានរថយន្ដទំនើបជិះ លោកមើលទៅ អ្នកណាមិន ចង់ធ្វើជាមន្ដ្រីគយ៕
