ខេត្តបន្ទាយមានជ័យ ៖ អំពើពុករលួយ គាបជំរិត កេងប្រវ័ញ្ចញើសឈាម ប្រជាពលករខ្មែរក្រីក្រ នៅតែបន្តកើតមាន នៅច្រកអន្តរជាតិប៉ោយប៉ែត ក្រោមការគ្រប់គ្រងរបស់ លោក ស៊ុន សំអាត ជាអតីតមេពុករលួយនៅច្រកអន្តរជាតិដូង ដែលទាមទារឲ្យ នាយឧត្តមសេនីយ៍ សុខ ផល ជាអគ្គនាយក នៃអគ្គនាយកដ្ឋាន អន្តោប្រវេសន៍ ពិនិត្យមើលភាពអសកម្ម របស់មន្ត្រីនគរបាល អន្តោប្រវេសន៍ ប្រចាំច្រកអន្តរជាតិប៉ោយប៉តឡើងវិញផង។
សេចក្តីរាយការណ៍ពីប្រចាពលរដ្ឋ បានឲ្យដឹងថា ពេលនេះស្ថានភាព ហាក់ដូចជាធូរស្រាល គេសង្កេតឃើញពលករខ្មែរ កំពុងតែសម្រុកទៅធ្វើការ នៅប្រទេសថៃ តាមច្រកអន្តរជាតិប៉ោយប៉ត ដោយពលករទាំងនោះ ត្រូវបានមេខ្យល់សម្របសម្រួល រត់ការដើម្បីបានប័ណ្ណព្រំដែន ឬ Border Pass ដែលក្នុងប័ណ្ណមួយ ត្រូវចំណាយអស់ ១.០០០ បាត ឬស្មើនឹងជាង ១០ ម៉ឺនរៀល ខុសឆ្ងាយពីតម្លៃ ដែលកំណត់ ដោយក្រសួងមហាផ្ទៃ ជាអំពើពុករលួយដែលបានអនុវត្តន៍ នៅច្រកអន្តរជាតិប៉ោយប៉តជាយូរមកហើយ។
សេចក្ដីរាយការណ៍ បានឲ្យដឹងទៀតថា ពលរដ្ឋខ្មែររាប់ពាន់នាក់ ក្នុងមួយថ្ងៃៗ ខ្លះមានលិខិតឆ្លងដែន ហើយមួយចំនួនធំ គ្មានលិខិតឆ្លងដែន ត្រូវបង្ខំចិត្តចំណាយលុយ ដើម្បីធ្វើប័ណ្ណព្រំដែន ដែលមានតម្លៃខ្ពស់ ដើម្បីបានឆ្លងដែន ទៅរកការងារធ្វើ នៅប្រទេសថៃ។ ជាគោលការណ៍ តម្លៃប័ណ្ណព្រំដែន ដែលកំណត់ដោយ ក្រសួងមហាផ្ទៃ មានតម្លៃ ២០.០០០ រៀល ប៉ុន្តែជាធម្មតា មន្ត្រីនគរបាលអន្តោប្រវេសន៍ បានបង្ខំឲ្យពលករបង់លុយ ចាប់ពី ៣៥.០០០ រៀល ទៅ ៦៥.០០០ រៀល ហើយបើឲ្យពួកមេខ្យល់ ជួយសម្របសម្រួលរត់ការ គឺត្រូវចំណាយ ១.០០០ បាត ឬ ជាង ១០ម៉ឺនរៀល។
លោក ស៊ុន សំអាត នាយប៉ុស្តិ៍នគរបាល អន្តោប្រវេសន៍ ប្រចាំច្រកអន្តរជាតិប៉ោយប៉ែត បានរក្សាទុកយន្តការពុករលួយ ឲ្យកូនចៅរបស់គាត់ ប្រមូលលុយច្រកហោប៉ៅ មិនដែលខ្វល់ខ្វាយ ពីការកែទម្រង់អ្វីនោះទេ ហើយនៅច្រកអន្តរជាតិដូងនេះ ពេលថ្ងៃមានពលករឆ្លងដែន រាប់រយ រាប់ពាន់នាក់ ប៉ុន្តែនៅពេលយប់ មានសកម្មភាពដឹកជញ្ជូនទំនិញ គេចពន្ធនិងទំនិញខុសច្បាប់ ឆ្លងកាត់ព្រំដែន យ៉ាងអនាធិបតេយ្យ នាំឲ្យខាតបង់ចំណូលថវិកាជាតិ រាប់ពាន់លានរៀល ក្នុងមួយខែៗ។ យ៉ាងណាក៏ដោយ មន្ត្រីមួយចំនួន បានធ្លោយឲ្យដឹងថា លោក ស៊ុន សំអាត កំពុងតែយកបទពិសោធន៍ពុករលួយ មកអនុវត្តន៍ក្នុងការប្រមូលលុយ នៅច្រកអន្តរជាតិប៉ោយប៉ែត មិនចាញ់កាលនៅកាន់តំណែងជា មេច្រកដូងនោះទេ៕
