បន្ទាយមានជ័យ ៖ ក្នុងឱកាសខួបទី២១ឆ្នាំនៃថ្ងៃបង្កើតកងរាជអាវុធហត្ថ ព្រឹកថ្ងៃទី១៧ខែកក្កដាឆ្នាំ ២០១៤ នៅទីបញ្ជាការកងរាជអាវុធហត្ថខេត្តបន្ទាយមានជ័យថ្នាក់ដឹកនាំអាវុធខេត្តបន្ទាយមានជ័យបានធ្វើការជួបសំណេះសំណាលនិងចែកអំណោយដល់គ្រួសារអាវុធហត្ថពលីមរណះសោធននិវត្តន៍និងគ្រួសារជួបការលំបាកចំនួន៤៨នាក់។
លោក ឱ បូរិន្ទ មេបញ្ជាការកងរាជអាវុធហត្ថខេត្តបន្ទាយមានជ័យបានមានប្រសាសន៍ថាដោយមើលឃើញពីគុណបំណាច់និងការលះបង់ក្នុងបុព្វហេតុជាតិរបស់មន្ត្រីអាវុធហត្ថខេត្តបន្ទាយមានជ័យកាលពីពេលកន្លងមក និងយោងតាមអនុសាសន៍ដ៏ខ្ពង់ខ្ពស់របស់ឯកឧត្តមនាយឧត្តមសេនីយ៍ សៅ សុខា មេបញ្ជាការកងរាជអាវុធហត្ថលើផ្ទៃប្រទេសបានជំរុញអោយមានការយកចិត្តទុកដាក់ដល់គ្រួសារ និងមន្ត្រីអាវុធហត្ថដែលបានពលីមរណះ ១៥ នាក់សោធននិវត្តន៍ ១៦ នាក់និងគ្រួសារជួបការលំបាក ១៧ នាក់ ។
ថ្លែងក្នុងឱកាសនោះ លោកឱ បូរិន្ទ បានពាំនាំនូវប្រសាសន៍ផ្តាំផ្ញើសួរសុខទុក្ពីសំណាក់នាយឧត្តមសេនីយ៍ សៅ សុខា មេបញ្ជាការកងរាជអាវុធលើផ្ទៃប្រទេស ដែលជានិច្ចជាកាលលោកតែងបានគិតគូ ពីសុខទុក្ខក្នុងការរស់នៅរបស់មន្ត្រីក្រោមឱវាទទាំងអស់ ។ លោកថ្លែងទៀតថា មន្ត្រីអាវុធហត្ថ គឺជាគ្រួសារតែមួយ ជាគ្រួសារដែលចេះជួយយកអាសារគ្នាទៅវិញទៅ មកនៅគ្រប់កាលះទេសះ ពិសេសគឺគ្មានគ្រួសារ មន្ត្រីអាវុធហត្ថណាមួយត្រូវស្លាប់ដោយដាច់បាយនោះទេ ហើយក៏គ្មានគ្រួសារមន្ត្រីអាវុធហត្ថណាមួយដែលឈឺគ្មានថ្នាំព្យបាលនោះដែរ ។
បន្ទាប់មកលោកក៏ធ្វើការផ្តល់អំណោយដែលបានមកពីការចូលរួមរបស់នាយ នាយរង ពលអាវុធហត្ថ ទាំងអស់ជួនដល់គ្រួសារអាវុធហត្ថពលីមរណះ ១៥នាក់សោធននិវត្តន៍១៦ នាក់និងគ្រួសារជួបការ លំបាក១៧ នាក់ដែលម្នាក់ៗ ទទួលបាន អង្ករ ២៥គីឡូក្រាម, មី ១កេស, ត្រីខ ៥កំប៉ុង, ទឹកត្រី ១យួ, ទឹកសុីអុីវ ១យួ, កន្ទេល១មុង១ សារុង១ ក្រម៉ា១ស្បែកជើងផ្ទាត់ ១ គូធុងជ័រ ដាក់ទឹកចំណុះ៤៨លីត្រ១និងថវិកា១សែនរៀល ។
ជាមួយនោះ លោកមេបញ្ជាការបានធ្វើការឧបត្ថម្ភបន្ថែម លើគ្រួសារអាវុធហត្ថដែលនៅឆ្ងាយក្នុងម្នាក់ៗ ៥ ម៉ឺនទៀត ៕
