ព្រះសីហនុ ៖ បន្ទាប់ពីស្ថានទូតអាមេរិកចេញសេចក្តីជូនដំណឹងដល់ពលរដ្ឋខ្លួនទៅលេងឆ្នេរអូរឈើទាលខេត្តព្រះសីហនុមក នៅយប់ថ្ងៃទី ១៧ ខែ មិថុនា វេលាម៉ោង ១២ អធ្រាត ឯកឧត្តម ឈិត សុខុន អភិបាលនៃគណៈអភិបាលខេត្តព្រះសីហនុ ដឹកនាំជំនាញពាក់ព័ន្ធចុះធ្វើរដ្ឋបាលចំហ ដែលមានការចូលរួម លោក ឧត្តម សេនីយ៍ត្រី សៀង កុសល ស្នងការនគរបាល លោកឧត្តមសេនីយ៍ត្រី ហេង ប៊ុនទី មេបញ្ជាការ កងរាជអាវុធហត្ថខេត្តព្រះសីហនុ ឯកឧត្តម ជិន សារិនអភិបាលក្រុងព្រះសីហនុ និង មន្ត្រីជំនាញពាក់ព័ន្ធមួយចំនួនទៀត ចុះត្រួតពិនិត្យ តំបន់ឆ្នេសមុទ្រអូឈើទាលក្រុងព្រះសីហនុដែលជាបេះដូងវិសយ័ទេសចរណ៍សម្រាប់ទីក្រុងមួយនេះ ពីមួយថ្ងៃទៅមួយថ្ងៃមានស្ថានភាពកាន់តែអាក្រក់ឡើងៗនិងបង្កអសន្តិសុខគ្រប់បែបយ៉ាងដោយសារតែអំពើប្លន់ ឆក់ លក់ថ្នាំញៀនស្រីបេស្យាចារគ្រប់ប្រភេទរៀងរាល់យប់ថ្ងៃធ្វើឲ្យបាត់បង់ទ្រព្យសម្បត្តិភ្ញៀវជាតិនិងអន្តរជាតិរាប់មិនអស់ ដែលមានការិះគន់ដល់អាជ្ញាធរខេត្តទៀតផង។
នៅពេលថ្មីៗកន្លងទៅនេះស្ថានទូតអាមេរិចប្រចាំកម្ពុជាបានចេញនូវសេចក្តីជូនដំណឹងមួយដល់ពលរដ្ឋសហរដ្ឋអាមេរិចដោយមានការហាមប្រាមមិនឲ្យជនជាតិរបស់ខ្លួនចូលមកកំសាន្តនៅតំបន់ឆ្នេសមុទ្រអូឈើទាលក្រុងព្រះសីហនុជាពិសេសពេលយប់ទៀតផង។ដោយក្នុងសេចក្តីជូនដំណឹងមួយនោះបានលើកឡើងភាពមិនប្រក្រតីនៃបទល្មើសមួយចំនួនដូចជាករណីវាយប្លន់ ឆក់ លួច និងប្រើប្រាស់ថ្នាំញៀនដែលកំពុងកើតមានយ៉ាងអនាធិបតេយ្យនៅក្នុងតំបន់ឆ្នេរសមុទ្រ ក្រុងព្រះសីហនុ និងបានធ្វើឲ្យមានការប៉ះពាល់ដល់ពលរដ្ឋអាមេរិចមួយចំនួនកន្លងទៅថ្មីៗនេះផងដែរ ។
ពាក់ពន្ធ័នឹងករណីរិះគន់ខាងលើនេះមន្ត្រីប៉ូលីសនៃស្នងការនគរបាលខេត្តព្រះសីហនុម្នាក់សុំមិនប្រាប់ឈ្មោះបានឲ្យដឹងថា ពុំមានការពិតដូចការរិះគន់នោះទេ ព្រោះបទល្មើស នីមួយៗស្នងការដ្ឋានតែងទទួលពត៌មាននិងរបាយការណ៍គ្រប់គ្រាន់សម្រាប់បង្កាបង្ក្រាបបទល្មើសដោយមិនអាចលាក់លៀមជាមួយថ្នាក់លើបានទេ ជាពិសេសបណ្តាញពត៌មានតែម្តង ក៏មិនអាចលាក់បានដែរ ។
មន្ត្រីនគរបាលរូបនោះបានថ្លែងបន្តថា បទល្មើសលួច ឆក់ និងប្រើប្រាស់ថ្នាំញៀនអាចកើតមានខ្លះៗដែរ មិនមែនល្អមួយរយភាគរយនោះទេ តែបច្ចុប្បន្នគណះបញ្ជាការឯកភាពខេត្តកំពុង រិះរកវិធីចាត់ការដោយសារតែ ជនសង្សយ័នៃបទល្មើសឆក់លួចទាំងនោះជាអនីតិជន ។ ទោះជាយ៉ាងនេះ ក្តីអ្នកក្រុងព្រះសីហនុបានលើកឡើងថា បទល្មើសពិតជាកើតមានច្រើនប្រាកដមែន ដោយសារតែទីក្រុងព្រះសីហនុកើតមានល្បែងស៊ីសង ពាលាអាវ៉ាសែគ្រប់ប្រភេទនៅទីនេះ ។
ជាក់ស្តែង កាលពីព្រលប់ថ្ងៃទី១៦ ខែកក្កដា ឆ្នាំ២០១៤ នេះ ក៏មានបទល្មើសប្លន់ម៉ូតូសេរីថ្មី មួយនៅតាមតំបន់ឆ្នេអូរឈើទាលនេះដែរ ខណៈពេលដែលសមត្ថកិច្ចចម្រុះដឹកនាំដោយលោកអភិបាលក្រុងព្រះសីហនុនិងស្នងការនគរបាលខេត្តព្រះសីហនុដើរត្រួតពិនិត្យស្ថាន ភាពតាមតំបន់ឆ្នេរ នៅវេលាពាក់កណ្តាលអាធ្រាតថ្ងៃដដែលនេះ ៕
ភ្នំព្រឹក
