ភ្នំពេញ ៖ លោក អ៊ុំ វណ្ណា បានក្លាយជា មន្ត្រីផ្ការីកគ្រប់រដូវ មានអំណាចពង្រាយកូនចៅឲ្យដាក់ប៉ុស្តិ៍ជជុះ ប្រមូលលុយ ពីឈ្មួញរកស៊ី ដឹកជញ្ជូនឈើខុសច្បាប់ ហើយលោក អ៊ុំ វណ្ណា ក៏បានធ្វើជាបង្អែក ឲ្យមេឈ្មួញ លឹម ប៊ុណ្ណា ហៅខ្នា ក្នុងការដឹកជញ្ជូនឈើ ចេញទៅប្រទេសវៀតណាមល្បីពេញភូមិភាគឥសាន្តផងដែរ។
មន្ត្រីមួយចំនួន បានបង្ហើបឲ្យដឹងថា លោក អ៊ុំ វណ្ណា ជាមន្ត្រីប៉ូលិសសេដ្ឋកិច្ចមុខខ្លាញ់ពោរពេញដោយឥទ្ធិពលអំណាច អត់ដែលផ្លាស់ប្តូរទៅណាទេ គឺក្តោបក្តាប់ការងារបង្ក្រាបបទល្មើសព្រៃឈើ ចំនួន ៤ខេត្ត ឡើងដុះស្លែទៅហើយ។ មន្ត្រីជាច្រើនត្រូវបានផ្លាស់ប្តូរទៅតាមអាណត្តិ នៃលិខិតបេសកកម្ម បើទោះបីជាមន្ត្រីទាំងនោះ មានស្នាដៃល្អ បែបណាក៏ដោយ ។
រាជធានីភ្នំពេញ ៖ ក៏ប៉ុន្តែលោក អ៊ុំ វណ្ណា ជាប្រធានប្រតិបត្តិនគរបាល ប្រឆាំងបទល្មើសសេដ្ឋកិច្ច ក្រសួងមហាផ្ទៃ ក្តោបក្តាប់ការងារបង្ក្រាប បទល្មើសព្រៃឈើ ចំនួន ៤ខេត្ត រួមមានរាជធានីភ្នំពេញ កំពង់ធំ ក្រចេះ និងខេត្ដកណ្ដាលមានអំណាចខ្លាំងប៉ុណ្ណានោះទេ បានជាគាត់អាចចាត់តាំងខ្សែបណ្ដាញ ឱ្យឃុបឃិតជាមួយ ក្រុមឈ្មួញរកស៊ី ដឹកជញ្ជូនឈើខុសច្បាប់ យ៉ាងសុខស្រួល ហើយលោក អ្កំវណ្ណា បានតាំងខ្លួនជាដៃស្ដាំ ប្រមូលប្រភពសេដ្ឋកិច្ច ឱ្យទៅមេធំៗ តាមរយៈការប្រើប្រាស់លិខិតបញ្ជាបេសកកម្ម របស់លោក នេត សាវឿន បង្ខំឱ្យក្រុមឈ្មួញ បង់លុយតាមរបៀបពុករលួយមិនដែលខ្វល់ ពីការកែទម្រង់អ្វីទេ។
ការជម្រិតទារប្រាក់ពីឈ្មួញរកស៊ីដឹកទំនិញគ្រប់ប្រភេទបានធ្វើឲ្យលោក អ៊ុំ វណ្ណា ក្លាយទៅជាអ្នកមាន ទ្រព្យសម្បត្តិស្ដុកស្ដម្ភ ដែលត្រឹមឧកញ៉ាល្មមៗ មិនមានទ្រព្យសម្បត្តិស្មើ ឬប្រហាក់ប្រហែល លោក អ៊ុំ វណ្ណាដ៍អស្ចារ្យនោះទេ ។ ជាក់ស្ដែងលោក អ៊ុំ វណ្ណា បានសាងសង់ភូមិគ្រឹះ យ៉ាងស្កឹមស្កៃមួយ នៅជាប់នឹងមាត់ទន្លេ ក្រោយវត្តវាលស្បូវ ក្នុងសង្កាត់វាលស្បូវ ខណ្ឌមានជ័យ រាជធានីភ្នំពេញ ដែលមួយផ្នែកធំ នៃគ្រឿងសំណង់ និងគ្រឿងសង្ហារឹម នៅក្នុងភូមិគ្រឹះនោះ សុទ្ធតែធ្វើឡើងពី ប្រភេទឈើប្រណីតៗ ដ៍មានតម្លៃលំដាប់សេដ្ឋី មានតម្លៃខ្ទង់លានដុល្លារឯណោះ ។
ការប្រគល់អំណាចឲ្យលោក អ៊ុំ វណ្ណា ក្ដោបក្ដាប់ការងារផ្ដាច់មុខ បង្ក្រាបបទល្មើសព្រៃឈើ ៤ខេត្ត តែម្នាក់ឯងបែបនេះ បានធ្វើឲ្យមន្ត្រីដែលបានដឹងរឿងនោះ នាំគ្នារិះគន់យ៉ាងចាស់ដៃថា មិនគួរថ្នាក់ដឹកនាំ ក្រសួងមហាផ្ទៃ និងអគ្គស្នងការ នគរបាលជាតិ ឲ្យតម្លៃតែលើលោក អ៊ុំ វណ្ណា ហាក់បីដូចជាបំភ្លេចចោល ឬមិនឲ្យតម្លៃចំពោះ មន្ត្រីៗប៉ូលិសសេដ្ឋកិច្ច ដទៃទៀតដែលនៅគរជើងលើគ្នា និងមានអ្នកខ្លះ គ្មានការងារអ្វីធ្វើ ឬអង្គុយតែអានកាសែតនៅកន្លែង រាល់ថ្ងៃនោះទេ។ រឿងសំខាន់នោះ ប៉ូលីសសេដ្ឋកិច្ច ក្រោមបញ្ជារបស់លោក អ៊ុំ វណ្ណាតែងតែបានយកតួនាទីរបស់ខ្លួន ទៅប្រព្រឹត្តអំពើពុករលួយ ជាមួយពួកឈ្មួញ ច្រើនជាងការបង្ក្រាបទប់ស្កាត់ បទល្មើសព្រៃឈើ ៕
