លោកឧកញ៉ា តាំង ផេងប៉ោ ប្រើអំណាចបិទផ្លូវសាធារណៈ និងបញ្ជាឲ្យកូនចៅបាញ់សម្លាប់សារព័ត៌មានតាំងកណ្តាលថ្ងៃ កាលពីវេលាម៉ោង១២និង៣០នាទី ថ្ងៃទី១២ ខែកក្កដា ឆ្នាំ២០១៤ នៅចំណុចភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ បើទោះពីជាលោកឧកញ៉ា តាំង ផេងប៉ោបានចេញមុខច្រានចោលព័ត៌មាន ទាំងនេះក៏ដោយ។
នៅពេលអ្នកសារព័ត៌មានចុះយកព័ត៌មាន និងថតយករូបភាពករណីជម្លោះនេះ ត្រូវបានលោកឧកញ៉ា តាំង ផេងប៉ោ ធ្វើការហាមឃាត់ ប៉ុន្តែអ្នកទាំង២នាក់នៅតែបន្តធ្វើសកម្មភាពយកព័ត៌មាន និងផ្តិតយករូបភាពដដែល ជាហេតុធ្វើឲ្យលោកឧកញ៉ា តាំង ផេងប៉ោ ខឹងសម្បា ក៏ បញ្ជាឲ្យអង្គរក្សរបស់ខ្លួនបាញ់សម្លាប់អ្នកសារព័ត៌មានទាំង២នាក់នោះ ។ ក្រោយទទួលបាន ការបញ្ជាភ្លាមៗ អង្គរក្សលោកឧកញ៉ា តាំង ផេងប៉ោ មិនទាន់បានបាញ់ទៅលើអ្នកកាសែតទាំង ២នាក់នោះទេ គឺគ្រាន់តែស្ទុះទៅប្រតាយប្រតប់ដណ្តើមយកម៉ាស៊ីនថតរបស់អ្នកសារព័ត៌មាន។
លោកឧកញ៉ា តាំង ផេងប៉ោ បានបដិសេធថា ការបិទផ្លូវនោះគាត់គ្រាន់តែយកលូដាក់មួយចំហៀងផ្លូវដើម្បីកុំឲ្យក្រុមឡានដឹកដីបើកឆ្លងកាត់ទីនោះតែប៉ុណ្ណោះ ។ ចំណែករឿងបញ្ជាឲ្យបាញ់សម្លាប់អ្នកកាសែតនោះគឺជារឿងយល់ច្រឡំ ហើយលោកថែមទាំងបាននិយាយថា រឿងរ៉ាវទាំងអស់នេះគឺជាការចោទប្រកាន់ដោយគ្មានមូលដ្ឋាន។
មជ្ឈដ្ឋានជាច្រើនបានលើកឡើងថា អ្វីដែលលោកឧកញ៉ា តាំង ផេងប៉ោ បានចេញមុខច្រានចោលព័ត៌មានទាំងនេះ គឺគ្រាន់តែជាលេសដើម្បីដោះសារយករួចខ្លួនតែប៉ុណ្ណោះ ។ ដោយបញ្ហាទាំងនេះទាមទារឲ្យមានការបំភ្លឺពីការស៊ើបអង្កេតស្រាវជ្រាវពីសមត្ថកិច្ចមូលដ្ឋាន៕
សូមរំលឹកផងដែរថាកាលពីវេលាម៉ោង១២និង៣០នាទីថ្ងៃទី១២ ខែកក្កដា ឆ្នាំ២០១៤ នៅចំណុចភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ មានរឿងវិវាទគ្នាកើតឡើងរវាងលោកឧកញ៉ា តាំង ផេងប៉ោ និងឈ្មោះ លោក គឹម ហេង ពេលនោះលោកឧកញ៉ា តាំង ផេងប៉ោ បានយកលូមកដាក់ទន្ទឹងផ្លូវ បង្កឲ្យមានការកកស្ទះចរាចរណ៍ ។ ភ្លាមៗនោះក៏មានអ្នកសារព័ត៌មានពីរូបបានចុះទៅយកព័ត៌មាននិងផ្តិតរូបភាពពីកន្លែងហេតុ ដោយអ្នកទាំងពីរនោះទី១មានឈ្មោះ សន សុផល ជាភ្នាក់ងារយកព័ត៌មានឲ្យគេហទំព័រ CEN និងម្នាក់ទៀតឈ្មោះ ប្រាក់ ដារាវុទ្ធី ជាអ្នកយកព័ត៌មានឲ្យទូរទស្សន៍បាយ័ន ៕
