ខេត្តព្រះសីហនុ ៖ ជនសង្ស័យប្រុសស្រី ចំនួន ២នាក់ ត្រូវបានសមត្ថកិច្ចនគរបាល ការិយាល័យ ប្រឆាំងការជួញដូរគ្រឿងញៀន នៃស្នងការដ្ឋាននគរបាល ខេត្តព្រះសីហនុ ចុះឃាត់ខ្លួននៅចំណុចពីរផ្សេងគ្នា រួមនឹងវត្ថុតាងគ្រឿងញៀនមួយចំនួនផងដែរ ។
លោកវរៈសេនីយ៏ត្រី តាក សារិទ្ឋ ប្រធានការិយាល័យប្រឆាំងបទល្មើសគ្រឿងញៀន នៃស្នងការដ្ឋាននគរបាលខេត្តព្រះសីហនុ បានអោយដឹងថា ក្នុងកិច្ចប្រតិបត្តិការ ចុះបង្ក្រាបបទល្មើសគ្រឿងញៀនខាងលើនេះ ដឹកនាំដោយលោក ហួត វិចិត្រ ព្រះរាជអាជ្ញារង នៃសាលាដំបូង ខេត្តព្រះសីហនុ សហការជាមួយកម្លាំងការិយាល័យរបស់លោក បានឈានទៅឃាត់ខ្លួន បានមនុស្ស ២នាក់ ពាក់ព័ន្ឋការលក់ និង ចែកចាយគ្រឿងញៀន ដែលករណីទី១ នៅវេលាម៉ោង ២១ និង១០នាទីយប់ ថ្ងៃទី ០៨ ខែ កក្កដា ឆ្នាំ ២០១៤ នៅចំណុចម្តុំ ពេទ្យចំការចេក ក្រុម ៦ ភូមិ ៤ សង្កាត់ ៤ ក្រុង-ខេត្តព្រះសីហនុ ឃាត់ខ្លួនបានជនសង្ស័យម្នាក់ ឈ្មោះ នួន សុខថាន ភេទ ប្រុស អាយុ ២៧ឆ្នាំ មុខរបរ មិនពិតប្រាកដ មានស្រុកកំណើត ភូមិព្រែកត្នោត ឃុំកំពង់ក្រែង ស្រុកកំពត ខេត្តកំពត និងមានទីលំនៅបច្ចុប្បន្ន អូរ ២ ភូមិ ៤ សង្កាត់ ៤ ក្រុង-ខេត្តព្រះសីហនុ រួមនឹងវត្ថុតាងមាន ថ្នាំញៀន មេតំហ្វេតាមីន ចំនួន ៤កញ្ចប់តូច ស្មើនឹង ៦ក្រាម និង ទូរស័ព្ទដៃចំនួន ១គ្រឿងផងដែរ ។ ករណីទី២ នៅចំណុចផ្ទះជួលម្តុំខារ៉ាអូខេ ៣៣៣ ស្ថិតក្នុងក្រុម ២ ភូមិ ៤ សង្កាត់ ៤ ក្រុង-ខេត្តព្រះសីហនុ កាលពីវេលាម៉ោង ២២ និង ៣០នាទីយប់ ថ្ងៃដដែល ឃាត់ខ្លួនបានស្ត្រីម្នាក់ទៀតឈ្មោះ សឿ ស្រីណាង អាយុ ២៧ឆ្នាំ មុខរបរ មេផ្ទះ មានស្រុកកំណើត ភូមិព្រៃកម្បាស ឃុំស្លា ខេត្តតាកែវ និង ទីលំនៅបច្ចុប្បន្ន កន្លែងកើតហេតុខាងលើ ។
លោកវរៈសេនីយ៏ត្រី តាក សារិទ្ឋបានអោយដឹងទៀតថា ក្រោយពេលឃាត់ខ្លួនសមត្ថកិច្ច ឆែកឆេរលើខ្លួនស្ត្រីរូបនោះ ពុំឃើញមានវត្ថុតាងអ្វីនោះទេ ប៉ុន្តែក្រោយសាកសួរ ឃើញថាស្ត្រីរូបនោះ ពាក់ព័ន្ឋនឹងការចែកចាយគ្រឿងញៀន ទើបសមត្ថកិច្ចឈានទៅដល់ការឃាត់ខ្លួន ។
បច្ចុប្បន្នជនសង្ស័យទាំង ២នាក់ រួមនឹងវត្ថុតាង ត្រូវបានកម្លាំងការិយាល័យប្រឆាំងការជួញដូរ គ្រឿងញៀន កសាងសំណុំរឿង ដើម្បីបញ្ជូនទៅសាលាដំបូង ខេត្តព្រះសីហនុ ចាត់ការទៅតាមផ្លូវច្បាប់ ៕ ភ្នំព្រឹក
