ពលករដែលត្រូវបានបញ្ជូនមកកាន់កម្ពុជាវិញ តាមច្រកប៉ោយប៉ែត បានកំពុងតែរងគ្រោះដោយសារតែក្រុម ប៉ូលិសអន្តោប្រវេសន៍ប្រចាំច្រកអន្តរជាតិស្របច្បាប់មួយនេះ គាបសង្កត់យកប្រាក់ គ្មានអ្នកណាម្នាក់ត្រូវបានរួចខ្លួន ពីការទាមទារប្រាក់ពីសំណាក់ក្រុមសមត្ថកិច្ចប៉ូលិសនោះឡើយ ។
ពលករចំណាកស្រុកចូលមកស្រុកកំណើតវិញនោះបាននិយាយឱ្យដឹងកាលពីពេលថ្មីៗនេះថា ប្រជាពលករ ដែលអាជ្ញាធរយោធាថៃ ចាប់បញ្ជូនមកកម្ពុជាវិញនោះ បានកំពុងតែរងគ្រោះអស់ប្រាក់ដោយសារតែក្រុម ប៉ូលិសអន្តោប្រវេសន៍ប្រចាំច្រកទ្វារអន្តរជាតិប៉ោយប៉ែត ក្រោមការដឹកនាំរបស់លោក ស៊ឹម សំអាត ដែលទើបនឹងឡើងកាន់តំណែងជាប្រធានច្រកអន្តរជាតិប៉ោយប៉ែតជំនួសលោក សៅ ប៊ុនរិទ្ធ នោះបានទាមទារប្រាក់ពីពលករខ្មែរដែលវិលមកស្រុកកំណើតវិញនោះ ។
ប្រភពដដែលបានបន្តឱ្យដឹងទៀតថា លោក ស៊ឹម សំអាត បានបញ្ជាកូនចៅនៅក្រោមឱវាទឱ្យទារប្រាក់ពី ពលករខ្មែរចាប់ពី ៣០០ ទៅ ៥០០បាត រីឯទាហានថៃបានទារប្រាក់ពីពលករខ្មែរក្នុងមួយនាក់ ២០០បាតផងដែរ ។ ប្រសិនបើពលកររូបណាមិនបង់ប្រាក់ឱ្យក្រុម ប៉ូលិសអន្តោប្រវេសន៍ នេះទេ គឺពុំបានចូលមកទឹកដីកម្ពុជាជាប្រទេសខ្លួនដែរ ។ ពេលនេះពលកររាប់សែននាក់ ដែលអាជ្ញាធរយោធាថៃ បញ្ជូនមកទឹកដីកំណើតវិញនោះ ត្រូវតែបង់ប្រាក់ឱ្យក្រុមប៉ូលិសលោក ស៊ឹម សំអាត ទាំងអស់គ្នា ដែលមជ្ឈដ្ឋានប្រជា ពលរដ្ឋ មើលឃើញថា ជាអំពើពុករលួយ ជាសកម្មភាពច្របាច់.កប្រជាពលរដ្ឋក្រីក្រកាន់តែខ្លាំងឡើងៗ ព្រោះលោក ស៊ឹម សំអាត ពុំមែនជាមនុស្សថ្មីស្រឡាង ទើបនឹងជូតខ្លាញ់គោឯកណា គឺជាមនុស្សចាស់ដែលធ្លាប់ឆ្លងកាត់កិច្ច ការងាររាប់សិបឆ្នាំមកហើយ ។
គួររំលឹកផងដែរថា លោក ស៊ឹម សំអាត ធ្លាប់ធ្វើជាប្រធានច្រកទ្វារអន្តរជាតិដូង ឃុំបឹងរាំង ស្រុកកំរៀង ខេត្តបាត់ដំបង រាប់សិបឆ្នាំមកហើយមុនទៅកាន់តំណែងជាប្រធានច្រកអន្តរជាតិប៉ោយប៉ែត ។ ដូច្នេះលោក ស៊ឹម សំអាត មាន បទពិសោធន៍ការងារគ្រប់គ្រាន់ និងចេះពីវិធីគាបជម្រិតយកប្រាក់ពីពលករចំណាកស្រុកតាមច្រកដែល លោកកាន់កាប់កន្លងមក ។ រីឯរឿងពុករលួយគាប.កប្រជាពលរដ្ឋក្រីក្រនោះលោក ស៊ឹម សំអាត មានជំនាញច្បាស់លាស់ណាស់ ទើបថ្នាក់លើសម្រេចឱ្យលោកទៅធ្វើជាប្រធានច្រកប៉ោយប៉ែតនោះ ។
ប្រភពពីមន្ត្រីប៉ូលិសតូចតាចនៅប៉ោយប៉ែតបានឱ្យដឹងផងដែរថា របៀបដឹកនាំរបស់លោក ស៊ឹម សំអាត មិនសូវខុសពីលោក សៅ ប៊ុនរិទ្ធ ជាអតីតប្រធានច្រកអន្តរជាតិប៉ោយប៉ែតនោះទេ តែវិធីប្រព្រឹត្តអំពើពុករលួយវិញ នោះ ខ្លាំងជាងលោក សៅ ប៊ុនរិទ្ធ ទៅទៀត ។ ជាក់ស្តែងការទាមទារប្រាក់ពីពលករ ដែលរងគ្រោះដោយសាររដ្ឋា ភិ បាលយោធាថៃបញ្ជូនមកស្រុកកំណើតវិញនោះ ត្រូវបានក្រុមប៉ូលិសអន្តោប្រវេសន៍របស់លោក ស៊ឹម សំអាត ច្របាច់ក្រយកប្រាក់ថែមទៀតជាទង្វើអមនុស្សធម៌ខ្លាំងក្លាណាស់ ។
ប្រភពដដែលបានបន្តឱ្យដឹងទៀតថា ពលករខ្មែរអភ័ព្វណាស់ នៅពេលធ្វើចំណាកស្រុកទៅធ្វើការនៅ ប្រទេសថៃ ទាំងប្រថុយប្រថាននោះ ត្រូវអស់ប្រាក់ហើយពេលនេះ ត្រូវរដ្ឋាភិបាលយោធាថៃ បញ្ជូនមកប្រទេសខ្លួន វិញ ត្រូវអស់ប្រាក់បង់ឱ្យក្រុមប៉ូលិសអន្តោប្រវេសន៍ទៀត ។ ដូច្នេះទាំងចេញទាំងចូលត្រូវក្រុមប៉ូលិសលោក ស៊ឹម សំអាត ច្របាច់.កប្រជាពលរដ្ឋខ្មែរ យកប្រាក់គ្មានធម៌មេត្តាឡើយ ៕
