ខេត្តព្រះសីហនុ :នាដើមរដូវវស្សាឆ្នាំនេះ ប្រជានេសាទទទួលបានផលនេសាទ ក្តាមសេះសមុទ្របានច្រើនជាងឆ្នាំមុនៗ ដោយសារអាកាសធាតុមានលក្ខខណ្ឌប្រកប ធ្វើអោយប្រជានេសាទក្តាមសមុទ្រ ប្រមូលផលនេសាទបានយ៉ាងច្រើនសន្ឋឹកសន្ឋាប់ លើសឆ្នាំមុនៗ កន្លងមក ។
លោកស្រី អេង គឹមជូ ដែលជាម្ចាស់ផែទំនប់រលក ស្ថិតក្នុងភូមិ ០៣ សង្កាត់ ០១ ក្រុង-ខេត្តព្រះសីហនុ ដែលជាម្ចាស់ទូកនេសាទ និង ប្រមូលទិញផលនេសាទក្តាមសេះសមុទ្រ លក់ចែកចាយទៅអោយម៉ូយតាមបណ្តាខេត្តនានា ក្នុងព្រះរាជាណាចក្រកម្ពុជា បានរៀបរាប់ទាំងក្តីសប្បាយរីករាយ ដល់អ្នកសារព័ត៌មានក្នុងស្រុក អោយបានដឹងថា ការនេសាទក្តាមសេះសមុទ្រ នៅរដូវប្រាំងកន្លងមក ពុំសូវបានផលប៉ុន្មាននោះទេ គ្រាន់តែទប់ទល់ និង ការចាយវាយទៅលើកម្មករនេសាទ តែប៉ុណ្ណោះ ។ ប៉ុន្តែឈានចូលមកដល់ដើមរដូវវស្សាឆ្នាំនេះ គឺផលនេសាទក្តាមសេះសមុទ្រ មានការកើនឡើងទ្វេដង បើទោះបីជាប្រជានេសាទចេញទៅវាយមងក្តាមជួបប្រទះភ្លៀងខ្យល់ យ៉ាងណាក្តី ឃើញថាការនេសាទក្តាមសេះសមុទ្រមានការកើនឡើង គួរអោយកត់សម្គាល់ ។
លោកស្រី អេង គឹមជូបានបន្តទៀតថា ឆ្នាំនេះ ឃើញថាផលនេសាទ មានការកើនឡើងពិតមែន បើប្រៀបធៀបនឹងឆ្នាំមុន ឃើញថាឆ្នាំនេះ ផលនេសាទក្តាមសេះសមុទ្រមានការកើនឡើងពីរបីដង លើសឆ្នាំមុន ។
ទាក់ទិនជុំវិញ បញ្ហាផលនេសាទកើនឡើងនេះ លោកស្រី អេង គឹមជូបានរៀបរាប់បន្តទៀតថា បើទោះបីការប្រមូលទិញផលនេសាទក្តាមសេះសមុទ្រ ឆ្នាំនេះមានការកើនឡើងក៏ដោយប៉ុន្តែតំលៃទីផ្សារ ក៏មានការថយចុះបន្តិចបន្តួច បើប្រៀបធៀបទៅរដូវប្រាំង ៕
ភ្នំព្រឹក
