ខេត្តព្រះសីហនុ: បន្ទាប់ពីលោក ឈិត សុផាតចៅសង្កាត់លេខ ១ បានអោយក្រុមការងារសង្កាត់ សហការជាមួយអាជ្ញាធរភូមិ នៅរសៀលថ្ងៃទី ១៦ ខែ មិថុនា ឆ្នាំ ២០១៤ បានចុះទៅហាមឃាត់សំណង់ផែដ៏រឹងមាំមួយ ដែលមានផ្ទះដ៏ធំ និង ផែវែងដាច់កន្ទុយភ្នែក ដែលសាងសង់ខុសច្បាប់ទម្លាប់ ដែលបានសាងសង់ចូលក្នុងដែនសមុទ្ររបស់រដ្ឋ ដែលរដ្ឋហាមឃាត់មិនអោយសាងសង់ សំណង់រឹងមាំដែលពាក់ព័ន្ឋទៅនឹងឆ្នេរ ក៏ដូចជាបរិស្ថានសមុទ្រ ធ្វើអោយប៉ះពាល់យ៉ាងធ្ងន់ធ្ងរ ចំពោះវិស័យអភិវឌ្ឍន៏របស់ប្រទេសជាតិ ទៅអនាគត ។ សំណង់ខុសច្បាប់មួយនេះស្ថិតនៅចំណុច ផែខ្សាច់ក្នុងភូមិ ០៣ សង្កាត់ ០១ ក្រុង-ខេត្តព្រះសីហនុ ។
ទាក់ទិនជុំវិញបញ្ហាខាងលើនេះ ម្ចាស់សំណង់ដែលមានឈ្មោះ ហេន ភេទ ប្រុស ជាអាជីវករប្រមូលទិញផលនេសាទ នៅតំបន់ខាងលើនេះ ផ្គើននឹងអាជ្ញាធរដែនដី ដែលបានទៅហាមឃាត់អោយលោកទៅសុំច្បាប់អោយបានត្រឹមត្រូវ មុននឹងធ្វើការសាងសង់ ដោយឡែកម្ចាស់សំណង់មួយនេះ មិនគោរពតាមការហាមឃាត់ របស់អាជ្ញាធរសង្កាត់ ផ្ទុយទៅវិញ បែរជាធ្វើការសាងសង់ទាំងយប់ទាំងថ្ងៃ ប្រឆាំងនឹងការហាមឃាត់របស់អាជ្ញាធរដែនដី ។
ទង្វើមិនគោរពច្បាប់បែបនេះ បានធ្វើអោយមហាជន ដែលគេគោរពច្បាប់បានរិះគន់ថា បុរសម្នាក់នេះពិតជាខ្លាំង ដូចមាត់មែនសូម្បីតែអាជ្ញាធរ ឬមន្ត្រីពាក់ព័ន្ឋមកធ្វើការហាមឃាត់យ៉ាងណាក៏ដោយ ក៏នៅតែសាងសង់គ្មានញញើតដៃ ហើយបានចេញសម្តីអួតក្អេងក្អាងថា បើសារព័ត៌មានណា ចុះផ្សាយ គ្រាន់តែគេសាងសង់ផែប៉ុណ្ណឹង គេនឹងរកមេធាវីដាក់ពាក្យប្តឹង ទៅលើអ្នកសារព័ត៌មានណា ដែលបានចុះផ្សាយ ប៉ះពាល់ដល់ផែរបស់គេ ដែលកំពុងសាងសង់ មិនតែប៉ុណ្ណោះ គេបាននិយាយថែមទៀតថា គេបានស្នើសុំទៅភូមិសង្កាត់អស់ហើយ មន្ត្រីជលផល ក៏បានសុំហើយអស់ដែរ ។
លោក ហេន បានបន្តទៀតថា តំបន់នេះគេមិនដែលសុំច្បាប់ទេ ហើយគេសាងសង់តែអញ្ចឹង ពុំដែលមាននរណាម្នាក់សុំច្បាប់នោះឡើយ បើគេមានលុយសង់ គឺគេសង់ហើយ ។
ពាក់ព័ន្ឋជុំវិញបញ្ហាអួតក្អេងក្អាងដូចសត្វក្អាត់ នៅក្នុងក្អមបែបនេះ លោក ឈិត សុផាតចៅសង្កាត់លេខ ១ ក្រុងព្រះសីហនុ បានច្រានចោលនូវបញ្ហាខាងលើនេះ ហើយបានបញ្ជាក់ថា គឺរូបលោកបានចុះទៅហាមឃាត់ ម្តងរួចហើយ ហើយលោកមិនដែលអនុញ្ញាតអោយបុគ្គលរូបនេះ សាងសង់ផែ ដោយមិនគោរពច្បាប់បំពាន ដែនសមុទ្រយ៉ាងអនាធិបតេយ្យ ប៉ះពាល់យ៉ាងធ្ងន់ធ្ងរដល់ក្នុងដែនសមុទ្រនោះឡើយ ។
ចំពោះលោក នេន ចំរើននាយខណ្ឌរដ្ឋបាលជលផល ខេត្តព្រះសីហនុ បានអោយដឹងថា តំបន់ខាងលើនេះ គេមិនដែលអនុញ្ញាតអោយសាងសង់ផែថ្មរឹងមាំ ដូចបុគ្គលខាងលើនោះទេ ប៉ុន្តែកន្លងមកប្រជាពលរដ្ឋ ដែលប្រកបមុខរបរនេសាទ មានការសាងសង់ផែខ្លះ ដោយប្រើពីឈើ តែមិនអនុញ្ញាត្តអោយទ្រង់ទ្រាយធំនោះទេ សូម្បីតែសំណង់ផ្ទះឈើ ក៏មិនអនុញ្ញាត្តដែរ កន្លងមក ៕
