បន្ទាយមានជ័យ ៖ បើចង់អោយពលករខ្មែរមានការងារធ្វើនៅក្នុងស្រុកនិងមានប្រាក់ចំនូលចូលជាតិ នគរបាលអន្តោប្រវេសន៍ទាំងអស់ត្រូវអនុវត្តច្បាប់អោយបានទៅលើជនអន្តោប្រវេសន៍ ដែលប្រើប័ណ្ណឆ្លងដែនប្រភេទទេសចរណ៍មកធ្វើការងារ និងមិនព្រមបង់ពន្ធជូនរដ្ឋ ។ នេះបើតាមការលើកឡើងរបស់លោកនាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ ថ្លែងនៅក្នុងពិធីប្រកាសផ្ទេរភារកិច្ចនិងតែងតាំង លោក ឱ លន់ ជាស្នងការរងអន្តោប្រវេសន៍នៃស្នងការនគរបាលខេត្តបន្ទាយមានជ័យកាលពីរសៀលថ្ងៃទី២៥ មិថុនា ២០១៤ នៅនិងសាលប្រជុំនៃស្នងការខេត្តបន្ទាយមានជ័យ ។
លោក អាត់ ខែម ស្នងការនគរបាលខេត្តបន្ទាយមានជ័យបានលើកឡើងពីស្ថានភាពសន្តិសុខសណ្តាប់ធ្នាប់ និងបទល្មើសដែលកើតឡើងក្នុងខេត្តមានការថយចុះ និងបង្ក្រាបបានរាល់បទល្មើសដែលកើតឡើងជាបន្តបន្ទាប់ ធ្វើអោយប្រជាពលរដ្ឋមានភាពកក់ក្តៅក្នុងការរស់នៅប្រកបរបរចិញ្ចឹមជីវិត ។
លោក គោស៊ុំ សារឿត អភិបាលខេត្តបន្ទាយមានជ័យក៏បានលើកឡើងផងដែរថា ខេត្តបន្ទាយមានជ័យ គឺជាខេត្តមួយជាប់និងព្រំដែនប្រទេសថៃ ហើយមានច្រកអន្តជាតិសម្បូរទៅដោយភ្ញៀវទេសចរណ៍ជាតិ និងអន្តរជាតិឆ្លងកាត់លោកស្នើរសុំដល់លោកស្នងការរងអន្តោប្រវេសន៍ ដែលត្រូវប្រកាសតែងតាំង ក្នុងតំនែងថ្មីត្រូវធ្វើយ៉ាងណាគ្រប់គ្រងអោយបាន នូវជនអន្តោប្រវេសន៍ដែលមកស្នាក់នៅនិងប្រកបរបរនៅក្នុងខេត្ត និងត្រូវបង្កលក្ខណៈ អោយបានងាយស្រួលរក្សាអោយបាននូវសុខសុវត្ថភាពរបស់ជនបរទេស ។
ថ្លែងក្នុងឱកាសនោះដែរ លោកនាយឧត្តមសេនីយ៍ សុខ ផល អគ្គនាយកនៃអគ្គនាយកដ្ឋានអន្តោប្រវេសន៍ បានបន្ថែមលើការងារអន្តោប្រវេសន៍ដែលការងារនេះមិនមែនជាការងារងាយស្រួលនោះទេ វាគឺជាការងារស្មុកស្មាញនិងពិបាក ដែលតំរូវអោយយើងយកចិត្តទុកដាក់ ស្រាវជ្រាវក្តាប់អោយបាននូវជនបរទេសទាំងឡាយដែលមកស្នាក់នៅរយៈពេលវែង និងខ្លីដោយកន្លងមកសម្រាប់ខេត្តបន្ទាយមានជ័យ ការគ្រប់គ្រងជនបរទេសគឺបានល្អ តែនៅមិនទាន់គ្រប់គ្រងបាននៅឡើយ ជនបរទេសដែលមកប្រកបរបររកស៊ីធ្វើការនៅក្នុងខេត្តថា តើបានពិនិត្យហើយឬនៅទៅលើប័ណ្ណឬសៀវភៅការងារ និងទិដ្ឋការការងារ ស្របទៅតាមច្បាប់ដែលឬទេ ។ បើយើងមិនធ្វើការត្រួតពិនិត្យឬព្រមាន ឬផាកពិន័យលើជនបរទេសណា ដែលមកស្នាក់នៅធ្វើការមិនព្រមបង់ពន្ធ វានឹងធ្វើអោយបាត់បង់ការងារពលករខ្មែរ និងថវិការជាតិព្រោះថា តាមក្រុមហ៊ុន រោងចក្រ ច្បាប់អនុញ្ញត្តអោយមានជនបរទេសមានចំនួនតែ១០%នៃចំនួនពលករខ្មែរតែប៉ុណ្ណោះ បើយើងមិនព្រមរឹតបន្តឹង វាកាន់តែធ្វើអោយជនបរទេសជាច្រើនមកធ្វើការងារដណ្តើមការងារពលរដ្ឋខ្មែរ ដោយប្រើតែលិខិតឆ្លងដែនប្រភេទ ទេសចរណ៍វាយចេញវាយចូលក្នុងរយៈពេលមួយខែម្តង ។
ក្នុងរយៈពេលប៉ុន្មានថ្ងៃនេះលោកបានពិនិត្យឃើញថា មានពលករបរទេសជាច្រើនមិនបានធ្វើប័ណ្ណការងារ ក្នុងនោះគ្រាន់តែធ្វើការពិនិត្យ១រោងចក្រមានពលករបរទេសរហូតទៅដល់៣០០នាក់ ។ ដូច្នេះបើយើងអនុវត្តន៍ការត្រួតពិនិត្យនេះបានវា នឹងធ្វើអោយពលករខ្មែរបានចូលបំពេញការងារ និងមានចំនូលចូលជាតិជាច្រើន ។ ជាមួយគ្នានោះ លោកក៏បានហាម ជាដាច់ខាតដល់មន្ត្រីនគរបាលជំនាញទៅលើ ការធ្វើសៀភៅគ្រួសារ អត្តសញ្ញាណប័ណ្ណសញ្ជាតិខ្មែរដល់ជនបរទេស គឺជាកំហុសធ្ងន់ធ្ងរណាស់ដែលខ្លួនជាមន្ត្រីជំនាញសោះអាចចេញអត្តសញ្ញាណប័ណ្ណជំនួសប្រមុខរដ្ឋាភិបាល ។
ការធ្វើអត្តសញ្ញាណប័ណ្ណជនបរទសទៅបានលុះត្រាតែព្រះមហាក្សត្រជាព្រះប្រមុខរដ្ឋជាអ្នកប្រទានតាមការស្នើរសុំ ច្បាប់បានចែង ៕
