បន្ទាយមានជ័យ ៖ ត្រាក់ទ័រ ៦ គ្រឿងរបស់ក្រុមហ៊ុនជាតិអភិវឌ្ឍន៍ ត្រូវជនមិនស្គាល់មុខលួចដុតឆេះខ្ទេច កាលពីកណ្តាលអធ្រាតថ្ងៃទី ១៥ មិថុនា ២០១៤ កន្លងទៅនេះ ។
ហេតុកាណ៍នេះបានកើតឡើង នៅចំនុចភូមិធ្លោក ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ស្ថិតក្នុងបរិវេណដីសម្បទានក្រុមហ៊ុនជាតិអភិវឌ្ឍន៍ដែលទទួលបានសិទ្ធលើវិនិយោគលើដីសម្បទានសេដ្ឋកិច្ចពីរដ្ឋាភិបាល ។
តាមការអោយដឹងពីលោកអធិការស្រុកថ្មពួកថា កាលពីយប់កើតហេតុខាងលើ ត្រាក់ទ័ររបស់ក្រុមហ៊ុនជាតិអភិវឌ្ឍន៍ចំនួន៦គ្រឿង ត្រូវបានជនមិនស្គាល់មុខលួចចូល ដុតបណ្តាលអោយឆេះខ្ទេចដោយពុំដឹងរឿង ។ បច្ចុប្បន្នសមត្ថកិច្ចកំពុងតែចុះស្រាវជ្រាវលើករណីនេះ ។ លោកបានបន្តអោយដឹងទៀតថា តាមព័ត៍មានដែលទទួលបានពីមេប៉ុស្តិ៍ឃុំបន្ទាយឆ្មារបានរាយការណ៍ថា បន្ទាប់ពីអ្នកបើកត្រាក់ទ័រទាំង៦នាក់បាន ឈប់ពីការភ្ជួររាស់ដី ហើយក៏បានយកត្រាក់ទ័រមកតំរៀបគ្នាជាជួរដូចរាល់ដង ដែលពួកគេទាំង៦នាក់មិនបាននៅយាមត្រាក់ទ័រនោះទេ គឺមានកម្មករក្រុមហ៊ុនចំនួន ២ នាក់ជាអ្នកចាំយាមជារៀងរាល់យប់ ស្រាប់តែនៅម៉ោង១២ យប់ក៏មានមនុស្សបីបួននាក់ ប្រដាប់ដោយពូថៅ បានទៅគំរាមអ្នកទាំង ២ នោះក៏បានរត់គេចខ្លួន ហើយក្រោយមកក៏មានការឆេះត្រាក់ទ័រទាំង៦នោះតែម្តង ។
សូមបញ្ចាក់ថា ក្រុមហ៊ុនជាតិអភិវឌ្ឍន៍ដែលទទួលបានដីសម្បទានពីរដ្ឋាភិបាល តែងមាន ទំនាស់ជាមួយពលរដ្ឋទៅលើដីដែលខ្លួនបានទទួលសិទ្ធពីរដ្ឋាភិបាល រហូតដល់មានការ ផ្ទុះហឹង្សាពីសំណាក់ពលរដ្ឋដុតរោងរបស់ក្រុមហ៊ុន ដែលពួកគាត់ចោទ បានសង់នៅលើដីពួកគាត់មិនថែមតែប៉ុណ្ណោះ ពេលដែលគណៈកម្មការខេត្តចុះដោះស្រាយទំនាស់ដីធ្លីរវាងក្រុមហ៊ុន និងពលរដ្ឋនេះ ក៏ត្រូវបានក្រុមប្រជាពលរដ្ឋប្រើហឹង្សា វាយទៅលើអភិបាលរងស្រុកថ្មពួកម្នាក់ ក្រោយមកក៏មានការសម្របសម្រួលដោះស្រាយរហូតស្ងប់ស្ងាត់មកដល់ពេលនេះ ។អ្វីដែលសមត្ថកិច្ចកំពុងតែសង្ស័យ លើករណីដុតត្រាក់ទ័រនេះ ទៅលើករណីម្យ៉ាងដែលកន្លងមកក្រុមហ៊ុន ធ្លាប់បានតាមទាន់ចាប់អ្នកលួចបូមប្រេងគ្រឿងចក្រ យកទៅលក់ បញ្ជូនទៅតុលាការឃុំខ្លួន ៕
