កូនមន្ត្រី ដែលជា សេដ្ឋីប្រចាំ រាជធានីភ្នំពេញ មួយរូប ទំនងជា បាន កំពុងពួនសម្ងំលាក់ខ្លួន ព្យាយាម គេច ចេញពី សំណាញ់ច្បាប់ ដែលបានបើក រថយន្តម៉ាករង់រ៉ូវែរ បុកម៉ូតូមួយគ្រឿង បណ្តាលឱ្យ មនុស្សបីរូប បានស្លាប់នៅ ផ្លូវជាតិ លេខ ១ ហើយរហូតមកទល់នឹង ពេលនេះ តុលាការពុំទាន់បើក សវនាការនោះទេ សូម្បីតែដីកា កោះហៅក៏គ្មានដែរ ។
មជ្ឈដ្ឋាន ប្រជាពលរដ្ឋ បានធ្វើការរិះគន់ថា កូនលោក ប៊ុន សេរី នាយករងរដ្ឋបាលសាលារាជធានីភ្នំពេញ ឈ្មោះ ប៊ុន រតនៈ បានកំពុងស្ថិតនៅក្នុងភាពស្ងៀមស្ងាត់ពុំមានដីកាតុលាការធ្វើការកោះហៅធ្វើការសាកសួរដើម្បី កសាងសំណុំរឿងទទួលទោសទៅតាមច្បាប់នោះទេ ។ ទោះបីជាលោក ប៊ុន សេរី មហាសេដ្ឋីប្រចាំរាជធានី ភ្នំពេញ បានសងសំណងរដ្ឋប្បវេណីដល់គ្រួសារសពអ្នករងគ្រោះទាំងបីរូបក៏ដោយក៏ត្រូវតែអនុវត្តច្បាប់ចរាចរណ៍ ផ្លូវគោកដែរ មិនត្រូវនៅស្ងៀមស្ងាត់បែបនេះដែរ ។
ប្រភពដដែលបានបន្តឱ្យដឹងទៀតថា នៅកម្ពុជាជីវិតមនុស្សហាក់បីដូចជា មិនមានតម្លៃអ្វីបន្តិចជាមួយអ្នក មានលុយមានអំណាច ហើយការអនុវត្តច្បាប់ គឺធ្វើទៅលើជនទន់ខ្សោយអ្នកមិនមានអំណាច អ្នកគ្មានខ្សែទុយោ លូតែប៉ុណ្ណោះ ។ ករណីបុរសឈ្មោះ ប៊ុន រតនៈ នេះមិនត្រូវបានអ្នកច្បាប់ធ្វើការសើរើសំណុំរឿងដើម្បីឱ្យជនប្រព្រឹត្ត អំពើល្មើស ច្បាប់ចរាចរណ៍ផ្លូវគោកមួយនេះ ទទួលទោសតាមច្បាប់នោះឡើយ ។
គួររំលឹកផងដែរថា បុរសឈ្មោះ ប៊ុន រតនៈ នេះសេពគ្រឿងស្រវឹងហើយបើកបររថយន្តរ៉ង់រ៉ូវែរ ពណ៌ខ្មៅ ពាក់ស្លាកលេខ ភ្នំពេញ ២AA-៦៧៧៧ បុកម៉ូតូមួយគ្រឿងបណ្តាលឱ្យស្លាប់មនុស្ស ៣នាក់ វេលាម៉ោង ៥រសៀល ថ្ងៃទី ២០ ខែកក្កដា ឆ្នាំ២០១៣ នៅចំណុចភូមិយកបាត សង្កាត់ស្លាកោះ ខណ្ឌមានជ័យ រាជធានីភ្នំពេញ តាមបណ្តោយផ្លូវ ជាតិលេខ ១ (កៀនស្វាយ)នៅវេលាភ្លៀងធ្លាក់ ។ បើពិនិត្យស្ថានភាពរថយន្តដែលខូចខាត គឺកំពិតផ្នែកខាងស្តាំ និងខាងឆ្វេង ព្រមទាំងបាក់កង់ថែមទៀតផង ។ ដូច្នេះរថយន្តមួយនេះ បើកបរក្នុងល្បឿនលឿនទើបបុកម៉ូតូ បណ្តាលឱ្យបាក់កង់រថយន្តបែបនេះ ។
ក្រុមអ្នកវិភាគឯករាជ្យបានសម្តែងយោបល់ផងដែរថា បើតាមផ្លូវច្បាប់អ្នកដែលប្រព្រឹត្តអំពើល្មើសច្បាប់ ទាំងអស់ ត្រូវសងសំណងរដ្ឋប្បវេណីហើយត្រូវទទួលទោសតាមមាត្រាច្បាប់ គឺពុំមែនសងសំណងរដ្ឋប្បវេណីហើយ ត្រូវបានរួចខ្លួនពីសំណាញ់ច្បាប់នោះទេ ។ ដោយឡែកប្រសិនបើជនរងគ្រោះ ឬក្រុមគ្រួសារមិនធ្វើពាក្យបណ្តឹងទេ នោះ មន្ត្រីនគរបាលយុត្តិធម៌មូលដ្ឋាននៅកន្លែងកើតហេតុមានសិទ្ធិ ធ្វើពាក្យបណ្តឹងប្តឹងពីជនប្រព្រឹត្តបទល្មើសទៅ តុលាការ ដើម្បីដាក់ទោស ទណ្ឌដល់អ្នកប្រព្រឹត្តអំពើល្មើសច្បាប់ពុំមែនសំងំនៅស្ងៀមដូចករណីបុរសឈ្មោះ ប៊ុន រតនៈ កូនលោកមហាសេដ្ឋី ប៊ុន សេរី នាយករងរដ្ឋបាលសាលារាជធានីភ្នំពេញនោះឡើយ ។/
