ប្រជាពលរដ្ឋក្មេងចាស់ ប្រុសស្រីជាច្រើននាក់ ខឹងសម្បារយ៉ាងខ្លាំងចំពោះក្រុមហ៊ុនមួយបានចាក់ដីលុបចំណី អូរធ្វើឱ្យទឹកភ្លៀង លិចលំនៅដ្ឋានរបស់ពួកគាត់ បានលើកគ្នាមកតវ៉ាសុំឱ្យអាជ្ញាធរជួយដោះស្រាយ ដែលក្រុមហ៊ុន មួយនេះចាក់ដីរំលោភចូលចំណីអូរ ធ្វើឱ្យភ្លៀងធ្លាក់មួយមេ កាលពីថ្ងៃទី ០៥ ខែមិថុនា ឆ្នាំ២០១៤ កន្លងទៅថ្មីៗនេះ ធ្វើឱ្យបាក់ដីលុបអូរ និងលូដ៏តូចដែលក្រុមហ៊ុនបានដាក់កាត់ឆ្លងអូរ នោះលិចបាត់ស្ទើរទាំងស្រុង ដែលមិនអាចរំដោះ ទឹកភ្លៀងបាន ធ្វើឱ្យលិចផ្ទះពលរដ្ឋមួយចំនួនធំ ។
ភាពរំជើបរំជួលនេះបានកើតឡើង ខណៈពេលដែល ឯកឧត្តម ស៊ុន ស្រ៊ន់ អភិបាលរងខេត្តព្រះសីហនុ ចុះទៅ ត្រូវពិនិត្យមើលការដ្ឋានមួយនេះ ដែលមានទីតាំងស្ថិតនៅក្រុមទី ០២ ភូមិ ០៥ សង្កាត់ ០៤ ក្រុង-ខេត្តព្រះសីហនុ កាលពីរសៀលថ្ងៃទី ០៧ ខែមិថុនា ឆ្នាំ២០១៤ នេះ ។
ពលរដ្ឋទាំងនោះ នៅចំពោះមុខ ឯកឧត្តម ស៊ុន ស្រ៊ន់ អភិបាលរងខេត្តព្រះសីហនុ បានលើកឡើងស្រដៀងៗ គ្នាថា ពួកគាត់ជាច្រើនគ្រួសារ រស់នៅតំបន់នេះខ្លះជិត ៣០ឆ្នាំកន្លងមកហើយ ពុំដែលបានជួបប្រទះទឹកជន់លិចបែប នេះទេ ទើបតែមានក្រុមហ៊ុនមួយនេះយកគ្រឿងចក្រ រំលាយភ្នំយកអាចន៍ដីចាក់លុបចាត់ទ្រង់ទ្រាយដើមរបស់អូរ ហើយក្រុមហ៊ុនមួយនេះបានយកកូនលូតូចមួយ យកមកដាក់កាត់អូរខាងលើ ចាក់ដីលប់ធ្វើផ្លូវចូលទៅការដ្ឋានរបស់ ពួកគេ ។ គ្រាន់តែភ្លៀងមួយកូនមេបានធ្វើឱ្យបាក់ដីហូរចូលពេញអូរ និងលូនាំឱ្យស្ទះទឹកចាល់លិចលំនៅដ្ឋានរបស់ពួក គាត់ ។
ពលរដ្ឋខ្លះបានលើកឡើងថា ខណៈពេលទឹកភ្លៀងជន់លិចនោះ ពួកគាត់ខ្លះបាត់មាន់ ទា ខោអាវ និងសម្ភារៈ ផ្ទះបាយមួយចំនួន ដែលទឹកកួចយកទៅបាត់ ។ រឿងបាត់របស់របរគាត់បានលើកឡើងថា វាជារឿងតូចតាចទេ តែបើបាត់បង់អាយុជីវិតវិញ នោះវាជារឿងធំខ្លាំងណាស់ ចំពោះក្រុមហ៊ុនលោកផ្ទាល់ ។ ក្រុមពលរដ្ឋទាំងនោះ បានលើកលើងទៀតថា បើភ្លៀងធ្លាក់ផ្ទួនៗ នោះទឹក និងជន់លិចដល់ដំបូលផ្ទះហើយ ហើយនឹងកើតមានឡើង បើមិនលង់ទឹកស្លាប់ ក៏ចរន្តអគ្គិសនីឆ្លងតាមទឹកឆក់ស្លាប់ដែរ ។ ដូច្នេះហើយពួកគាត់សុំឱ្យអាជ្ញាធរ គ្រប់ជាន់ថ្នាក់ មេត្តាពិនិត្យមើល និងស្នើសុំឱ្យកាយដីដែលចាក់លែបចូលចំណីអូរខាងលើនេះ កាយយកអាចន៍ដីចេញជាបន្ទាន់ កុំឱ្យកើតរឿងរហូតដល់មានពលរដ្ឋស្លាប់ឱ្យសោះ ។
ទាក់ទិននឹងបញ្ហានេះផងដែរ ឯកឧត្តម ស៊ុន ស្រ៊ន់ អភិបាលរងខេត្តព្រះសីហនុ បានមានប្រសាសន៍ប្រាប់ទៅ ពលរដ្ឋទាំងអស់ថា គាត់ពុំដែលបានឃើញគេចាក់ដីបែបនេះទេ គាត់នឹងពិនិត្យមើលផ្លូវច្បាប់ថា តើក្រុមហ៊ុនបាន រំលោភចាក់ដីចូលចំណីអូរមែននោះ គាត់នឹងឱ្យក្រុមហ៊ុនមួយនេះកាយប្រមូលយកអាចន៍ដីទាំងនោះ ចេញវិញឱ្យ អស់រក្សាផ្ទៃអូរឱ្យដូចដើមងាយស្រួលក្នុងការរំដោះទឹក ។ ចំពោះលូដែលក្រុមហ៊ុនដាក់ខុស និងបច្ចេកទេសនោះ ឯកឧត្តមឱ្យក្រុមហ៊ុនកាយចេញជាបន្ទាន់ និងឱ្យជំនាញសិក្សាធ្វើស្ពាន ឬដាក់លូយ៉ាងណានោះរង់ចាំជំនាញសិក្សាសិន ។
ពាក់ព័ន្ធនឹងបញ្ហានេះ លោក តុង ដែលជាតំណាងឱ្យក្រុមហ៊ុនមួយនេះ បានអះអាងថា ដីក្រុមហ៊ុនបើពិនិត្យ តាមប្លង់ព្រំប្រទល់ដល់ពាក់កណ្តាលអូរឯណោះ មិនមែនត្រឹមណឹងនោះទេ ។ លោកបានបន្តទៀតថា គ្រាន់តែឱ្យ សុរិយោដីបច្ចេកទេសរកព្រំដីរបស់ក្រុមហ៊ុន ត្រូវចំណាយលុយអស់ជាង ៣០០០ដុល្លារ (បីពាន់ដុល្លារ)ទៅឱ្យ ក្រុមហ៊ុនមិនបានរំលោភអូរស្អីនោះទេ បើចង់បន្ទោស បន្ទោសអ្នកចេញប្លង់ទៅ ព្រោះក្រុមហ៊ុនទិញបន្តពីគេនោះទេ ៕
