លោក រ័ត្ន ស្រ៊ាង មេបញ្ជាការកងរាជអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានី ភ្នំពេញ នៅតែយកចិត្តទុកដាក់ចំពោះប្រជាពលរដ្ឋខេត្តបន្ទាយមានជ័យ ទោះបីជាលោកបានប្តូរមករាជធានី ភ្នំពេញ ក៏ដោយក៏ស្មារតីស្រឡាញ់ប្រជាពលរដ្ឋនៅតែដិតដាមក្នុងអារម្មណ៍របស់លោកដដែល ។
លោកឧត្តមសេនីយ៍ទោ រ័ត្ន ស្រ៊ាង មេបញ្ជាការកងរាជអាវុធហត្ថរាជធានីភ្នំពេញ និងមេបញ្ជាការរង កងរាជអាវុធហត្ថលើផ្ទៃប្រទេស និងជាអតីតមេបញ្ជាការកងរាជអាវុធហត្ថខេត្តបន្ទាយមានជ័យ និងក្រុមការងារបានចុះពិនិត្យការស្ដារប្រឡាយបញ្ជូនទឹកប្រវែង ២.០០០ម៉ែត្រ និងដាក់លូកាត់ផ្លូវជូនប្រជាពលរដ្ឋ នៅភូមិតាឡំ ឃុំតាឡំ និងឃុំបន្ទាយនាង ស្រុកមង្គលបូរី ខេត្តបន្ទាយមានជ័យ នាល្ងាចថ្ងៃទី ៤ ខែមិថុនា ឆ្នាំ២០១៤ ។ ហើយលោក រ័ត្ន ស្រ៊ាង ក៏បានធ្វើដំណើរបំពេញការងារមនុស្សធម៌និងសង្គមនិងរំលឹកអនុស្សាវរីយ៍ ក្ដីនឹករលឹករបស់លោក រយៈពេលកន្លងមក ដែលលោកបានចុះបំពេញ ភារកិច្ចនិងជាក្រុមការងារចុះជួយ ស្រុក ឃុំតាឡំ និងឃុំព្រះស្រែ។
លោក រ័ត្ន ស្រ៊ាង បាននិយាយបន្តថា៖ លោកបានរំលឹកអនុស្សាវរីយ៍ ដែលលោកបានធ្លាប់ធ្វើជា ក្រុមការងារជួយឃុំតាឡំ និងឃុំព្រះស្រែ ពេលនោះ លោកបានសន្យាធ្វើប្រឡាយទឹក មួយខ្សែ ដែលមានប្រវែង២.០០០ម៉ែត្រ ជូនប្រជាពលរដ្ឋក្នុងឃុំតាឡំនិងឃុំព្រះស្រែនោះ។ លុះថ្ងៃទី៤ ខែមិថុនាឆ្នាំ២០១៤នោះ លោកនិងក្រុមការងាររបស់លោក បានចុះទៅធ្វើប្រឡាយទឹកដែលលោកបានសន្យា នោះជូនដល់ប្រជាពលរដ្ឋក្នុងឃុំតាឡំនោះហើយ ដើម្បីឲ្យប្រជាពលរដ្ឋ យកទឹកពីប្រឡាយនោះទៅធ្វើស្រែក្នុងឃុំតាឡំ ឲ្យបានក្នុង១រដូវ៣ដង ។
លោក រ័ត្ន ស្រ៊ាង បាននិយាយបន្តថា៖ អស់រយៈពេលជាច្រើនខែកន្លងទៅនេះ លោកបានផ្លាស់ភារកិច្ចថ្មី ទៅបំពេញតួនាទីជាមេបញ្ជាការកងរាជអាវុធហត្ថរាជធានីភ្នំពេញ យ៉ាងណាក៏ដោយក៏ធ្វើឲ្យលោកមានសេចក្ដីនឹករលឹកអនុស្សាវរីយ៍ចាស់ ក្នុងខេត្តបន្ទាយមានជ័យដែលលោកបានបំពេញភារកិច្ច ជូនជាតិមាតុភូមិអស់រយៈពេល ជាច្រើនទសវត្សន៍កន្លងមកនេះ ធ្វើឲ្យខេត្តបន្ទាយមានជ័យមានស្ថេរភាព គ្មានចារកម្ម គ្មានបងតូចបងធំ គ្មានគ្រឿងញៀនជួញដូរជាទ្រង់ទ្រាយធំ ជាពិសេសគឺក្នុងខេត្តបន្ទាយមានជ័យនេះ គឺភូមិឃុំក្នុងខេត្តទាំងអស់មានសុវត្ថិភាពជាប្រចាំ ៕
