ភាពមិនប្រក្រតី ដែលធ្លាប់កើតមាន នៅក្នុងអង្គភាព អគ្គិសនីចាក់អង្រែក្រោម ធ្លាប់មានបណ្តឹងអនាមិក ដាក់ជូនអង្គភាព ប្រឆាំងអំពើពុករលួយ ដូចជាការសុំដំឡើងអំពែមួយចំនួន មិនបានបង់លុយកក់ ទៅតាមគោលការណ៍នោះទេ គឺមន្ត្រីមួយចំនួនបានយកលុយទាំងនោះ ទៅច្រកហោប៉ៅផ្ទាល់ខ្លួន ហើយគេប្រើបច្ចេកទេសដំឡើងអំពែជូនប្រជាពលរដ្ឋ ប្រើប្រាស់មិនខ្វល់ខ្វាយ ពីបទបញ្ជា ឬសេចក្តីណែនាំ របស់អគ្គិសនីកម្ពុជា នោះទេ។
មន្ត្រីតូចតាចមួយចំនួនបានបង្ហើបឲ្យដឹងថា ក្នុងអង្គភាពអគ្គិសនីចាក់អង្រែក្រោមមានអំពើបក្ខពួកនិយមនិងពុករលួយយ៉ាងពេញបន្ទុក ពោលគឺមន្ត្រីដែលជាបក្ខពួកខ្សែទុយោរបស់លោកកាន ឈុនទីដែលកាន់ផ្នែកបណ្តាញចែកចាយអាចមានឱកាសប្រមូលលុយច្រកហោប៉ៅផ្ទាល់ខ្លួនតាមរបៀបពុករលួយដូចជាករណីដែលប្រជាពលរដ្ឋសុំដំឡើងអំពែ សុំតចរន្តអគ្គិសនីយកទៅប្រើប្រាស់ មន្ត្រីមួយចំនួនបានតម្រូវឲ្យប្រជាពលរដ្ឋបង់លុយថ្លៃទឹកតែ ចាប់ពី ៥ ទៅ ១០ ដុល្លារអាមេរិក ទើបពួកគេចុះទៅតបណ្តាញឲ្យប្រជាពលរដ្ឋ ហើយបើមិនបង់លុយទៅតាមការតម្រូវនោះទេ មិនខុសពីការទៅសុំភ្លើងយក្សនោះទេ ។
ប្រភពដដែលបានឲ្យដឹងទៀតថា ៖ លោក កាន ឈុនទី បានកាន់តំណែងជាប្រធានសាខា អគិ្គសនីចាក់អង្រែក្រោមឡើងដុះស្លែទៅហើយ បង្កើតឲ្យមានអំពើពុករលួយបក្ខពួកនិយម និងភាពមិនប្រក្រតីយ៉ាងពេញបន្ទុកដែលរហូតមកដល់ពេលនេះមិនទាន់មានការកែទម្រង់ឲ្យបានល្អប្រសើរឡើងនៅឡើយទេសូម្បីតែក្នុងអាណត្តិថ្មីដែលមានការបំបែកក្រសួងឧស្សាហកម្មជាពីរ ក៏លោក កាន ឈុនទី នៅតែមានឱកាសកាន់តំណែងជាមេអគ្គិសនីសាខាចាក់អង្រែក្រោម ដោយសារតែគាត់មានទំនាក់ទំនងពិសេសជាមួយលោក ស៊ុយ សែម ជារដ្ឋមន្ត្រីក្រសួងរ៉ែ និងថាមពលពោរពេញទៅដោយអំណាចឥទ្ធិពលដោយមិនអើពើ នឹងវិធានការកែទម្រង់ស៊ីជម្រៅអ្វីនោះឡើយ ។
ប្រជាពលរដ្ឋក៏បានរអ៊ូរទាំផងដែរថាពេលខ្លះពួកគាត់យឺតយ៉ាវក្នុងការបង់ថ្លៃអគ្គិសនីដូចជាចំថ្ងៃបុណ្យទានត្រូវគេកាត់ផ្តាច់ភ្លើងដោយគ្មានការយោគយល់ហើយតម្រូវឲ្យបង់លុយយ៉ាងហោចណាស់៥ដុល្លារ ទើបពួកគេភ្ជាប់ចរន្តឲ្យប្រើប្រាស់ឡើងវិញថែមទាំងបង់ប្រាក់ពិន័យផងដែរ ហើយករណីខ្លះយឺតយ៉ាវទុកឲ្យប្រជាពលរដ្ឋអត់មានភ្លើងប្រើប្រាស់២ឬ៣ថ្ងៃ ។ អំណាចរបស់មន្ត្រីផ្នែកបណ្តាញអគ្គិសនីធំណាស់ពួកគេអាចធ្វើអ្វីៗតាមចិត្តក្នុងការកោសរូសឲ្យប្រជាពលរដ្ឋបង់លុយក្រោមលេសផ្សេងៗម្ល៉ោះហើយប្រជាពលរដ្ឋដែលមានតម្រូវការចាំបាច់ចេះតែទ្រាំបង់លុយឲ្យមន្ត្រីអគ្គិសនីទាំងនោះទាំងទើសទាល់ ហើយការដឹកនាំរបស់លោក កាន ឈុនទី បានជម្រុញឲ្យមន្ត្រីក្រោមឱវាទកោសរូសប្រជាពលរដ្ឋឲ្យបង់លុយតាមតែអំពើចិត្ត ទើបមន្ត្រីទាំងនោះមិនត្រូវបានដាក់ពិន័យឬដកហូតមុខតំណែងតួនាទីចំពោះការប្រព្រឹត្តខុសឆ្គងនោះទេ ។
ជាគោលការណ៍អគ្គិសនីកម្ពុជាបានចែងយ៉ាងលម្អិតក្នុងកិច្ចសន្យានូវកាតព្វកិច្ចរបស់អតិថិជនដែលត្រូវតែបង់លុយកក់សម្រាប់ការស្នើសុំតបណ្តាញអគ្គិសនីប៉ុន្តែប្រាក់កក់នោះ បើចង់ដកវិញ ពិបាក បន្តិច សឹងថាគ្មានឱកាសដែលត្រូវដកមកវិញផង ទើបមន្ត្រីមួយចំនួនបានស៊ីឡាក់ ប្រមូលលុយកក់ពីអតិថិជន ប៉ុន្តែពួកគេមិនបានយក់ទៅតម្កល់នៅក្នុងអង្គភាពឲ្យបាន ត្រឹមត្រូវ តាមគោលការណ៍នោះទេ។
ក្នុងអង្គភាពអគ្គិសនី ជាច្រើនកន្លែងស្ទើរទូទាំងប្រទេសបានជួបនូវរឿងរ៉ាវអាស្រូវពុក រលួយពាក់ព័ន្ធនឹងបញ្ហាលុយកក់ក៏ដូចជាបញ្ហាបណ្តាញដែលក្នុងនោះមានការឃុបឃិតឲ្យម្ចាស់ទីតាំងអាជីវកម្មជាច្រើន ជំពាក់បំណុលរដ្ឋឡើងវ័ណ្ឌក ធ្វើឲ្យខាតបង់ចំណូលថវិកាជាតិដែល ទាមទារឲ្យអង្គភាពប្រឆាំងអំពើពុករលួយធ្វើការស៊ើបអង្កេតជាបន្ទាន់ ។
មានមន្ត្រីជាច្រើនដែលមានការទទួលខុសត្រូវនិងមានសមត្ថភាពធ្វើការងារល្អជាងលោក កាន ឈុនទី ឆ្ងាយណាស់ ដូច្នេះសមល្មមដល់ពេលដែលលោករដ្ឋមន្ត្រី សុ៊យ សែម ក៏ដូចជាលោក កែវ រតនៈ អគ្គនាយកអគ្គិសនីកម្ពុជា មេត្តាពិនិត្យមើលភាពអសកម្មរបស់លោក កាន ឈុនទី ឡើងវិញផងតាមរយៈការតែងតាំងមន្ត្រីស្អាតស្អំ ឲ្យទៅជំនួសតំណែងលោក កាន ឈុនទី ដឹកនាំបង្រួបបង្រួមការងារផ្ទៃក្នុង ដើម្បីការពារផលប្រយោជន៍អង្គភាពឲ្យបានរលូនល្អ និងមានការរីកចម្រើន ៕
លោក កែវ រតនៈ អគ្គនាយកអគ្គិសនីកម្ពុជា
