មន្ត្រីនគរបាល ជាបុគ្គលិកការិយាល័យស្ថិតិ និងអត្តសញ្ញាណប័ណ្ណ នៃស្នងការខេត្តកំពង់ចាម បានដាក់ពាក្យបណ្តឹង ទៅកាន់អង្គភាពប្រឆាំង អំពើពុករលួយ រួចហើយ មកដល់ថ្ងៃទី ២៨ ខែឧសភា ឆ្នាំ២០១៤នេះចោទប្រកាន់ នាយការិយាល័យរបស់ខ្លួនថា បានប្រព្រឹត្តអំពើពុករលួយ យ៉ាងពេញទំហឹង គឺជំរិតទារប្រាក់ ពីប្រជាពលរដ្ឋ តាមច្រើនរូបភាព ដូចជា ធ្វើសៀវភៅគ្រួសារ ធ្វើអត្តសញ្ញាណប័ណ្ណ និងកឹបកេងប្រាក់ រាប់រយលានរៀល ដែលនាយកដ្ឋានស្ថិតិ បានផ្តល់ឲ្យ សម្រាប់បំពេញការងារ ជំនាញមួយនេះ រយៈពេលច្រើនឆ្នាំមកហើយ ។
ការសម្រេចប្តឹងទៅ អង្គភាពប្រឆាំងអំពើពុករលួយ បែបនេះ ដោយពួកគាត់ជាមន្ត្រីនគរបាល ផ្នែកនេះ មានការបារម្ភថា ខាងថ្នាក់លើ នឹងមិនចាត់ការលើលោក ហម រដ្ឋា ជាមេខ្លោងប្រព្រឹត្តបទល្មើសនេះ ។
មន្ត្រីនគរបាលការិយាល័យស្ថិតិបានឲ្យដឹងកាលពីពេលថ្មីៗនេះថា លោក ហម រដ្ឋា បានបង្ហាញថា ច្រើនឆ្នាំដែលគាត់ បានគ្រប់គ្រង ជានាយការិយាល័យបាន ប្រើប្រាស់រូបភាព ជំរិតទារប្រាក់ពីប្រជាពលរដ្ឋ ដែលមកធ្វើសៀវភៅគ្រួសារ និង អត្តសញ្ញាណប័ណ្ណ។ ក្នុងនោះ សៀវភៅគ្រួសារមួយក្បាល ធ្វើរយៈពេលមួយថ្ងៃទទួល បាន គាត់ទារពី ៤០.០០០ រៀល-៥០.០០០ រៀល , ធ្វើរយៈពេលមួយសប្តាហ៍ ទទួលបាន ទារ ២០.០០០ រៀល , ធ្វើរយៈពេលពី ១៥-២០ ថ្ងៃ យកតម្លៃ ១០.០០០ រៀល និងធ្វើរយៈពេល មួយខែ-ពីរខែ យកតម្លៃ ៥.០០០ រៀល។
មន្ត្រីនគរបាលទាំងនោះ បានធ្វើការកត់សម្គាល់ និងប៉ាន់ប្រមាណថា ជាមធ្យម ក្នុងមួយសប្តាហ៍ លោកនាយការិយាល័យ ហម រដ្ឋា ទំនងជាកឹបកេងប្រាក់បានពីការលួច ធ្វើសៀវភៅគ្រួសារ អត្តសញ្ញាណប័ណ្ណ សៀវភៅ ក១-ក៣ និង សៀវភៅស្នាក់នៅ ក២ ប្រហែលពី ៤.០០០-៦.០០០ ដុល្លារអាមេរិក តាំងពីលោក នួន សាមិននៅ កាន់តំណែងជាស្នងការនគរបាលខេត្តកំពង់ចាម។
ប្រភពដែលបានឲ្យដឹងទៀតថា ៖ ការទារតម្លៃ អត្តសញ្ញាណប័ណ្ណវិញ ក្នុងនោះ អត្តសញ្ញាណប័ណ្ណមួយសន្លឹក ធ្វើរយៈពេលមួយថ្ងៃ តម្លៃ ៥០ ដុល្លារ , ធ្វើរយៈពេល មួយសប្តាហ៍ ២៥ ដុល្លារ , សៀវភៅ ក១-ក៣ លក់មួយក្បាល ១០.០០០ រៀល និង សៀវភៅស្នាក់នៅ ក២ លក់មួយក្បាល ២.០០០ រៀល។ ដើម្បីកុំឳ្យបែកការណ៍ ក្នុងការប្រមូលយកលុយ ពីប្រជាពលរដ្ឋ ដែលចង់បានអត្តសញ្ញាណប័ណ្ណគំរូថ្មី លោកនាយការិយាល័យ ហម រដ្ឋា បានរត់ការណ៍ផ្លាស់ប្តូរ ប្អូនប្រុសរបស់ខ្លួនម្នាក់ ឈ្មោះ ហម ប៊ុនឡេង ជាមន្ត្រីនគរបាលឃុំព្រែកពោធិ ស្រុកស្រីសន្ធរ មកឳ្យកាន់ម៉ាស៊ីនផ្ទុកទិន្នន័យ អត្តសញ្ញាណប័ណ្ណ ហើយសហការគ្នា ដោយកំណត់តម្លៃ ចំពោះអ្នកចង់បានប្រញាប់ មួយសន្លឹក ពី ៤០-៤៥ ដុល្លារ។
លោក ប៉ែន រ័ត្ន ស្នងការនគរបាល ខេត្តកំពង់ចាម បានប្រាប់ឳ្យដឹងដែរថា រឿងនេះគឺជាអំពើពុករលួយ នៅក្នុងការិយាល័យស្ថិតិ និងអត្តសញ្ញាណប័ណ្ណរបស់ នគរបាលខេត្តកំពង់ចាម បានឃុបឃិតគ្នា ជាប្រព័ន្ធលួចធ្វើអត្តសញ្ញាណប័ណ្ណ និងសៀវភៅគ្រួសារក្លែងក្លាយ គ្មានគល់បញ្ជី និង គ្មានការដឹងឮពីខាងអាជ្ញាធរ។
លោក បែន រ័ត្ន បានឳ្យដឹងបន្ថែមទៀតថា ជុំវិញករណីអំពើពុករលួយនេះ គឺទំនងជាមានមន្ត្រីនគរបាល ក្នុងការិយាល័យនេះមួយចំនួនមន្ត្រីនគរបាលតាម ស្រុក-ក្រុងមួយចំនួន និងអាចមានដល់មន្ត្រីនគរបាល ថ្នាក់នាយកដ្ឋានផ្នែកនេះ មួយចំនួនផងដែរ នឹងប្រឈមបទល្មើសព្រហ្មទណ្ឌ។ សំណុំរឿងនេះយើងបាន និង កំពុងសហការស៊ើបអង្កេត ។
ជុំវិញការចោទប្រកាន់ របស់មន្ត្រីនគរបាលការិយាល័យស្ថិតិ លើនាយការិយាល័យខ្លួនឯងនេះ បានទំនាក់ទំនងតាមទូរស័ព្ទ លោក ហម រដ្ឋា ដើម្បីសុំការបំភ្លឺពីលោក តែទូរស័ព្ទបានរោទ៍ជាច្រើនដង តែពុំមានអ្នកទទួល។ ចំណែកលោក ហម ប៊ុនឡេង ជាប្អូនប្រុសវិញ បានឆ្លើយបដិសេធ ចំពោះការចោទប្រកាន់ដែលថា លោកជាអ្នកកាន់ម៉ាស៊ីន ផលិតអត្តសញ្ញាណប័ណ្ណ បានឃុបឃិតប្រព្រឹត្តអំពើពុករលួយ គឺគ្រាន់តែជាពាក្យចចាមអារាមប៉ុណ្ណោះ ៕
លោក ប៉ែន រ័ត្ន ស្នងការនគរបាលខេត្តកំពង់ចាម
