ទីបំផុតទៅអំពើហិង្សាមួយបានផ្ទុះឡើងរវាងមន្ត្រី អាជ្ញាធរខណ្ឌដូនពេញដែលការពារនៅទីលានប្រជាធិបតេយ្យ និងក្រុមលោកស្រី មួរ សុខហួរ តំណាងរាស្ត្រជាប់ឆ្នោតគណបក្សសង្គ្រោះជាតិដែលបានព្យាយាម ចូលទៅកាន់ទីលានប្រជាធិបតេយ្យ។ ជាលទ្ធផលមនុស្ស ១០នាក់បានរងរបួសក្នុងនោះ មានយុវជនគណបក្សប្រឆាំង រួមទាំងអ្នកសារព័ត៌មានម្នាក់ផងដែរ។ ប៉ុន្តែអាជ្ញាធរសាលារាជធានីភ្នំពេញអះអះអាងថា លោកស្រីមួរសុខហួរជាអ្នកទទួលខុសត្រូវលើទង្វើដែលអុចអាលឱ្យមាន អំពើហិង្សានេះ។ ហើយថាទង្វើនេះ គឺជាការចងភ្ជាប់នឹងបញ្ហានយោបាយ ។ ចំណែក មន្ត្រីអង្គការសង្គមស៊ីវិល បានសម្តែងការសោកស្តាយចំពោះព្រឹត្តិការណ៍ហិង្សានោះ។
៣នាក់រងរបួសធ្ងន់ និង ៧នាក់ផ្សេងទៀតបានរងរបួសស្រាល ក្នុងអំពើហិង្សាមួយរវាងកម្លាំងសន្តិសុខខណ្ឌដូនពេញ និងក្រុមលោកស្រីមួរ សុខហួរដែលបានប្រឈមដាក់គ្នាកាលពីព្រឹកថ្ងៃចន្ទនេះនៅទីលាន ប្រជាធិបតេយ្យ។ អំពើហិង្សាបានផ្ទុះឡើងមួយរយៈពេលខ្លីនៅម៉ោងប្រមាណ៨ព្រឹក នៅពេលដែលក្រុមសន្តិសុខខណ្ឌដូនពេញ ដែលមានពាក់មួកសុវត្ថិភាព បានសែងតំណាងរាស្ត្រគណបក្សសង្គ្រោះជាតិរូបនេះ ចេញពីទីលានប្រជាធិបតេយ្យ។
អ្នករងរបួសធ្ងន់ទាំងបីនាក់នោះ គឺយុវជនគណបក្សសង្គ្រោះជាតិពីរនាក់ និងជំនួយការផ្ទាល់លោកស្រីមួរ សុខហួរម្នាក់ផងដែរ។ អ្នកទាំងបីនាក់នោះមានឈ្មោះថា ស្រេង គឹមស្រ៊ុន ស្រីសាម៉ៃ និង សារវ័ន្ត ដែលភាគច្រើនរងរបួសចំក្បាល។ ដោយឡែកអ្នកសារព័ត៌មានម្នាក់ និងមនុស្ស៦នាក់ផ្សេងទៀតរបួសស្រាល។
អ្នកនាំពាក្យសាលារាជធានីភ្នំពេញលោក ឡុង ឌីម៉ង់ បានអះអាងថា អាជ្ញាធរមិនទទួលខុសត្រូវនោះទេ ព្រោះថា លោកស្រីមួរសុខហួរជាអ្នកអុជអាលបង្កឱ្យមានអំពើហិង្សានេះកើត ឡើង។
ម្យ៉ាងទៀតតំណាងរាស្ត្របក្សប្រឆាំងរូបនេះ កំពុងចងភ្ជាប់បញ្ហាទីលានប្រជាធិបតេយ្យជាមួយនឹងបញ្ហានយោបាយ និងកំពុងបង្កើនប្រជាប្រិយភាពផ្ទាល់ខ្លួនដោយចងភ្ជាប់នឹងបញ្ហា របស់កម្មករ។ លោកឡុង ឌីម៉ង់ ក៏បានស្នើសុំឱ្យលោកស្រីតំណាងរាស្ត្របញ្ឈប់សកម្មភាពបញ្ឆេះកំហឹង ទាំងនេះ។
ដោយឡែកលោក អំ សំអាត មន្ត្រីស៊ើបអង្កេតជាន់ខ្ពស់របស់អង្គការលីកាដូចដែលជាសាក្សីឃើញ ផ្ទាល់ភ្នែក បានសម្តែងការសោកស្តាយចំពោះព្រឹត្តិការណ៍ហិង្សានេះ។ សូមរំលឹកថា លោកស្រីមួរ សុខហួរបានទៅកាន់ទីលានប្រជាធិបតេយ្យជាញឹកញយ ដើម្បីទាមទារឱ្យបើកចំហរសម្រាប់សម្តែងមតិឡើងវិញ បន្ទាប់ពីរដ្ឋាភិបាលបានប្រកាសបិទតាំងពីក្រោយអំពើហិង្សាបង្ហូឈាម លើផ្លូវវេងស្រេងកាលពីដើមខែមករាកន្លងទៅ។
គិតត្រឹមថ្ងៃទី២១ មេសានេះវាជាការព្យាយាមចូលទីលានប្រជាធិបតេយ្យលើកទី៦ហើយ របស់លោកស្រីមួរ សុខហួរ។
លោកអំ សំអាត បានអំពាវនាវបញ្ឈប់ការប្រើប្រាស់អំពើហិង្សាលើពលរដ្ឋខ្មែរគ្រប់ និន្នាការ។ មន្ត្រីស៊ើបអង្កេតរូបនេះ ក៏បានបន្ទោសអាជ្ញាធរមានសមត្ថកិច្ចថា បានបើកដៃឱ្យមានការប្រព្រឹត្តអំពើហិង្សានេះឡើងដោយមិនបានចាប់ខ្លួន ឬឃាត់ខ្លួនអ្នកប្រព្រឹត្តនោះទេ។
យ៉ាងណាក៏ដោយ អំពើហិង្សារវាងក្រុមសន្តិសុខ និងក្រុមលោកស្រីមួរ សុខហួរ នឹងអាចកើតឡើងសារជាថ្មីទៀត ព្រោះថា តំណាងរាស្ត្រជាន់ខ្ពស់រូបនេះ នៅតែរក្សាជំហរចូលទៅកាន់ទីលានប្រជាធិបតេយ្យជារៀងរាល់ថ្ងៃ រីឯក្រុមសន្តិសុខនិងអាជ្ញាធរនៅតែរក្សាជំហរបិទផ្ទប់ទីលាន ប្រជាធិបតេយ្យដដែល៕
