អនុរក្សពន្ធនាគារព្រៃស ដែលមិនពេញចិត្តនិងទង្វើស៊ីខ្ទុះ ស៊ីឈាមរបស់អ្នកទោស និងក្រុមគ្រួសារអ្នកទោស ដោយពុករលួយខ្លាំងក្លាពេក របស់មេៗគុកព្រៃស បានខ្សឹបដាក់ត្រចៀកនគរសន្តិភាពថា គុកព្រៃស ដែលកំពុង គ្រប់គ្រងដោយលោក ស្រ៊ុន លាង សព្វថ្ងៃនេះ អ្នកមានលុយលត់ដំតាមបែបអ្នកមាន អ្នកក្រលត់ដំ តាមបែបអ្នកក្រ មានហាងឆេងទាំងអស់ជាប់គុកមានលុយ ស៊ីស្រួលដេកស្រួល ដូចផ្ទះខ្លួនឯង ខុសពីខាងក្រៅគុក ត្រង់ខ្វះម៉ាស៊ីនត្រជាក់ ខារាអូខេ ស្រីស្អាតកំដរតែប៉ុណ្ណោះ ។
អនុរក្សពន្ធនាគារដដែលបានខ្សឹបបញ្ជាក់ទៀតថា មានលុយមិនបាច់ខ្លាចជាប់គុកទេ ជាប់គុកមានលុយចាយ ដូចដេកផ្ទះខ្លួនឯងអញ្ចឹង ព្រោះនៅក្នុងគុកព្រៃស សព្វថ្ងៃ វាមានហាងឆេងទាំងអស់ ចាប់តាំងពីចំណីចំណុក របស់ របរប្រើប្រាស់ បន្ទប់តូច បន្ទប់ធំ ចង្អៀត ឬទូលាយកង្ហាតូច កង្ហាធំ ប្រើប្រាស់ទឹក ប្រើប្រាស់ភ្លើង ប្រើប្រាស់ទូរស័ព្ទ វីងដាក់ប្រាក់ ដកប្រាក់ ៘
ប្រភពខាងលើបន្តថា ជាក់ស្តែង សព្វថ្ងៃនៅក្នុងគុកព្រៃស មានអគារ A ,B និង C បើនិយាយពីហាងឆេង គឺនៅក្នុងអគារ A ការប្រើប្រាស់ភ្លើងបំភ្លឺទាំងយប់ថ្ងៃ ។ ហាងឆេងតភ្លើងចូលដំបូង គឺតម្លៃ ១០០ ដុល្លារ មិនថា បន្ទប់ណាទេ ឱ្យតែ (អ្នកទោសណាម្នាក់ ឬរូមគ្នានៅក្នុងបន្ទប់ណាមួយ) បង់ ១០០ដុល្លារ មានភ្លើងតចូល ឱ្យប្រើប្រាស់ ភ្លាម ប៉ុន្តែបើប្រើកង្ហាមួយត្រូវបង់ ៦០ ម៉ឺនរៀល ក្នុង ១ ខែ សម្រាប់បន្ទប់ធំ បើប្រើកង្ហា ២ ត្រូវបង់ ៦០ ម៉ឺន គុណនឹង ២ ដាច់ អត់ចុះឱ្យម៉ារៀលទេ ។
បច្ចុប្បន្ននេះ នៅក្នុងអគារ A មានបន្ទប់ពិសេសតភ្លើងចូល និងប្រើកង្ហាស្ទើរតែទាំងអស់ទៅហើយ ដែល គេហៅថា បន្ទប់ពិសេស មានដូចជា បន្ទប់លេខ ៥ លេខ ៦ លេខ ៧ លេខ ១០ និងលេខ ១៥ ប្រើកង្ហាធំ ឬហៅថា បន្ទប់ពិសេស ឯបន្ទប់លេខ ១៤ និង១៦ អត់ពិសេសទេ ពួកអ្នកទោសក្រៗ អត់លុយបង់ ។
អគារ B ជាន់ក្រោម បន្ទប់លេខ ៨ លេខ ៣ និងជាន់លើបន្ទប់លេខ ១៩ លេខ ១៧ ជាបន្ទប់មានភ្លើងកង្ហា តូច-ធំប្រើគ្រប់គ្រាន់ ហើយអ្នកទោសរស់នៅយ៉ាងទូលាយ ផាសុកភាព ។ នៅអគារ B ក៏មានបន្ទប់អ្នកទោសធ្វើ សិប្បកម្ម នៅបន្ទប់លេខ ១១-១២-១៣-១៤-១៦-១៨ ធ្វើការហត់ អត់ភ្លើងហើយអត់កង្ហាទៀត ។
នៅអគារ C មានបន្ទប់លេខ ៥ និងលេខ ២០ ជាបន្ទប់ពិសេស បន្ទប់លេខ ១ និងលេខ ៩ មានតែភ្លើងអត់ ដាក់កង្ហាទេ ។
ប្រភពឱ្យដឹងទៀតថា បើអ្នកទោសអត់លុយ ហើយចង់នៅក្នុងបន្ទប់ពិសេស ត្រូវធ្វើជាអ្នកគក់ច្របាច់ឱ្យគេ (អ្នកមានៗ) និងគក់ច្របាច់ជូនលោកមេបន្ទប់ ។ ចំណែកសាច់ញាតិ ដែលចង់ទៅមើលសួរសុខទុកបងប្អូន ឥឡូវធូរបន្តិច ពីមុនឈរមើលពីខាងក្រៅចំរ៉ឹងដែក គេយក ១០០០០ រៀល ឥឡូវនៅតែ ៥០០០ រៀល ទេ បើចូលទៅមើលក្នុងចំរ៉ឹងដែក បានជួបផ្ទាល់ ពីមុនគេយក ១០ ដុល្លារ ឥឡូវសល់តែ ១០០០០ រៀលទេ ។
ចំណែកអ្នកទោស មានលុយចង់ឡុកឡាក់ ហាំបឺហ្គើរ ឬគុយទាវ កាហ្វេល្បីៗឆ្ងាញ់ៗប្រើគេឱ្យទៅទិញ គ្រាន់តែឱ្យលុយអនុរក្ស និងប្រធានអគារ មេបន្ទប់ចាយ រាល់ពេលទៅបានហើយ ចំណែកអ្នកទោសក្រៗវិញ ស៊ីបាយ និងម្ហូបរបបគុកក្នុង ១ ថ្ងៃ ២៨០០រៀល ហ្នឹង គឺមានត្រកួនស្លជាមួយត្រីស្អុយ ឬសាច់សំណល់ដូចបាយឆ្កែអញ្ចឹងទៅ ។
បើនិយាយពីការប្រើប្រាស់ទឹក ក្នុង ១ បន្ទប់ដាច់ខាតត្រូវបង់ ១៥ ម៉ឺនរៀល បើមិនចង់កុំថា ដល់ទឹកងូតសូម្បី ទឹកលាបខ្លួនក៏អត់ដែរ ។ ទឹកហើយនិងភ្លើង គឺមានលោកនាយឈ្មោះ ផឹង គឹមហាន ជាអ្នកដើរប្រមូលលុយទាំងអស់ពី គ្រប់អគារ និងជាកូនចៅអ្នកទោស ហេង ពៅ ជួយប្រមូលថ្លៃភ្លើងឱ្យដែរ ។
អនុរក្សបានខ្សឹបបន្តថា បើនិយាយពី រឿងក្នុងគុកព្រៃស គឺគ្មានខ្វះអ្វីទេ ចង់ទិញស្អីស៊ី ចង់ផឹកស្អីក៏មាន គ្រាន់តែគេលក់ក្នុងគុកនោះវាថ្លៃ ដូចជាមីមួយកញ្ចប់ ២០០០ រៀលឯណោះ គឺនិយាយរួមតម្លៃអ្វីៗស្មើនឹង ២ ដង នៃតម្លៃខាងក្រៅ បើទូរស័ព្ទ និងវីងដកប្រាក់វិញ តម្លៃស្មើនឹង ៣ ដង នៃតម្លៃក្រៅគុក ។
ប្រភពដដែលបញ្ជាក់ថា បើនិយាយពីចំថ្ងៃបុណ្យធំៗ ត្រូវលើកលែងទោសវិញ អ្នកទោសណាដាក់ពាក្យសុំ លើកលែងទោស ១ ច្បាប់ ១០០ ដុល្លារ គេទទួលភ្លាមៗ បើទោសជិតផុត ចង់ឱ្យរួចតែម្តង វាមានតាមគន្លាក់ទៀត គឺវាមានអាជិតផុតទៅហើយ ៥០០ ដុល្លារ ហើយអាចនៅសល់រៀងយូរបន្តិចដែរ ១០០០ ដុល្លារ សម្រាប់ពាក្យមួយ គឺឱ្យតែគេទទួលពាក្យ ហើយដឹងតែពីរួចចេញពីគុកតែម្តង ។
នគរសន្តិភាព មិនអាចទាក់ទងលោក គុយ ប៊ុនសរ អគ្គពន្ធនាគារ និងលោក ស្រ៊ុន លាង មេគុកព្រៃស ដើម្បីសួរគាត់ថា តើការខ្សឹបខាងលើនេះមានពិតមែន ឬយ៉ាងណាទេ ៕
