លោក នូ សុផល ប្រធានមន្ទីរទេសចរណ៍ខេត្តព្រះសីហនុបានឲ្យដឹងថា ក្នុងពិធី បុណ្យចូលឆ្នាំថ្មី ប្រពៃណីជាតិខ្មែរចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០១៥នេះ ខេត្តព្រះសីហនុទទួលបានភ្ញៀវទេសចរជាតិ និងអន្តរជាតិសរុបចំនួន ៧០.៩៤៥នាក់ មាន ការកើនឡើងចំនួន៣៤% បើប្រៀបធៀបរយៈពេលដូចគ្នានៃពិធីបុណ្យចូលឆ្នាំខ្មែរឆ្នាំ ២០១៤ ។ ក្នុងនោះភ្ញៀវទេសចរជាតិមានចំនួន ៦៣.១៤១នាក់ កើនឡើង ២៩% និងភ្ញៀវទេសចរអន្តរជាតិចំនួន ៧.៨០៧នាក់ កើនឡើង ៨៤% ។
លោកប្រធានមន្ទីរទេសចរណ៍ មានប្រសាសន៌ឲ្យដឹងបន្ថែមទៀតថា ខេត្តព្រះសីហនុជាតំបន់ទេសចរណ៍ធម្មជាតិ តភ្ជាប់តំបន់ទេសចរណ៍ក្នុងខេត្តចំនួន៣ នាទិសនិរតី ក្នុងនោះមានខេត្តព្រះសីហនុ កំពត និងខេត្តកែប ព្រោះភ្ញៀវទេសចរមកលេងកម្សាន្តខេត្តព្រះសីហនុអាចធ្វើដំណើរទៅកម្សាន្តបន្តនៅបូកគោ ខេត្តកំពត រួចអាចធ្វើដំណើរបន្តទៅបញ្ចប់ដំណើរកម្សាន្តនៅខេត្តកែប ឬភ្ញៀវទេសចរអាច មកលេងកម្សាន្តនៅខេត្តកែប រួចបន្តមកបូកគោ និងទៅបញ្ចប់នៅខេត្តព្រះសីហនុ ។
ដោយបច្ចុប្បន្នភ្ញៀវទេសចរមកកំសាន្តនៅខេត្តព្រះសីហនុ ពួកគេមិនអាចបំភ្លេចទៅកំសាន្តនៅតាមបណ្តាកោះនានា ក្នុងនោះមានដូចជាកោះឬស្សី កោះព្រីង កោះរុងសន្លឹម កោះតូច ភូមិសុខសាន្ត និងនៅមានកោះជាច្រើនផ្សេងទៀត ដែលជាតំបន់ទេសចរទាក់ទាញយ៉ាងសំខាន់សម្រាប់ខេត្តមាត់សមុទ្រ ។
លោក នូ សុផល បានបន្តថា ការកើនឡើងនូវភ្ញៀវទេសចរ ដោយសារមន្ទីរទេសចរ បានសហការជាមួយអាជ្ញាធរក្រុង ខេត្ត ធ្វើការផ្សព្វផ្សាយជូនដល់បងប្អូនអាជីវករ ប្រកបមុខរបរទេសចរ នៅតាមមាត់សមុទ្រ ផ្ទះសំណាក់ សណ្ឋាគារ អាហារដ្ឋាន ត្រូវចូលរួមសហការថែរក្សាអនាម័យ បរិស្ថានឪ្យបានស្អាតជាប់ជាប្រចាំនៅតាមកន្លែងរៀងៗខ្លួន ពិសេសបញ្ហាតម្លៃសេវាម្ហូបអាហារត្រូវសរសេរក្នុងតារាងឪ្យបានត្រឹមត្រូវ ។
គួរបញ្ជាក់ថា ពិធីបុណ្យចូលឆ្នាំថ្មីប្រពៃណីខ្មែរឆ្នាំ២០១៤ ខេត្តព្រះសីហនុទទួលបានភ្ញៀវទេសចរជាតិ និងអន្តរជាតិចំនួន ៥៣.១២០នាក់ ។ ក្នុងនោះភ្ញៀវជាតិមានចំនួន ៤៨.៨៧១នាក់ និងភ្ញៀវអន្តរជាតិចំនួន ៤.២៤៩នាក់ ។
យោងតាមរបាយការណ៏របស់ស្នងការនគរបាលខេត្តព្រះសីហនុ បានអោយដឹងថា នៅវេលាម៉ោង ២៣ និង ៣០នាទី ថ្ងៃទី ១៦ ខែ មេសា ឆ្នាំ ២០១៥ កំលាំងរបស់អធិការ សហការជាមួយប៉ុស្តិ៏រដ្ឋបាល បានធ្វើការឃាត់ខ្លួន ជនសង្ស័យក្មេងស្រី ចំនួន ០៦នាក់ ដែលកំពុងដើរលួចសំភារៈតាមឆ្នេរ ក្នុងនោះបានឃាត់ខ្លួនមុខសញ្ញាជនសង្ស័យមានឈ្មោះ ១- ឈ្មោះ ប្រុស ដារី ភេទ ស្រី អាយុ ១៦ឆ្នាំ , ២- ឈ្មោះ ម៉ៅ រី ភេទ ស្រី អាយុ ១៥ឆ្នាំ , ៣- ឈ្មោះ សេង ជួច ភេទ ស្រី អាយុ ១៣ឆ្នាំ , ៤- ឈ្មោះ ហង្ស ស្រីនិច ភេទ ស្រី , ៥- ឈ្មោះ ទី ធីតា ភេទ ស្រី , ៦- ឈ្មោះ ស្វាយ ថន ភេទ ស្រី អាយុ ៤៧ឆ្នាំ (អ្នកទទួលផលចោរកម្ម) និង បានដកហូតវត្ថុតាងរួមមាន កាបូបយួរដៃ ពណ៌ក្រហម ចំនួន ០១ កូនសោរថយន្តមួយចំនួន ទូរស័ព្ទ ០១គ្រឿង និង លុយចំនួន ៥០ដុល្លារ ។
ក្រោយពេលសាកសួរ នៅស្នងការរួចរាល់ ក៏ត្រូវបានបញ្ជូនជនសង្ស័យចំនួន ០៣នាក់ មានឈ្មោះ ប្រុស ដារី , ម៉ៅ រី និង ស្វាយថន ឡើងទៅតុលាការ រីឯ៣នាក់ទៀត ត្រូវបានប្រគល់អោយក្រុមគ្រួសារ យកទៅធ្វើការអប់រំ ព្រោះជាអនិតិជន មិនទាន់គ្រប់អាយុ ។
ដោយឡែកតាមការអោយដឹងពីលោក ព្រហ្ម ពៅ ប្រធាននគរបាលចរាចរណ៏ជើងគោកអោយដឹងថា រយៈពេល៣ថ្ងៃ ចូលឆ្នាំខាងលើនេះ គ្រោះថ្នាក់ចរាចរណ៏កើតឡើង ៦ករណី ក្នុងនោះរបួស៦ ស្លាប់៣នាក់ និង ឃាត់ម៉ូតូក្មេងទំនើង ចំនួន ៧គ្រឿង និង មនុស្សជាង១០នាក់ ដែលបើកម៉ូតូបង្ករភាពចលាចលនៅពេលចូលឆ្នាំ យកមកអប់រំណែនាំ និងដោះលែងអោយទៅវិញផងដែរ ។
