ខេត្តព្រះសីហនុ៖ លោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ នាវេលាម៉ោង ១០ និង ០០ នាទី ព្រឹក ថ្ងៃទី ៦ ខែ មេសា ឆ្នាំ ២០១៥ បានដឹកនាំកម្លាំងមន្ត្រីកងរាជអាវុធហត្ថខេត្ត ចុះទៅសាកសួរសុខទុក្ខលោកអនុសេនីយ៍ទោ សួន សៀប ដែលជាមន្ត្រីកងរាជអាវុធហត្ថខេត្តកំពុងមានជំងឺសំរាកព្យាបាលនៅគេហដ្ឋានរបស់លោកស្ថិតក្នុងក្រុមទី ២១ ភូមិ ៣ សង្កាត់ ១ ក្រុងព្រះសីហនុ ខេត្តព្រះសីហនុ។
ក្នុងឱកាសចុះសាកសួរសុខទុក្ខនាពេលនោះ ឯកឧត្តមរួមនឹងមន្ត្រីក្រោមឱវាទរបស់លោក បានពាំនាំនូវថវិការចំនួន ១លាន ៧សែន និង ១០០ដុល្លា ជូនដល់អ្នកជំងឺផងដែរ។ ជាងនេះទៅទៀត លោកឧត្តមសេនីយ៍ត្រី ហេង ប៊ុនទី ក៏បានទំនាក់ទំនងទៅលោក សេង ណុង ប្រធានមន្ទីរពេទ្យចំការចេក ក្រុងព្រះសីហនុ ដើម្បីនាំយកលោក សួន សៀប ដែលកំពុងមានជំងឺនោះ នាំយកទៅមន្ទីរពេទ្យខាងលើ ដើម្បីសង្គ្រោះព្យបាលផងដែរ។ ឆ្លៀងក្នុងឱកាសទៅសាកសួរសុខទុក្ខអ្នកជំងឺ លោកមេបញ្ជាការកងរាជអាវុធហត្ថខេត្តព្រះសីហនុ បានសំណេះសំណាលសួរសុខទុក្ខបងប្អូនប្រជាពលរដ្ឋដែលរស់នៅមូលដ្ឋានក្បែរៗនោះ ហើយបានផ្តាំផ្ញើចំពោះបងប្អូនយើងថា បើមានហេតុការណ៍អ្វីកើតឡើង សូមរាយការណ៍ជាបន្ទាន់ទៅកម្លាំងកងរាជអាវុធហត្ថរបស់លោក លោកនឹងចាត់កម្លាំងមកជួយអន្តរាគមន៍អោយទាន់ពេលវេលា ដើម្បីការពារសន្តិសុខជូនដល់បងប្អូនដែលរស់នៅតំបន់នេះ។
លោកបន្តទៀតថា យើងទាំងអស់គ្នាដែលប្រជាពលរដ្ឋនៅតំបន់នេះគប្បីចូលរួមទាំងអស់គ្នា ដើម្បីលុបបំបាត់ចោលនូវចោរកម្ម គ្រឿងញៀន ល្បែងស៊ីសងគ្រប់ប្រភេទ ជាបច្ច័យមិនល្អដល់សង្គមជាតិ ព្រោះថាសកម្មភាពទាំងនេះវាប្រាសចាកពីច្បាប់រដ្ឋ។ ជាងនេះទៅទៀតដោយមើលឃើញពីទុក្ខលំបាករបស់លោកស្រី ពៅ រី អាយុ ៥២ ឆ្នាំ មានមុខរបរជាអ្នកបោកខោអាវតាមផ្ទះ មានទីលំនៅចំណុចខាងលើ ដោយសារតែអ្នកស្រីខ្វះទីជំរក លោកក៏បានផ្តល់ថវិការ ចំនួន ២០០ ដុល្លា សហរដ្ឋអាមេរិក និងសន្យាជួយដំបូល និង ជញ្ជាំងផ្ទះ ដល់អ្នកស្រី ដើម្បីអោយមានជំរកសមរម្យនឹងគេ ព្រោះរដូវវស្សាជិតមកដល់ហើយ ហើយមនុស្សម្នាក់ៗត្រូវការជំរកជាចាំបាច់ ក្នុងការរស់នៅប្រកបអាជីវកម្ម ។
