ប្រជាពលរដ្ឋនៅស្រុកឯកភ្នំ ខេត្តបាត់ដំបង ចោទប្រកាន់មន្ត្រីរដ្ឋបាលជលផលព្រែកទាល់ និងសមត្ថកិច្ចមូលដ្ឋាន ថាឃុបឃិតគ្នាប្រព្រឹត្តបទល្មើសនេសាទ ដោយឲ្យប្រជាពលរដ្ឋប្រើឧបករណ៍ឆក់យកត្រីក្នុងតំបន់អភិរក្ស ធ្វើឲ្យហិនហោចអស់ត្រីគ្មានសល់។
ប្រជាពលរដ្ឋនៅតំបន់នេសាទនោះអះអាងថា ប្រសិនបើសមត្ថកិច្ចនៅតែមិនបញ្ឈប់សកម្មភាពប្រជាពលរដ្ឋឆក់ត្រីក្នុងតំបន់អភិរក្សទេ នោះត្រីទាំងតូចធំវានឹងហិនហោចអស់ពីតំបន់នោះក្នុងពេលឆាប់ៗ។
ប្រជាពលរដ្ឋម្នាក់ គឺលោក វ៉ី រស់នៅភូមិបាក់ព្រា ឃុំព្រៃចាស់ ស្រុកឯកភ្នំ ខេត្តបាត់ដំបង ឲ្យដឹងនៅថ្ងៃទី៣១ មីនា ថា ប្រជាពលរដ្ឋចូលទៅឆក់ត្រីយ៉ាងអនាធិបតេយ្យនៅក្នុងតំបន់អភិរក្សនៅព្រែកតាភព នៃភូមិបាក់ព្រា ឃុំព្រៃចាស់ ធ្វើសកម្មភាពខ្លាំងប្រមាណមួយខែមកហើយ ដោយពុំមានអាជ្ញាធរទប់ស្កាត់នោះទេ។ លោកបន្តថា សកម្មភាពលួចឆក់ត្រីប្រើឧបករណ៍ខុសច្បាប់របស់ប្រជាពលរដ្ឋនេះ ដោយសារមន្ត្រីជលផល និងសមត្ថកិច្ចមូលដ្ឋាននៅតំបន់នោះ ឃុបឃិតគ្នា ទើបរឿងនេះអាចដំណើរការទៅបាន ។ គេឆក់ត្រីនៅពេលយប់ ចំណែកឯពេលថ្ងៃវិញ គឺគេបិទមិនឲ្យប្រជាពលរដ្ឋចូលទៅតំបន់នោះទេ។ ចំពោះត្រីដែលគេរកបាន គឺគេហៅម៉ូយឲ្យចូលទៅទិញដល់ទីកន្លែងតែម្ដង»។
ឆ្លើយតបនឹងការចោទប្រកាន់នេះ នាយផ្នែករដ្ឋបាលជលផលឃុំព្រែកទាល់ លោក សៀង ដារិទ្ធ មានប្រសាសន៍ថា អាជ្ញាធរពាក់ព័ន្ធតែងចុះបង្ក្រាបបទល្មើសនេសាទគ្រប់ប្រភេទ ដោយមិនគិតពីការនឿយហត់ឡើយ ហើយក៏មិនអនុញ្ញាតឲ្យប្រជាពលរដ្ឋណាម្នាក់ចូលទៅឆក់ត្រីនៅក្នុងតំបន់អភិរក្ស ដូចការចោទប្រកាន់របស់អ្នកភូមិនោះទេ ។ នៅក្នុងនោះក៏មានអ្នកលួចទៅប្រព្រឹត្តបទល្មើសនេសាទខ្លះដែរ ដោយសារតំបន់នេសាទនោះវាធំ តែគ្មានបទល្មើសអ្វីធំដុំដូចអ្នករាយការណ៍នោះទេ»។
ទោះយ៉ាងនេះក្ដី មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង លោក យិន ម៉េងលី មានប្រសាសន៍ថា កន្លងមកលោកសង្កេតឃើញសកម្មភាពនេសាទដោយខុសច្បាប់ តែងកើតមានជាញឹកញាប់នៅតំបន់ភូមិបាក់ព្រា នោះ ហើយពុំមានសមត្ថកិច្ចណាទប់ស្កាត់បាននៅឡើយទេ។ លោក យិន ម៉េងលី ចាត់ទុកការឆ្លើយបដិសេធរបស់មន្ត្រីជលផលនេះ ថាគ្រាន់ជាលេសមួយ ដើម្បីដោះបន្ទុកពីការទទួលខុសត្រូវរបស់ខ្លួនប៉ុណ្ណោះ ។ រឿងនេះពិតជាកើតមាននៅតំបន់នេសាទនោះ។ បញ្ហានេះ ទាំងប្រជាពលរដ្ឋ និងមន្ត្រីពាក់ព័ន្ធ ត្រូវរួមគ្នាថែរក្សាសម្បត្តិធនធានជាតិនេះឲ្យបាន»។
