ខេត្តព្រះសីហនុ៖លោកវរសេនីយ៍ឯក ស៊ាង ឡេង ប្រធានប៉ុស្តិ៍ច្រកទ្វារកំពង់ផែអន្តរជាតិ ក្រុងព្រះសីហនុឱ្យដឹងថា នៅព្រឹកថ្ងៃទី០១ ខែមេសា ឆ្នាំ២០១៥ នាវាទេសចរណ៍មួយគ្រឿងមានឈ្មោះ QUEEN ELIZABATH ធ្វើដំណើរមកពីប្រទេសថៃ បាននាំភ្ញៀវទេសចរចម្រុះជាតិសាសន៍ចំនួន ១.៨៩៦នាក់ ចូលចតនៅកំពង់ផែអន្តរជាតិក្រុងព្រះសីហនុ ដើម្បីធ្វើទស្សនកិច្ចរយះពេលមួយថ្ងៃ មុនពេលធ្វើដំណើរចាកចេញទៅកាន់ប្រទេសសិង្ហបុរី នៅល្ងាចថ្ងៃដដែលនេះ។
លោកវរសនីយ៍ឯក ស៊ាង ឡេង បានឱ្យដឹងបន្តថា QUEEN ELIZABATH មាននាវិកបំរើការងារសរុបចំនួន ៩៧៣នាក់ ហើយភ្ញៀវទេសចរចម្រុះជាតិសាសន៌ចំនួន ៣៥សញ្ជាតិផ្សេងគ្នា ។ ភ្ញៀវទេសចរដែលធ្វើដំណើរតាមនាវា QUEEN ELIZABATH ដែលមានសញ្ជាតិច្រើនជាងគេមាន អង់គ្លេស ៦៣៧នាក់ អូស្រ្តាលី ២៥៩នាក់ ជប៉ុន ២២៧នាក់ អាមេរិក ២១៨នាក់ ក្រៅពីនោះនៅមានភ្ញៀវទេសចរជាច្រើនសញ្ជាតិផ្សេងៗទៀត ហើយភ្ញៀវភាគច្រើនជាមនុស្សដែលមានវ័យចំណាស់ ។
លោកប្រធានប៉ុស្តិ៍ច្រកទ្វារអន្តរជាតិ បានបញ្ជាក់ថា នេះជានាវាទេសចរណ៍បរទេសធុនយក្ស ដែលបានចូលចតបោះយុទ្ធការនៅក្នុងលំហសមុទ្រក្រុងព្រះសីហនុ កាលពីវេលាម៉ោង៩ ព្រឹកថ្ងៃទី០១ ខែមេសា ឆ្នាំ២០១៥ ហើយនាវា QUEEN ELIZABATH មានគម្រោងចាកចេញពីដែនទឹកកម្ពុជានៅម៉ោង១៧ និង៣០នាទី ថ្ងៃដដែលឆ្ពោះទៅកាន់ប្រទេសសឹង្ហបូរី ។ ភ្ញៀវទេសចរទាំងអស់ធ្វើដំណើរឡើងគោកតាមអូប៊រចម្លងជាច្រើនគ្រឿង ដើម្បីដើរទស្សនាចរក្នុងក្រុងព្រះសីហនុពិសេសតាមតំបន់ឆ្មេរ និងរមណីយដ្ឋាននានា ៕
