ពលករចំណាកស្រុក ទាំងអ្នកស្របច្បាប់ និងអ្នកចាក ចេញដោយ ពុំស្របច្បាប់ទៅធ្វើការនៅ ប្រទេសថៃ បានក្លាយទៅ ជា ចំណាប់ខ្មាំង របស់នគរបាល វរៈការពារព្រំដែន ៨១៧ ដោយសារតែ ការធ្វើចំណាកស្រុក របស់ពលករ ទាំងអស់នោះ បានតម្រូវឱ្យបង់ប្រាក់ មុននឹងទៅធ្វើការ នៅប្រទេសថៃ នោះ ។
តាមប្រភពពីមន្ត្រីនគរបាលការពារព្រំដែន ៨១៧ បានឱ្យដឹងថា ការយកប្រាក់ពីពលករចំណាកស្រុកចូលដី ថៃ ក្នុងមួយនាក់ ត្រូវបង់ ១ម៉ឺនរៀល ឬក៏ ១០០បាត គឺទុកបែងចែកឱ្យកងកម្លាំងសមត្ថកិច្ចផ្សេងៗ ដែលឈរជើងនៅតាមខ្សែបន្ទាត់ព្រំដែន ។
ប្រភពដដែលបានឱ្យដឹងទៀតថា លោក អួង ខុន នាយរងប៉ុស្តិ៍គីឡូម៉ែត្រលេខ ៩ នគរបាលវរៈការពារព្រំដែនគោកលេខ ៨១៧ ឃុបឃិតគ្នាយកប្រាក់ពីពលករ ចំណាកស្រុក ឆ្លងដែនខុសច្បាប់ តាមច្រករបៀងនៅតាមបន្ទាន់ព្រំដែនកម្ពុជា-ថៃ ចាប់តាំងពីថ្ងៃទី ១៨ ខែមេសា ដល់ដើមខែឧសភា ឆ្នាំ២០១៤ រហូតមកទល់នឹងពេលនេះ ដែលស្ថិតនៅភូមិពោធិ៍ជ្រៃ ឃុំសេរីមានជ័យ ស្រុកសំពៅលូន ខេត្តបាត់ដំបង ។
តាមប្រភពព័ត៌មានពីពលករចំណាកស្រុកបានឱ្យដឹងថា មួយថ្ងៃការធ្វើចំណាកស្រុករាប់ពាន់នាក់បានឆ្លងដែន ទៅប្រទេសថៃទាំងថ្ងៃទាំងយប់ ដោយពួកគេបាន បង់ប្រាក់ឱ្យលោក អួង ខុន ជាអនុប្រធាននគរបាលវរៈការពារព្រំដែនគោកក្នុងម្នាក់ ១ម៉ឺនរៀល ឬក៏ ១០០បាត ហើយក្នុងមួយថ្ងៃមានពលករ ប្រហែលជា ១០០នាក់ ឆ្លងចូលតាមច្រករបៀងប៉ុស្តិ៍គីឡូលេខ ៩ នគរបាលការពារព្រំដែន ៨១៧ ដោយពុំមានការទប់ស្កាត់ឡើយ ។
ទាក់ទិននឹងការចោទប្រកាន់របស់ពលករចំណាកស្រុកខុសច្បាប់ចោទលោក អួង ខុន អនុប៉ុស្តិ៍គីឡូម៉ែត្រ លេខ ៩ អ្នកយកព័ត៌មានយើងមិនអាចទាក់ទង ដើម្បីធ្វើការបកស្រាយ ការចោទពីសំណាក់ប្រជាពលករ កាលពីថ្ងៃ ម្សិលមិញបានឡើយ ៕
