ចិន៖ យើងធ្លាប់តែឃើញករណីជាច្រើន ចោរគាស់ រឺក៏វាយកំទេចទូរ អេធីអឹម ដើម្បីប្លន់លុយនៅក្នុងទូរនោះ ប៉ុន្តែបុរស ខាងក្រោមបែបជាទូរកំទេចទូរ អេធីអឹម ព្រោះចង់ជាប់គុកទៅវិញ។ បុរសម្នាក់មានអាយុ ២០ឆ្នាំមកពីតំបន់ Anhui ប្រទេសចិន ត្រូវគេកាមេរ៉ាសុវត្ថិភាពថតបានសកម្មភាពរបស់គាត់កំពុងតែព្យាយាមបំផ្លាញម៉ាស៊ីនអេធីអឹមនៅក្នុង ទីក្រុងស៊ាងហៃ ។ តាមប្រភពពត៌មានបានអោយដឹងថា បុរសម្នាក់នោះប្រព្រឹត្តទង្វើបែបនេះ គឺដើម្បីអោយគេ ចាប់គាត់ ដាក់គុក ដូច្នោះគាត់អាចបរិភោគអាហារនៅក្នុងដោយឥតគិតថ្លៃ។
នៅថ្ងៃឈប់សម្រាកនៃ ពិធីបុណ្យនិទាឃរដូវ បុរសដែលមាននាមត្រកូល Zhang បានរៀបចំឥវ៉ាន់ធ្វើដំណើរចេញពី តំបន់ Anhui ទៅទីក្រុងស៊ាងហៃ ដើម្បីរកការងារធ្វើ ។ គាត់បានប្រាប់ប៉ូលីសថា គាត់មានលុយនៅក្នុងហោប៉ៅតែ ១០០យ៉ន (ប្រហែល ១៦ដុល្លារ) ប៉ុណ្នោះ ហើយគាត់បានចំណាយលុយនោះអស់ តាំងពីគាត់ឈប់នៅខេត្ត Zhejiang មកម្ល៉េះ ដោយសារហេតុផលនេះ ទើបគាត់សម្រេចចិត្តដើរពីខេត្ត Zhejiang មកទីក្រុងស៊ាងហៃ ។ បន្ទាប់ពី គាត់មិន បានហូបអាហារច្រើនពេល ព្រមទាំគ្មានប្រាក់ ដើម្បីទិញម្ហូបអាហារទៀតនោះ គាត់ Zhang ក៏បានសម្រេច ចិត្តប្រព្រឹត្តបទល្មើសនេះតែម្តង។
នៅលើផ្លូវ Weihong នៅស្រុក Jinshan នៃទីក្រុង ស៊ាងហៃ គាត់រើសបានឥដ្ឋមួយដុំ ហើយគាត់ក៏យកដុំឥដ្ឋនោះ ទៅវាយកំទេចម៉ាស៊ីនអេធីអឹមតែម្តង។ នៅពេលដែលប៉ូលីសបានមកដល់កន្លែងកើតហេតុ ប៉ូលីសមិនបានបញ្ចូន គាត់ទៅក្នុងគុកទេ ដោយឃើញថា គាត់មិនបានប្រព្រឹត្តបទល្មើសព្រហ្មទណ្ឌធ្ងន់ធ្ងរទេ គឺគ្រាន់តែធ្វើអោយខូច ស្លុតដោតកាត អេធីអឹមប៉ុណ្ណោះ ។
ហើយបន្ទាប់ ពីបានសិក្សាពីស្ថានភាពរបស់បុរសម្នាក់នេះ មន្ត្រីប៉ូលីសបានយកគាត់ទៅស្ថានីយ៍ប៉ូលីស និងបាន អោយគាត់បរិភោគអាហារដោយឥតគិតថ្លៃ ហើយដោះលែងគាត់ទៅវិញ នេះបើយោងតាមរាយការណ៍ របស់កាសែត Xinhua។
