ក្រុមឈ្មួញរកស៊ីដឹកជញ្ជូនឈើខុសច្បាប់ធំៗ នៅក្នុងខេត្តរតនគិរី ប្រមាណ ៣០ នាក់ ដោយមានបែងចែក ជាក្រុមតូចៗ ប្រចាំស្រុកនីមួយៗ ហើយក្នុងនោះ ក៏មានរាយឈ្មោះ មន្ត្រីជំនាញ និងសមត្ថកិច្ចជាច្រើនស្ថាប័ន មិនតិចជាង ៨០ នាក់ ដែលបានប្រមូលលុយប្រចាំខែ ពីក្រុមឈ្មួញ រកស៊ីដឹកជញ្ជូនឈើ ខុសច្បាប់ ជាថ្នូរនៃ ការមិនបង្ក្រាប ។
សម្រាប់ការផ្លាស់ប្តូរតំណែងអភិបាលខេត្តរតនគិរី គេតែងតែរំពឹងទុកថា អភិបាលខេត្តថ្មីដែលត្រូវឡើងជំនួសតំណែងលោក ប៉ាវ ហមផាន នឹងបង្ហាញស្នាដៃក្នុងការបង្ក្រាបបទល្មើសព្រៃឈើឲ្យមានប្រសិទ្ធភាពព្រោះថាច្រើនឆ្នាំមកហើយ ក្រោមអំណាចដឹកនាំរបស់លោក ប៉ាវហមផាន អាជ្ញាធរខេត្ត ហាក់ដូចជាមានភាពធូររលុងមិនបានយកចិត្តទុកដាក់លុបបំបាត់ភាពអនាធិបតេយ្យនៃការរកស៊ីដឹកជញ្ជូនឈើខុសច្បាប់នោះទេ ក៏ព្រោះតែមន្ត្រីជំនាញអាជ្ញាធរនិងសមត្ថកិច្ចពាក់ព័ន្ធបានទទួលផលប្រយោជន៍ជាប់ជាប្រចាំពីក្រុមឈ្មួញរកស៊ីឈើខុសច្បាប់ទាំងអស់នោះ។ យ៉ាងណាក៏ដោយ វាអាស្រ័យនៅលើឆន្ទៈរបស់ប្រធានគណៈបញ្ជាការឯកភាពប្រចាំខេត្តនីមួយៗដូចជាក្នុងខេត្តរតនគិរីជាដើម ប្រសិនបើអភិបាលខេត្តមានឆន្ទៈបង្ការ បង្ក្រាបបទល្មើសព្រៃឈើឲ្យមានប្រសិទ្ធភាពក៏អាចធ្វើទៅបានតាមរយៈកិច្ចសហការជាមួយ អង្គភាពជំនាញនិងសមត្ថកិច្ចពាក់ព័ន្ធ។
នាយខណ្ឌរដ្ឋបាលព្រៃឈើខេត្តរតនគិរី លោក វង្ស សុកសិរី ក៏មានចំណែកឃុបឃិតឲ្យមានការដឹកជញ្ជូនឈើខុសច្បាប់យ៉ាងអនាធិបតេយ្យផងដែរ ទើបអ្វីៗ អាចដំណើរការដោយរលូន។
ពាក់ព័ន្ធនឹងសកម្មភាពរកស៊ីដឹកជញ្ជូនឈើខុសច្បាប់ នៅទូទាំងខេត្តរតនគិរី គឺមិនអាចលាក់បាំងពីក្រសែភ្នែករបស់មន្ត្រីជំនាញរដ្ឋបាលព្រៃឈើ របស់លោក វង្ស សុកសិរី និងសមត្ថកិច្ចពាក់ព័ន្ធដែលកំពុងដាក់កុងត្រូលជជុះយ៉ាងប្រសេចប្រសាច នៅទូទាំងខេត្តរតនគិរីនោះទេ ប៉ុន្តែរឿងដែលគ្មានការបង្ក្រាបក៏ព្រោះតែមន្ត្រីនិង សមត្ថកិច្ចទាំងនោះទទួលបានផលប្រយោជន៍ជាប់ជាប្រចាំពីក្រុមឈ្មួញរកស៊ីដឹកជញ្ជូនឈើខុសច្បាប់ ដូចមានលាតត្រដាងនៅក្នុងរបាយការណ៍ដ៏គួរឲ្យរសើបជាច្រើនទំព័រដាក់ជូនស្ថាប័ន ពាក់ព័ន្ធរួមទាំងអង្គភាពប្រឆាំងអំពើពុករលួយ ផងដែរ ហើយរឿងសំខាន់នៅត្រង់ថា លោក ហ៊ុន សែន ហ៊ានចាត់ការលើក្រុមមន្ត្រីខិលខូចពុករលួយប្រព្រឹត្តខុសច្បាប់ទាំងនោះឬក៏អត់តែប៉ុណ្ណោះ ។
ក្នុងរបាយការណ៍ដែលទំនងជាធ្លាយចេញពីមន្ត្រីដែលមិនបានទទួលផលប្រយោជន៍ពីជំនួញឈើខុសច្បាប់ ហើយគេជឿថារបាយការណ៍នោះបានដាក់ជូនអង្គភាពប្រឆាំងអំពើពុករលួយនិងស្ថាប័ន ពាក់ព័ន្ធបានរៀបរាប់ឈ្មោះយ៉ាងលម្អិតរបស់ក្រុមឈ្មួញធំៗដែលកំពុងរកស៊ីដឹកជញ្ជូនឈើយ៉ាងអនាធិបតេយ្យក្នុងខេត្តរតនគិរីប្រមាណ៣០នាក់ ដោយមានភ្ជាប់លេខទូរស័ព្ទនិងទីតាំងប្រកប អាជីវកម្មយ៉ាងច្បាស់លាស់។
ដោយឡែក មន្ត្រីនិងសមត្ថកិច្ចពាក់ព័ន្ធប្រមាណជាង៨០នាក់មកពីជាង៣០អង្គភាពស្ថាប័នរួមមាន ក្រុមយោធា គ្រប់ប្រភេទនគរបាល សេដ្ឋកិច្ច និងនគរបាលខេត្ត កងរាជអាវុធហត្ថប្រចាំទិស ប្រចាំខេត្ត ជំនាញរដ្ឋបាលព្រៃឈើគ្រប់ជាន់ថ្នាក់និងមន្ត្រីបរិស្ថានរួមទាំងអាជ្ញាធរផងដែរ ដោយមានរៀបរាប់ឈ្មោះយ៉ាងលម្អិតនិងទីតាំងចេញធ្វើសកម្មភាពប្រដេញចាប់ឡានដឹកឈើឲ្យចូលបង់លុយនិងមានដាក់លេខទូរស័ព្ទទំនាក់ទំនងទាំងខ្សែៗផងដែរ។
របាយការណ៍នោះបានលាតត្រដាងថា ចំពោះក្រុមឈ្មួញដែលមានឡានតូចៗសម្រាប់ដឹកជញ្ជូនឈើក្នុងមួយថ្ងៃអាចដំណើរបាន៣ឬ៤ជើង ក្នុងចំណោមរថយន្ត ៣ទៅ៤ ត្រូវបង់លុយឲ្យមន្ត្រី និងសមត្ថកិច្ចទាំងនោះចាប់ពី១ម៉ឺន ដល់២ម៉ឺនដុល្លារអាមេរិកក្នុងមួយខែ ហើយឈ្មួញដទៃទៀតដែលត្រូវបង់ប្រចាំជើង គឺយ៉ាងហោចណាស់រថយន្តមួយគ្រឿងត្រូវបង់ចាប់ពី៥០ទៅ២០០ ដុល្លារអាមេរិក អាស្រ័យទៅតាមទំហំនៃការដឹកជញ្ជូនឈើ និងប្រភេទឈើ។ ឈ្មួញដែលរកស៊ីដឹកជញ្ជូនឈើខុសច្បាប់នៅទូទាំងខេត្តរតនគិរី សុទ្ធតែមានទំនាក់ទំនងល្អជាមួយមន្ត្រីជំនាញរដ្ឋបាលព្រៃឈើរបស់លោក វង្ស សុកសិរី ហើយសមត្ថកិច្ចនិងស្ថាប័នពាក់ព័ន្ធគ្រាន់តែជាជើងក្រោយប៉ុណ្ណោះបើនាយខណ្ឌរដ្ឋបាលព្រៃឈើរក្សាភាពស្ងៀមស្ងាត់មិនបង្ក្រាបបទល្មើស រួចទៅហើយនោះសមត្ថកិច្ចដទៃចាំតែប្រមូលលុយច្រកហោប៉ៅយកទៅធ្វើមានធ្វើបានផ្ទាល់ខ្លួន មិនដែលខ្វាយខ្វល់ពីការបង្ក្រាបទេ។
បើតាមកំណត់ហេតុលាតត្រដាងរឿងអាស្រូវពុករលួយរបស់ក្រុមឈ្មួញរកស៊ីដឹកជញ្ជូនឈើខុសច្បាប់និងឈ្មោះក្រុមមន្ត្រីជាង៨០នាក់ ដែលកំពុងសប្បាយប្រមូលលុយបានរាប់ម៉ឺនដុល្លារក្នុងមួយខែៗយកទៅច្រកហោប៉ៅធ្វើមានធ្វើបានផ្ទាល់ខ្លួនអាចចាត់ទុកជារឿងរសើបបំផុត ហើយយ៉ាងហោចណាស់កំណត់ហេតុដ៏មានតម្លៃនេះ អាចជាមូលដ្ឋានសម្រាប់ស៊ើបអង្កេតវែកមុខមន្ត្រីនិងសមត្ថកិច្ចពុករលួយនាំទៅផ្តន្ទាទោសតាមច្បាប់ ជាការព្រមានកុំឲ្យមន្ត្រីដទៃទៀតយកគំរូតាម ដែលយ៉ាងហោចណាស់ដើម្បីបង្ហាញអំពីការរួមចំណែកអនុវត្តន៍នយោបាយកែទម្រង់ស៊ីជម្រៅរបស់លោក ហ៊ុន សែន ឲ្យមានប្រសិទ្ធភាព ៕
