កណ្ដាល ៖ ផ្ទុះអំពើពុករលួយក្នុងសង្កាត់រដ្ឋបាលជលផលស្រុកលើកដែកខេត្តកណ្តាល ខណៈពេលដែលមន្ត្រីយោធាស្រុកចាប់ទូកនេសាទត្រីខុសច្បាប់មួយគ្រឿង តាមដងទន្លេមេគង្គ ដែលប្រព្រឹត្តឡើងដោយជនជាតិវៀតណាមកាលពីថ្ងៃទី១៤ ខែមីនា ឆ្នាំ២០១៥វេលាម៉ោង១៤និង៣០នាទីស្ថិតក្នុងភូមិ ថ្មីឃុំពាមរាំង ស្រុកលើកដែកខេត្តកណ្តាល។
ពាក់ព័ន្ធនឹងការចាប់ឃាត់ទូកប្រព្រឹត្តបទល្មើសនេសាទនោះ លោកវរសេនីយ៍ទោ ឆាំ ទូច មេបញ្ជាការយោធាស្រុកលើកដែកបានឲ្យដឹងថា ទូកនេសាទនោះ បានប្រើឧបករណ៍មងគ្រប ដែលជាមងប្រភេទបីជាន់ ប្រើទូកអូស ដោយមានម៉ាស៊ីនអូសដល់ទៅពីរគ្រឿង និងមានបំពង់ខ្យល់សម្រាប់មុជទឹកទៀតផង។
បន្ទាប់មកលោកបានហៅអ្នកនេសាទ ដែលនៅលើទូកមានគ្នា៤នាក់មកសួរនាំ ទើបបែកធ្លាយរឿងអាថ៌កំបាំងថានាយសង្កាត់រដ្ឋបាលជលផលស្រុកលើកដែកទទួលលុយពីទូកប្រព្រឹត្តបទល្មើសនោះ ក្នុងមួយទូក១០០ដុល្លារ។ បើមិនដូច្នោះទេពួកគេក៏មិនហ៊ានឆ្លងដែនមកនេសាទត្រីប្រើឧបករណ៍ ដែលច្បាប់ជលផលហាមឃាត់នោះបានទេ។ ក្រោយពីទម្លាយអាថ៌កំបាំងនោះរួច ជនជាតិវៀតណាមទាំង៤នាក់ ក៏គេចខ្លួនបាត់។
ទំនងជាជនជាតិវៀតណាមទៅរករឿងមន្ត្រីជលផលសង្កាត់ស៊ីលុយហើយ ការពារឲ្យពួកគេមិនបានតាមកិច្ចសន្យាក្នុងថ្ងៃនោះ ទើបបានជាធ្វើឲ្យលោកនាយសង្កាត់ រដ្ឋបាលជលផលមាស សាន់ ផ្ទុះកំហឹងឡើងកម្ដៅរហូតដល់១៨០អង្សាប្រតិកម្មខឹងមេយោធាស្រុកលើកដែកសឹងតែស៊ីសាច់ហុតឈាម។ ឥឡូវនេះមន្ត្រីជលផលប្រកាសសង្គ្រាមវាយប្រហារគំរាមទៅលើក្រុមទាហានស្រុកទាំងកំរោលបួនជ្រុង។
ក្រោមកំហឹង១៨០អង្សាសេពីសំណាក់មន្ត្រីជលផល រវាងយោធាស្រុកនាពេលនេះ ទំនងមិនអាចបញ្ចប់ទៅវិញដោយស្រួលៗឡើយ ព្រោះការគំរាមកំហែងរបស់មន្ត្រីជលផលប៉ះពាល់កិត្តិយសមេយោធាស្រុកធ្ងន់ពេកដែលមិនអាចទទួលយកបាន។ ដូច្នេះអាចប្រឈមមុខដាក់គ្នាដល់ប្រព័ន្ធតុលាការ៕
