ភ្នំពេញ: ទំនងជាអស់ភាពអត់ ធ្មត់ ឬដោយភាពឆ្អែតចិត្ដនឹងចៅសង្កាត់ របស់ខ្លួន ស្ដ្រីម្នាក់ដែលជាពលរដ្ឋរស់ នៅសង្កាត់ផ្សារកណ្ដាល២ បានបញ្ចេញ នូវភាព ក្ដៅក្រហាយថាៈ “ នៅពេល មានធុរៈអ្វីមួយ ទៅសុំច្បាប់អនុញ្ញាត ពីចៅសង្កាត់ផ្សារកណ្ដាល ២ ម្ដងណា ក៏មិនបានជាការស្អីដែរ បានត្រឹមតែត្រូវ គាត់ស្ដីបន្ទោសបញ្ចេញ កំហឹង រម៉ាំង រម៉ោក ទទឹងទទើស ពិតជាពិបាកមែន ទែន ដូចអូសឫស្សីបញ្ច្រាសចុង ឬដូច រែកដុំថ្មឡើងដើមត្នោតអ៊ីចឹង!“ ។
ស្ដ្រីវ័យប្រមាណជា ៥០ ឆ្នាំ រូបនេះ និយាយទាំងទោមនស្សបែបនេះ កាលពីព្រឹកថ្ងៃទី១១ ខែមីនាឆ្នាំ២០១៥ នៅពេលដែលគាត់បានត្រឡប់ពីសាលា សង្កាត់ផ្សារកណ្ដាល ២ វិញ ហើយបាន នាំមកផ្ទះវិញនូវភាពមួហ្មងជាមួយនឹង ការខកចិត្ដទាំងស្រុង ដោយសារតែ សំណើរបស់គាត់សុំអនុញ្ញាតពីចៅ សង្កាត់ផ្សារកណ្ដាល ២ ( កញ្ញា ? ) ប៉ែន អ៊ិន ដើម្បីសុំជួសជុលផ្ទះ ត្រូវបាន បរាជ័យ ។
ស្ដ្រីរូបនេះ បានរៀបរាប់ថា គាត់ ត្រូវការជួសជុលឡៅតឿ និងប្រព័ន្ធទឹក ក្នុងផ្ទះរបស់គាត់ ហើយនៅព្រឹក ថ្ងៃទី ១១ ខែមីនាឆ្នាំ២០១៥ នេះ គាត់បាន ទៅសុំការអនុញ្ញាតពីចៅសង្កាត់ផ្សារ កណ្ដាល ២ ប៉ុន្ដែចៅសង្កាត់ គឺកញ្ញា ប៉ែន អ៊ិន នោះ មិនគ្រាន់តែមិនអើពើ ឡើយ ថែមទាំងពោលពាក្យទ្រគោះ បោះបោកដាក់គាត់ទៀតផង ។
ស្ដ្រីរូបនេះ បានបន្ដថា ក្រោយមក ចៅសង្កាត់រូបនោះ ហុចឯកសារមួយ សន្លឹកឱ្យគាត់បំពេញ ប៉ុន្ដែជាអកុសល គាត់ពុំសូវចេះអក្សរមិនអាចបំពេញបាន ដោយខ្លួនឯង ទើបគាត់សុំឱ្យមន្ដ្រីសង្កាត់ ដែលកំពុងមានវត្ដមាននៅទីនោះ ហើយកំពុងទំនេរជួយបំពេញឱ្យ ប៉ុន្ដែ ត្រូវចៅសង្កាត់ដដែលនោះស្ដីបន្ទោស រម៉ាំង រម៉ោកឱ្យគាត់ទៀត ហើយមិនឱ្យ មន្ដ្រីទាំងនោះជួយសរសរបំពេញ ឯកសារជំនួសគាត់ឡើយ។ មិនដឹងធ្វើ យ៉ាងណាទីបំផុតគាត់សម្រេចចិត្ដត្រឡប់ មកផ្ទះដោយពុំទទួលបានការអនុញ្ញាត។
ស្ដ្រីរូបនេះ បានបន្ថែមទៀតថា គាត់មិនចង់ហ៊ាននិយាយអ្វីទេ ព្រោះ ខ្លាចថ្នាំងថ្នាក់ដល់ចៅសង្កាត់ ប៉ុន្ដែនេះ មិនមែនជាលើកទីមួយទេ ប៉ុន្ដែបីលើក ហើយ ដែលស្ដ្រីចៅសង្កាត់រូបនោះ (ប៉ែន អ៊ិន) ប្រកាន់ឥរិយាបថដ៏ពិបាក ទទួលយកប្រហាក់ប្រហែលគ្នានេះ ។
ស្ដ្រីម្នាក់ជាគ្រូបង្រៀន ដែល ធ្លាប់បានស្គាល់ចរិតការងាររបស់ចៅ សង្កាត់ផ្សារកណ្ដាល ២ ដែរ បានរៀប រាប់ថាៈ “ ខ្ញុំរីករាយពេលឃើញស្ដ្រីដឹក នាំស្ថាប័នសង្គម (ចៅសង្កាត់) បែបនេះ ប៉ុន្ដែខ្ញុំក៏ធ្លាប់ឃើញអាកប្បកិរិយារបស់ គាត់ (ចៅសង្កាត់ផ្សារកណ្ដល ២ ) គឺ ខ្ញុំយល់ថាពិបាកទទួលយកណាស់ ! “។
អ្នកលក់ទឹកអំពៅម្នាក់ ដែលបាន អះអាងថា គាត់ក៏ធ្លាប់រងការស្ដីរម៉ាំង រម៉ោកពីសំណាក់ចៅសង្កាត់ផ្សារ កណ្ដាល ២ នៅពេលគាត់សុំច្បាប់ សង់រោងបុណ្យសពឪពុករបស់គាត់ នោះ បានបញ្ចេញមតិថាៈ “ ហេតុអ្វី បានជាគេយកមនុស្សបែបនេះមកធ្វើ ជាចៅសង្កាត់ ! បើនៅតែដាក់មនុស្ស បែបនេះទៀតនោះ អាណត្ដិក្រោយៗទៅ ខ្ញុំលែងបោះឆ្នោតឱ្យទៀតហើយ “ ។
មន្ដ្រីម្នាក់នៅសាលាសង្កាត់ ចតុ-មុខ ដែលធ្លាប់មានទំនាក់ទំនងការងារ ជាមួយចៅសង្កាត់ផ្សារកណ្ដាល ២ រូប នោះ បានបង្ហើបប្រាប់រស្មីកម្ពុជាថា ចំពោះចរិតចៅសង្កាត់ផ្សារកណ្ដាល ២ នោះ មិនស្រួលធ្វើការជាមួយមែន ហើយរឿងនេះអ្នកណាក៏ដឹងដែរ ៕
