ខេត្តព្រះសីហនុ៖ ក្រុមមន្ត្រី មន្ទីរពេទ្យបង្អែកខេត្តព្រះសីហនុ ឲ្យដឹងថា បុរជនជាតិគុយវ៉ែតម្នាក់ ត្រូវគេជឿថា បានស្លាប់នៅក្នុងផ្ទះសំណាក់មួយ យីហោ SEVEN មានទីតាំងស្ថិតក្នុងភូមិ ៤ សង្កាត់លេខ៤ ក្រុងព្រះសីហនុ ខេត្តព្រះសីហនុ ត្រូវបានគេឲ្យរថយន្តពេទ្យដឹកមកកាន់មន្ទីរពេទ្យចំការចេក ដើម្បីបញ្ចៀសពីការអង្កេត ដ៍ស្មុគ្រស្មាញ ។ តាមសេចក្ដីរាយការណ៍ថា បុរសរូបនោះបានស្លាប់នៅវេលា ម៉ោង១២ និង ៥០នាទីយប់ ចូលថ្ងៃទី៨ មិនា ឆ្នាំ ២០១៥ មុនពេលដឹកបញ្ជូនមកកាន់មន្ទីរពេទ្យ ប៉ុន្តែត្រូវបានម្ចាសផ្ទះសំណាក់បញ្ជាឲ្យរថយន្តសាមុយ របស់មន្ទីរពេទ្យដឹកចេញពីផ្ទះសំណាក់នោះ មកទម្លាក់ចោលនៅមន្ទីរពេទ្យ។ បច្ចុប្បន្នសាកសពត្រូវបានគេរក្សាទុកនៅមន្ទីរពេទ្យ ដើម្បីរង់ចាំប្រគល់ឲ្យក្រុមគ្រួសារសព និង ស្ថានទូត យកទៅធ្វើបុណ្យទៅតាមប្រពៃណី ។ យោងតាមរបាយការណ៍ របស់នគរបាលឲ្យដឹងថា សាកសពឈ្មោះ ABBASSMAN ALSHANNARI ភេទប្រុស អាយុ ៥២ ឆ្នាំ សញ្ជាតិគុយវ៉ែត កាន់លិខិតឆ្លងដែនលេខ ០០២៤២៨៨៤៣ ចុះថ្ងៃទី ២៦ ខែ សីហា ឆ្នាំ ២០០៧ ផុតសុពលភាពថ្ងៃទី២៥ ខែសីហា ឆ្នាំ ២០១៧ និង មានទិដ្ឋាការលេខ TF០៤៤៩៣០៨៨ ចុះថ្ងៃទី១៦ ខែកុម្ភៈ ឆ្នាំ ២០១៥ ផុតសុពលភាពថ្ងៃទី១៦ ខែ ឧសភា ឆ្នាំ ២០១៥ ។ បានឆ្លងដែនចូលមកកម្ពុជា តាមច្រកចាំយាម ក្នុងឋានជាភ្ញៀវទេសចរណ៍ ហើយបានមកស្នាក់នៅបន្ទប់២០៤ នៃ ផ្ទះសំណាក់ SEVEN ។ ប៉ុន្តែយ៉ាងណាក៏ដោយ រហូតមកដល់ពេលនេះ ពុំមានសេចក្ដី រាយការណ៍ច្បាស់លាស់ណាមួយ ស្ដីពីមូលហេតុ បណ្ដាលឲ្យមានការស្លាប់នោះឡើយ ៕
