កំពង់ឆ្នាំង ៖ ឈើប្រណិតច្រើនប្រភេទរាប់ម៉ែត្រគូប នៅក្នុងខណ្ឌរដ្ឋបាលព្រៃឈើកំពង់ឆ្នាំងត្រូវបានប្រគល់ឲ្យក្រុមហ៊ុន ទ្រី ភាព ដឹកជញ្ជូនចេញនៅរសៀលថ្ងៃទី០៣ ខែមិនា ឆ្នាំ២០១៥នេះ ដែលមន្ត្រីរដ្ឋបាលព្រៃឈើកំពង់ឆ្នាំងបានប្រាប់ឲ្យដឹងថា ក្រុមហ៊ុនទ្រី ភាព ដេញថ្លៃបានពីក្រសួងកសិកម្មរួចហើយ។
នៅក្នុងការប្រគល់ឈើប្រណិតទាំងនេះ គឺពុំមានមន្ត្រីណាម្នាក់ហ៊ានបង្ហាញឯកសារពីការដាក់ឲ្យដេញថ្លៃនោះឲ្យអ្នកសារព័ត៌មានដឹងឡើយ ចំណែកមន្ត្រីរដ្ឋបាលព្រៃឈើពុំបានពាក់ព័ន្ធក្នុងរឿងនេះទេ គ្រាន់តែទទួលបទបញ្ជាពីថ្នាក់លើឲ្យប្រគល់ឈើឲ្យក្រុមហ៊ុន ទ្រី ភាព តែប៉ុណ្ណោះ។
យោងតាមសម្ដី មន្ត្រីក្នុងខណ្ឌរដ្ឋបាលព្រៃឈើកំពង់ឆ្នាំងនិយាយថា មិនអាចប្រាប់ពីចំនួនឈើដែលដេញថ្លៃបាន និងចំនួនឈើដែលត្រូវប្រគល់ឲ្យក្រុមហ៊ុនខាងលើនេះពិតប្រាកដនោះទេ តែបានត្រឹមប្រាប់ឲ្យដឹងថាឈើទាំងនេះជាឈើបង្ក្រាបបានតាមដំណាក់កាលដែលតុលាការខេត្តបានចេញសាលក្រមដកហូតជាសម្បត្តិរដ្ឋរួចហើយ។ ជុំវិញករណីនេះ សមត្ថកិច្ចមួយចំនួនដែលបានសហការបង្ក្រាបបទល្មើសព្រៃឈើបាននិយាយថា នៅក្នុងពេលបង្ក្រាបបានលើកគ្នាស្ទាក់ចាប់ដូចស្រមោច ពេលខ្លះសមត្ថកិច្ចបានផ្សងនឹងគ្រោះថ្នាក់គ្រប់បែបយ៉ាង ព្រោះរថយន្តដឹកឈើជនល្មើស សុទ្ធតែជើងខ្លាំងនិងប្រើប្រាស់ថ្នាំញៀន អ្នកខ្លះហ៊ានបើករថយន្តល្មើសបុករថយន្តសមត្ថកិច្ចទៀតផង។ កន្លងមករថយន្តសមត្ថកិច្ចមិនតិចទេដែលរងគ្រោះមានក្រឡាប់ មានធ្លាក់ស្រែ ដោយសារតែរថយន្តដឹកឈើល្មើសច្បាប់ទាំងនោះដេញបុកនិងកៀរ។ប៉ុន្តែពេលលក់ឡាយឡុងដេញថ្លៃ និងប្រគល់ឲ្យក្រុមហ៊ុន ស្រាប់តែធ្វើស្ងាត់ៗមិនឲ្យសមត្ថកិច្ចចម្រុះ និងអ្នកកាសែតដឹងទៅវិញ គឺមិនតម្លាភាពទាល់តែសោះ។ ម្យ៉ាងវិញទៀតក្នុងការប្រគល់ឈើប្រណិតទាំងនេះ ក្រុមហ៊ុន និងមន្ត្រីរដ្ឋបាលព្រៃឈើ មានតែ២ភាគី គ្មានសមត្ថកិច្ចចម្រុះ គ្មានស្ថាប័នតុលាការ ដូចពេលចាប់នោះទេ។ ក្នុងរឿងនេះគេអាចសរសេរទូរលេខ និងប្រគល់ឈើតាមចិត្តក៏ថាបាន ដែលនេះត្រូវបានគេធ្វើការរិះគន់ថា មន្ត្រីរដ្ឋបាលព្រៃឈើ និងក្រុមហ៊ុនធ្វើជាអ្នកទាត់បាល់ផង ធ្វើជាអាជ្ញាកណ្ដាលផង មិនឲ្យគេដឹងជាសាធារណៈ តើអ្នកណាគេជឿទៅ។ ចំណែកតម្លៃឈើប្រណិតដែលក្រុមហ៊ុនត្រូវដឹកចេញ គឺមានរាប់សែនដុល្លារ និងមិនដឹងថា អប្បហាររបស់សមត្ថកិច្ចចម្រុះដែលខំបង្ក្រាបនោះបានប៉ុន្មានទៅ។
លោក ស៊ិន កុសល នាយខណ្ឌរដ្ឋបាលព្រៃឈើកំពង់ឆ្នាំងមិនអាចសុំការបំភ្លឺបានទេ ព្រោះទូរស័ព្ទលោកចូលតែគ្មានអ្នកលើក។ ចំណែកមន្ត្រីជំនាញវិញបានត្រឹមតែឆ្លើយដាក់គ្នាឲ្យអ្នកកាសែតសុំឯកសារពីអ្នកនោះ ពីអ្នកនោះទេ គ្មានអ្នកហានឲ្យឡើយ។
ដោយឡែកកន្លងមកនៅក្នុងខណ្ឌរដ្ឋបាលព្រៃឈើកំពង់ឆ្នាំង ត្រូវបានចោរផ្ទៃក្នុងលួចកាត់សោឃ្លាំងយកឈើប្រណិតៗអស់ជាច្រើនសន្លឹក ហើយតុលាការខេត្តបានស្រាវជ្រាវជាច្រើនឆ្នាំ តែរកពួកចោរផ្ទៃក្នុងលួចយកឈើទៅលក់បានរាប់សែនដុល្លារ ទាំងអស់នោះមិនឃើញឡើយរហូតមកដល់ពេលនេះ ដែលអ្នកខ្លះគេរិះគន់ថាធ្វើជាសមត្ថកិច្ចផង ធ្វើជាចោរផង គឺបានផលទាំងសងខាងគ្មានថ្នាក់ណាឈឺក្បាលនោះឡើយ៕
