ទោះជាបុណ្យចូលឆ្នាំខ្មែរបានបញ្ចប់ទៅហើយក្តី តែតម្លៃឈ្នួលឡានក្រុងដឹកអ្នកដំណើរមួយចំនួននៅបន្តឡើងថ្លៃដដែល។ ក្រុមអ្នកធ្វើដំណើរបានរិះគន់ថា ក្រុមហ៊ុនរថយន្តក្រុង អាចបន្តឡើងថ្លៃបាននេះ គឺព្រោះតែយន្តការដោះស្រាយរបស់រដ្ឋាភិបាលលើសេវាដឹកជញ្ជូនឯកជន មិនមានប្រសិទ្ធភាព។
ក្រុមអ្នកធ្វើដំណើរក្នុងរដូវបុណ្យចូលឆ្នាំតាមមធ្យោបាយ ដឹកជញ្ជូនសេវាឯកជន បានឲ្យដឹងថា តម្លៃឡានបានឡើងថ្លៃកប់ពពក ហើយការដំឡើងថ្លៃសម្រាប់ពិធីបុណ្យជាតិម្ដងៗនេះ បានធ្វើឲ្យប៉ះពាល់ធ្ងន់ធ្ងរចំពោះអ្នកដែលមានជីវភាពក្រោមមធ្យម។
រស់នៅខេត្តព្រះសីហនុ លោកស្រី ជាប សុធារី ឲ្យដឹងនៅថ្ងៃទី២០ មេសា ថា ក្រុមហ៊ុនរថយន្តក្រុងដឹកអ្នកដំណើរកាពីតូល (Capitol) បានដំឡើងថ្លៃទ្វេដង នៅក្នុងឱកាសបុណ្យចូលឆ្នាំនេះ។ លោកស្រីបន្តថា រហូតមកដល់ពេលនេះ គឺតម្លៃធ្វើដំណើរត្រូវបានក្រុមហ៊ុនឯកជនមួយនេះ បន្តយកថ្លៃខ្ពស់នៅឡើយ បើទោះជាបុណ្យប្រពៃណីជាតិខ្មែរ បានបិទបញ្ចប់ក្ដី។
លោកស្រីអះអាងថា ការយកថ្លៃឈ្នួលខ្ពស់របស់ក្រុមហ៊ុនដឹកជញ្ជូននេះ បានធ្វើឲ្យប៉ះពាល់ធ្ងន់ធ្ងរដល់អ្នកក្រីក្រ ហើយពួកគេបានចំណាយភាគច្រើននៃថវិកាដែលរកបាន សម្រាប់តែថ្លៃធ្វើដំណើរប៉ុណ្ណោះ៖ «ជាធម្មតាមកពីភ្នំពេញ កំពង់សោម តែ ២ម៉ឺនទេ ហើយដល់ពេលក្រោយមកគាត់ដំឡើង ២ម៉ឺន ៤ពាន់។ ក្រោយមកទៀតគាត់ឡើង ២ម៉ឺន ៥ពាន់ ហើយម្សិលមិញគាត់ឡើង ៣ម៉ឺន»។
ជារៀងរាល់ឆ្នាំសង្កេតឃើញថា នៅមុនពេលរដូវបុណ្យជាតិសំខាន់ៗ ដូចជាបុណ្យចូលឆ្នាំ ឬបុណ្យភ្ជុំបិណ្ឌជិតដល់ គ្រប់អ្នកប្រកបរបរដឹកជញ្ជូនសេវាឯកជន ដោយរួមទាំងរថយន្តក្រុង រថយន្តឈ្នួល និងម៉ូតូឌុបផង បានដំឡើងថ្លៃភ្លាមដែរពីអ្នកដំណើរ។
ដោយឡែកក្រុមហ៊ុនកាពីតូល សម្រាប់ភ្នំពេញ ទៅខេត្តព្រះសីហនុ ថ្ងៃធម្មតាមិនមានបុណ្យទាន តម្លៃសំបុត្រ ២ម៉ឺនរៀល។ ក៏ប៉ុន្តែតម្លៃនេះ បានឡើងខ្ពស់ចាប់តាំងពីថ្ងៃទី១ រហូតដល់ ២០ មេសា ចន្លោះពី ២ម៉ឺន ៤ពាន់ ដល់ ៣ម៉ឺន ៥ពាន់រៀល ក្នុងមនុស្សម្នាក់។ ការឡើងថ្លៃនេះ គឺអាស្រ័យតាមផ្លូវជិត ឬឆ្ងាយ។ ដោយសារថ្លៃឈ្នួលរថយន្តនៅបន្តឡើងថ្លៃនៅឡើយនោះ មានអ្នកដំណើរមួយចំនួនត្រូវរង់ចាំ និងបង្ខំចិត្តរង់ចាំដល់ថ្លៃឡានចុះថោកសិន ទើបត្រឡប់មកបំពេញកិច្ចការឡើងវិញ។
រស់នៅខេត្តឧត្តរមានជ័យ កញ្ញា ហេង ទិវា ឲ្យដឹងដែរថា សំបុត្រឡានក្រុងពីភ្នំពេញ ទៅខេត្តឧត្តរមានជ័យ បានឡើងថ្លៃជិត ២ម៉ឺនរៀល ក្នុងរដូវបុណ្យចូលឆ្នាំ ហើយតម្លៃនេះគិតត្រឹមថ្ងៃទី២០ មេសា ទៅហើយ ក្រុមហ៊ុន រិទ្ធិ មុនី នៅបន្តឡើងថ្លៃនៅឡើយ។ ហេង ទិវា បញ្ជាក់ថា តម្លៃថ្ងៃធម្មតាដែលពុំមានបុណ្យទាន គឺ ៤ម៉ឺន ៨ពាន់រៀល សម្រាប់អ្នកដំណើរម្នាក់។ ក៏ប៉ុន្តែ ក្នុងថ្ងៃបុណ្យចូលឆ្នាំនេះ ក្រុមហ៊ុនរថយន្តក្រុង រិទ្ធិ មុនី បានដំឡើងថ្លៃធ្វើដំណើររហូតដល់ ៦ម៉ឺន ៥ពាន់រៀល ក្នុងមនុស្សម្នាក់។
កញ្ញា ហេង ទិវា ថ្លែងថា រដ្ឋាភិបាលគប្បីចាត់វិធានការជាជាងត្រឹមតែចេញសេចក្ដីប្រកាសដែល ពុំមានឥទ្ធិពលហាមមិនឲ្យក្រុមហ៊ុន និងរថយន្តតាក់ស៊ី យកថ្លៃឈ្នួលខ្ពស់ តែបញ្ហានៅបន្តកើតមានទៀតនោះ៖ «ឡានក្រុង ៦ម៉ឺន ៥ពាន់ហើយបង! ខ្ញុំរកត្រឡប់ទៅវិញ ឡើងថ្លៃតែម្ដង»។
ភ្ជាប់នឹងបញ្ហានេះ តំណាងក្រុមហ៊ុនកាពីតូល ដែលថ្លែងសុំមិនបញ្ចេញឈ្មោះ បានអះអាងថា ការដំឡើងថ្លៃនេះជាគោលការណ៍ខាងភាគីក្រុមហ៊ុន។ ក៏ប៉ុន្តែតម្លៃដែលបានហក់ឡើងខ្ពស់នេះ នឹងត្រូវចុះធម្មតាឡើងវិញ ចាប់ពីថ្ងៃទី២១ ទៅ៖ «ថ្ងៃនេះ ៣ម៉ឺន។ អត់ផង! ព្រោះខ្ញុំធ្វើការអ៊ីចឹងបង បាត់សងលុយគេ។ ថ្ងៃស្អែក ២ម៉ឺន ២ពាន់»។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ មានប្រសាសន៍ថា ការទប់ស្កាត់ឡើងថ្លៃរថយន្តឈ្នួលខ្ពស់ហួសហេតុនេះ ខាងសមត្ថកិច្ចមិនមានសមត្ថភាពឆ្លើយតប ឬលូកដៃបានទេ។លោកចាត់ទុកថា ព្រោះប្រទេសកម្ពុជា ប្រកាន់គោលការណ៍របបសេដ្ឋកិច្ចទីផ្សារសេរី។ ហេតុនេះការដោះស្រាយបញ្ហាណាមួយ ទំនងជាថ្នាក់ជាតិមានភារកិច្ចច្រើនជាងថ្នាក់រាជធានី ខេត្តក្រុង។
លោក ឡុង ឌីម៉ង់ នៅមិនទាន់ប្រាកដនៅឡើយទេ ថាតើរដ្ឋអាចនឹងផ្ដល់ការផ្គត់ផ្គង់បែបណា ដើម្បីធានាការឡើងថ្លៃរថយន្តឈ្នួលនេះ ត្រូវកាត់បន្ថយនោះ៖ «សេដ្ឋកិច្ច ទីផ្សារសេរី រដ្ឋមិនអាចលើកលែង តែមានលក្ខណៈចាំបាច់ណាមួយនោះ ក្នុងកម្រិតណាដែលមិនអាចទៅធ្វើអន្តរាគមន៍ទៅលើការប្រកបអាជីវកម្ម របស់វិស័យឯកជនទេ។ កុំថារថយន្តឈ្នួល យើងមើលសូម្បីតែយន្តហោះ ក៏មាន High Season Low Seasonដែរ។ គេមានអាទាបអាខ្ពស់។ រដូវកាលទាបរដូវកាលខ្ពស់ដែរ។បានន័យថា នៅពេលណាមានសេចក្ដីត្រូវការច្រើន តម្លៃត្រូវតែឡើងអ៊ីចឹងហើយ»។
លោក សន ជ័យ អ្នកសម្របសម្រួលបណ្ដាញរួបរួមគណនេយ្យភាពប្រចាំអាស៊ីបូព៌ា និងប៉ាស៊ីហ្វិក ចាត់ទុកថា មានហេតុផលពីរយ៉ាងដែលនាំឲ្យតម្លៃរថយន្តឈ្នួលតែងហក់ឡើងខ្ពស់ ហួសហេតុក្នុងពេលបុណ្យទានម្ដងៗនេះ។ ហេតុផលទីមួយ គឺរដ្ឋពុំមានលទ្ធភាព ឬគ្មានឆន្ទៈតែម្ដង ក្នុងការត្រួតពិនិត្យតារាងតម្លៃសេវាដឹកជញ្ជូនរបស់ឯកជន ពេលមានបុណ្យទាន។ ចំណុចទីពីរ រដ្ឋពុំមានលទ្ធភាពទាល់តែសោះ សេវាផ្គត់ផ្គង់អ្នកដំណើរ ដូចជារថយន្តក្រុងរបស់រដ្ឋ ឬរថភ្លើង។ នេះជាមូលហេតុមួយក្នុងចំណោមហេតុផលផ្សេងទៀត ដែលនាំឲ្យសេវាដឹកជញ្ជូនឯកជនធ្វើព្យុះភ្លៀង ឬ ជិះសេះលែងដៃបានដោយងាយ។
លោកបន្តថា៖ «រដ្ឋមិនមានយន្តការត្រួតពិនិត្យគ្រប់គ្រងតម្លៃ ធ្វើដំណើររបស់រថយន្តក្រុងហ្នឹង។ ការធ្វើដំណើរនេះ ត្រូវធ្វើយ៉ាងដូចម្ដេច។ ទីពីររដ្ឋខ្វះមធ្យោបាយ ជួយប្រជាពលរដ្ឋរបស់ខ្លួន ខណៈពេលដែលប្រទេសដទៃទៀត គេកំពុងតែនៅដំណើរការសេវាឡានក្រុងរបស់រដ្ឋនៅឡើយ»។
គិតមកដល់ពេលនេះ នៅពុំមានការសិក្សាណាមួយដែលរកឃើញពីការចំណេញនៃសេវាដឹកជញ្ជូន យកថ្លៃខ្ពស់កប់ពពកនៅពេលមានពិធីបុណ្យទានម្ដងៗ ដូចនៅពេលនេះឡើយទេ។ ក៏ប៉ុន្តែ ក្រុមហ៊ុនដឹកជញ្ជូនអ្នកដំណើរ ត្រូវបានគេប៉ាន់ស្មានក្រៅផ្លូវការថា អាចទំនងចំណេញលុយរាប់លានរៀលពីការយកថ្លៃលើសតម្លៃធម្មតានេះ៕
