ក្រុមរដ្ឋអ៊ីស្លាមបានបញ្ចេញវីដេអូរបស់ក្រុមសកម្មប្រយុទ្ធរបស់ខ្លួនកាត់ក្បាលអ្នកកាន់សាសនាគ្រិស្តជនជាតិអេហ្ស៊ីប ២១នាក់ទៀតហើយ ដែលក្រុមខ្លួនបានចាប់ជំរិតនៅប្រទេសលីប៊ី។
វីដេអូនេះត្រូវបានបង្ហោះកាលពីរសៀលថ្ងៃអាទិត្យម្សិលមិញ ដោយសកម្មប្រយុទ្ធរដ្ឋអ៊ីស្លាមស្លៀកពាក់ឈុតខ្មៅពីក្បាលដល់ចុងជើង ដោយដង្ហែរចំណាប់ខ្មាំងស្លៀកពាក់ឈុតពណ៌ទឹកក្រូចទាំង ២១នាក់នេះទៅកាន់ឆ្នេរសមុទ្រ។ បុរសទាំង ២១នាក់នេះឃើញត្រូវគេបង្ខំឲ្យលុតជង្គង់នៅមុខពួកសកម្មប្រយុទ្ធមុនពេលត្រូវគេកាត់ក្បាល។
ចំនែកប្រទេសអេហ្ស៊ីបបានសន្យាសងសឹកចំពោះការសម្លាប់ដ៏ព្រៃផ្សៃនេះ ហើយក៏មានការថ្កោលទោសយ៉ាងខ្លាំងពីពិពភលោកផងដែរ។ សកម្មប្រយុទ្ធទាំងនេះបានចាប់ចំណាប់ខ្មាំងសាសនាគ្រិស្តអេស្ស៊ីបទាំង ២១នាក់នេះអស់ជាច្រើនសប្តាហ៍មកហើយ ដែលពួកគេជាកម្មករនៅទីក្រុង Sirte ពោលគឺតាំងពីខែធ្នូ និងមករាមក។ ជនជាតិអេហ្ស៊ីបរាប់ម៉ឺននាក់បានកំពុងធ្វើការនៅប្រទេសលីប៊ី ជាពិសេសលើវិស័យសំណង់ ហើយកម្មករសំណង់ទាំងនេះជាមុខសញ្ញារបស់ពួក IS ខណៈប្រទេសមួយនេះកំពុងស្ថិតក្នុងភាពចលាចល។ ប្រទេសលីប៊ីត្រូវបានគេឃើញមានការកើនឡើងជនប្រដាប់អាវុធយ៉ាងច្រើន ក្រោយពីមរណភាពរបស់មេដឹកនាំផ្តាច់ការ មហា កាដាហ្វី ក្នុងឆ្នាំ ២០១១មក៕
