កូរ៉េខាងជើងបានបញ្ចេញរូបភាពផ្លូវការនៃនាវាពិឃាតនាវា “កំបាំងកាយ” ថ្មីរបស់ខ្លួន ក្នុងការព្រមានយ៉ាងច្បាស់ក្រឡែតដល់ទាំងរដ្ឋាភិបាលក្រុងសេអ៊ូល និងសហរដ្ឋអាមេរិក ថាខ្លួនអាចបើកការវាយប្រហារដ៏ប្រល័យមលើនាវាកូរ៉េខាងត្បូងនិងអាមេរិកដោយពុំមានការព្រមានឲ្យដឹងមុននោះឡើយ។ នេះបើយោងតាមវេបសាយដេលីមែលចេញផ្សាយថ្ងៃទី ១១ ខែកុម្ភៈ។
បណ្តាញផ្សព្វផ្សាយរដ្ឋបាននិយាយថា នាវាល្បឿនលឿនដែលអាចបើកលើទឹកផងលើគោកផងនេះគឺជាលទ្ធផលនៃគម្រោងរយៈពេល ១០ ឆ្នាំ និងអាចធ្វើឲ្យវាវាយប្រហារនាវាកងទ័ពជើងទឹកណាមួយ ដែលកូរ៉េខាងជើងចាត់ទុកថាជាការគំរាមកំហែង។
នាវាពោងខ្យល់នេះត្រូវបានបំពាក់ជាមួយនឹងគ្រោងនាវាដ៏រឹងមាំមួយ ដែលអនុញ្ញាតឲ្យវាបើកបរឆ្លងកាត់តាមផ្ទៃសមុទ្រយ៉ាងមានប្រសិទ្ធភាព ខណៈទប់ស្កាត់បាននូវវត្តមានរ៉ាដាដែលចាប់វាផងដែរ ដោយធ្វើឲ្យវាមានការលំបាកបំផុតសម្រាប់នាវាគោលដៅ ដែលស្វែងរកនាវាពិឃាតនាវាប្រភេទនេះ មុនពេលវាបាញ់កាំជ្រួចរំលងលើផ្ទៃសមុទ្រដ៏ប្រល័យរបស់វា។
ព័ត៌មានលំអិតអំពីនាវាពិឃាតនាវាប្រវែង ៤០ ម៉ែត្រថ្មីរបស់កូរ៉េខាងជើងនេះគឺមានតិចតួចណាស់ ប៉ុន្តែនាវានេះត្រូវបានគេដឹងថាបានបំពាក់ជាមួយនឹងកង្ហាររុញល្បឿនតូចៗដើម្បីអនុញ្ញាតឲ្យវាឈានដល់ល្បឿនកំពូល ១៦០ គីឡូម៉ែត្រក្នុងមួយម៉ោង ដោយជួយបង្កើនល្បឿនទ្វេដងដល់នាវាជិះលើទឹកផងលើគោកផងល្បឿនបំផុតទីពីររបស់កងទ័ពជើងទឹកកូរ៉េខាងជើងមួយនេះ។
ចំពោះអាវុធវិញ នាវាពិឃាតនាវានេះត្រូវគេគិតថាមានកាំជ្រួចរំលងសមុទ្រផលិតដោយរុស្ស៊ីដ៏ខ្លាំងក្លា ហៅថាកាំជ្រួច KH-35 Uran ជាប្រភេទកាំជ្រួចដែលមានអាចបាញ់បានចម្ងាយ ២៥០ គីឡូម៉ែត្រ ហើយវាត្រូវបានគេប្រៀបធៀបទៅនឹងកាំជ្រួច Harpoon របស់កងទ័ពជើងទឹកអាមេរិក។
កូរ៉េខាងជើងពុំបានបញ្ចេញឲ្យដឹងពីព័ត៌មានលំអិតនៃរយៈចម្ងាយអតិបរមារបស់កាំជ្រួច KH-35 Uran នោះទេ ប៉ុន្តែកូរ៉េខាងជើងបានអះអាងថា អំឡុងពេលសាកល្បង នាវាពិឃាតនាវានេះបានវាយចំ និងពន្លិចនាវាគោលដៅពីចម្ងាយជាង ៩៥ គីឡូម៉ែត្រ។
សម្រាប់ការប្រយុទ្ធកៀកគ្នា នាវានេះត្រូវបានបំពាក់ជាមួយនឹងកាំភ្លើង AK-630 30mm Gatling របស់កូរ៉េខាងជើងចំនួនពីរដើម ជើងទម្រកាំភ្លើងយន្តចំនួន ៤ និងប្រព័ន្ធប្រឆាំងកាំជ្រួចរបស់នាវាមួយផងដែរ នេះបើយោងតាមវេបសាយ Ars Technica។
នាវាពិឃាតនាវានេះគឺជាការវិវត្តន៍ចុងក្រោយបំផុតក្នុងខ្សែបណ្តាញផលិតប្រភេទនាវាបើកលើទឹកផងលើគោកផង ដែលអភិវឌ្ឍឡើងដោយកងទ័ពជើងទឹកកូរ៉េខាងជើង ហើយគេបានដឹងថាមាននាវាបែបនេះពីរប្រភេទទៀតកំពុងស្ថិតក្នុងដំណាក់កាលអភិវឌ្ឍន៍ផងដែរ៕
