ក្រុងអាម៉ានៈ ហ្ស៊កដានី បានប្រកាសថា ខ្លួនបានធ្វើការវាយប្រហារជាច្រើនទៅលើក្រុមរដ្ឋអ៊ិស្លាម ខណៈប្រេសិតកំពូលអាមេរិកម្នាក់ បាននិយាយថា ទាហានអ៊ីរ៉ាក់នឹងចាប់ផ្តើមវាយលុកថ្មើរ ជើងទ្រង់ទ្រាយធំមួយប្រឆាំងក្រុមជីហាដក្នុងប៉ុន្មានសប្តាហ៍ខាងមុខនេះ។
ប្រមុខទ័ពអាកាសហ្ស៊កដានី លោកឧត្តមសេនីយ៍ទោ Mansour al-Jobour បាននិយាយពីថ្ងៃអាទិត្យថា ព្រះរាជាណាចក្រនេះ បានធ្វើការវាយប្រហារផ្លូវអាកាស ៥៦ លើក ចាប់តាំងពីថ្ងៃព្រហស្បតិ៍ជាផ្នែកនៃការវាយប្រហាររបស់អន្តរជាតិប្រឆាំង IS ដែល ក្រុងវ៉ាស៊ីនតោន និយាយថាកំពុងចាប់ផ្តើមវាយលុក។
ហ្ស៊កដានី បានប្តេជ្ញាឆ្លើយតបធ្វើឲ្យ «រង្គើផែនដី» ក្រោយពីក្រុមអ្នកជ្រុលនិយមស៊ុននី បានចាប់ពីឡុតម្នាក់នៅក្នុងចំណោមពីឡុតទ័ពអាកាសរបស់ខ្លួនគឺលោក Maazal-Kassasbeh បានដុតលោកទាំងរស់និងបានចេញវីដេអូបង្ហាញការសម្លាប់នោះគួរឲ្យស្អប់ខ្ពើមបំផុត។
លោក Jobour បានប្រាប់ក្រុមអ្នកកាសែតថា៖ «នៅថ្ងៃ ទី១ នៃយុទ្ធនាការសងសឹកឲ្យពីឡុតរបស់យើងលោក Maaz al-Kassasbeh គោលដៅ ១៩ កន្លែងត្រូវបានបំផ្លាញនៅក្នុងនោះមានជំរំបណ្តុះបណ្តាលជាច្រើនកន្លែងនិងគ្រឿងបរិក្ខារ»។
លោក John Allen ជាអ្នកសម្របសម្រួលអាមេរិកសម្រាប់សម្ព័ន្ធមិត្តប្រឆាំង IS នៃប្រទេសលោកខាងលិចនិងអារ៉ាប់បាននិយាយពីថ្ងៃអាទិត្យថា ទ័ពអ៊ីរ៉ាក់នឹងចាប់វាយលុកថ្មើរជើងប្រឆាំងក្រុមជីហាដ «ក្នុងប៉ុន្មានសប្តាហ៍ខាងមុខនេះ»។
លោកបានប្រាប់ទីភ្នាក់ងារសារព័ត៌មាន Petra ផ្លូវការរបស់ហ្ស៊កដានី ថា៖ «នៅពេលកម្លាំងរបស់អ៊ីរ៉ាក់ចាប់ផ្តើមយុទ្ធនាការថ្មើរជើងដើម្បីកាន់កាប់អ៊ីរ៉ាក់ឡើងវិញក្រុមសម្ព័ន្ធមិត្តនឹងផ្តល់សមត្ថភាពយោធាទ្រង់ទ្រាយធំស្របជាមួយការវាយប្រហារនោះ ដោយបានបញ្ជាក់ថា អ៊ីរ៉ាក់នឹងដឹកនាំការវាយប្រហារនោះ»។
IS បានកាន់កាប់ទឹកដីអ៊ីរ៉ាក់និង ស៊ីរី ដោយបានគ្រប់គ្រងទឹកដីទាំងនោះជាមួយទម្រង់អ៊ិស្លាមដ៏សាហាវព្រៃផ្សៃ។
ហ្ស៊កដានី បានប្តេជ្ញាវាយកម្ទេចក្រុមនេះ ក្រោយពីពួកគេបានចេញវីដេអូមួយដែលមាន បាំងរបាំងយ៉ាងខ្ពស់ដោយបានបង្ហាញការសម្លាប់ពីឡុតរបស់ខ្លួនដែលត្រូវបានគេចាប់ខ្លួននៅក្នុង ខែធ្នូ នៅពេលយន្តហោះ F-16 របស់លោក បានធ្លាក់នៅក្នុង ប្រទេសស៊ីរី។
ប្រមុខទ័ពអាកាសរូបនោះ បាននិយាយថា ការវាយប្រហារផ្លូវអាកាសជាច្រើន ចាប់តាំងពីថ្ងៃព្រហស្បតិ៍មុន បានបំផ្លាញគោលដៅរាប់សិបកន្លែងដែលនៅក្នុងនោះ មានបន្ទាយទាហាន ជំរំបណ្តុះបណ្តាល គ្រាប់រំសេវ និងឃ្លាំងប្រេងជាច្រើន៕
